စစ်တပ်လွှတ်​တော်က မင်းအောင်လှိုင်ကိုသမ္မတအဖြစ်​ကြေညာပြီး နာရီပိုင်းအတွင်း မြောင်နယ်ဗုံးကြဲခံရလို့ပြည်သူ ၄ဦး ဒဏ်ရာရ

■စကုနယ်ကစာသင်​ကျောင်းကိုလည်းဗုံးကြဲ

​ဧပြီ−၃၊ ၂၀၂၆ ဇေအောင်/People’s Spring

အာဏာသိမ်းစစ်ခေါင်းဆောင်မင်းအောင်လှိုင်ကို စစ်တပ်လွှတ်တော်က သမ္မတအဖြစ် တင်မြှောက်ပြီး နာရီပိုင်းအကြာမှာ စစ်ကိုင်းတိုင်း၊ မြောင်မြို့နယ်က နဘက်ကျေးရွာကို လေကြောင်းတိုက်ခိုက်ခဲ့လို့ အရပ်သားပြည်သူ ၄ ဦး ထိခိုက်ဒဏ်ရာရပြီး အဆောက်အအုံအချို့ ပျက်စီးဆုံးရှုံးခဲ့ကြောင်း သတင်းရရှိပါတယ်။

အာဏာသိမ်းစစ်ခေါင်းဆောင် မင်းအောင်လှိုင်ကို သမ္မတအဖြစ် တင်မြှောက်အပြီး နာရီပိုင်းအကြာ ​ဒီကနေ့ ဧပြီ ၃ ရက် ညနေ ၅ နာရီခန့်မှာ မကွေးလေတပ်စခန်းကနေ တက်လာတဲ့ ဂျက်ဖိုက်တာ (Jet Fighter) ၂စီးဟာ မြောင်မြို့နယ်၊ နဘက်ကျေးရွာကို လေကြောင်းကနေ ဗုံးကြဲတိုက်ခိုက်ခဲ့တာဖြစ်ကြောင်း ဒေသခံတွေက ပြောပါတယ်။

Public Service Announcement

လေကြောင်းတိုက်ခိုက်မှုကြောင့် ကျေးရွာအတွင်းရှိ အရပ်သားပြည်သူ ၄ ဦး ဗုံးစထိမှန်ဒဏ်ရာများ ရရှိခဲ့ကြောင်း မြောင်မြို့နယ် T.G.R. သတင်းမှန်ပြန်ကြားရေးရဲ့ တာဝန်ရှိသူက ပြောပါတယ်။

“ပြည်သူ ၄ ယောက်ထိပါတယ်။ ကျား ၂ ယောက် မ ၂ ယောက် ပါ။ မ ၂ ယောက်က စိုးရိမ်ရပါတယ်”လို့ အထက်ပါတာဝန်ရှိသူက ပြောပါတယ်။

ဒါ့အပြင် ကျေးရွာအတွင်းရှိ နေအိမ် ၂လုံးနဲ့စာသင်ကျောင်း ထိမှန်ပျက်စီးခဲ့ကြောင်း ဒေသခံတွေက ပြောပါတယ်။

​လက်ရှိမှာ ဒေသခံတွေအနေနဲ့ လေကြောင်းအန္တရာယ်ကြောင့် ဘေးလွတ်ရာသို့ တိမ်းရှောင်နေကြရပြီး ဒဏ်ရာရရှိသူတွေကို ဆေးကုသမှုပေးဖို့ ကြိုးစားနေတယ်လို့ သိရပါတယ်။

အလားတူ စစ်တပ်က မင်းဘူးမြို့နယ်၊ စကုနယ်၊မန်း​ချောင်းအ​နောက်ဘက်က ​ကျေးရွာတစ်ရွာက အလယ်တန်းကျောင်းကို ဧပြီ ၃ ရက် နံနက်အ​စောပိုင်း ၁နာရီ ၄၀ မိနစ်ဝန်းကျင်မှာ စစ်တပ်က ​​လေ​ကြောင်းမှဗုံးကြဲတာ​ကြောင့်ပြည်သူတဦးထိခိုက်ဒဏ်ရာရရှိခဲ့ပါတယ် ။ဒါအပြင်အ​ဆောက်အအုံအချို့လည်းပျက်စီးခဲ့ပါတယ်။

မြောင်မြို့နယ်က နဘတ်ကျေးရွာဟာ ပြီးခဲ့တဲ့ မတ်လ ၂၀ ရက်ကလည်း လေကြောင်းတိုက်ခိုက်ခံရပြီး ရက်သားကလေးတစ်ဦးနဲ့ အမျိုးသမီးတစ်ဦး သေဆုံးခဲ့ပါသေးတယ်။

စစ်တပ်ဟာ ယခုရက်ပိုင်းအတွင်း အရာတော်၊ ဘုတလင်နဲ့ မုံရွာမြို့နယ်က ဆေးခန်းတွေကိုပါ လေကြောင်းတိုက်ခိုက်မှုတွေပြုလုပ်နေပြီး ပြည်သူထိခိုက်သေဆုံးမှုတွေ ရှိနေပါတယ်။

မှတ်ချက်-သတင်းကိုထပ်မံဖြည့်စွက်ထားပါတယ်။