ဧပြီ−၆၊၂၀၂၆။ဇော်ရမ်း၊ဟာနာဆန်/People’s Spring
စစ်ကိုင်းတိုင်း၊ ရွှေဘိုမြို့နယ်မှာ စစ်ဘေးရှောင်တွေခိုလှုံနေတဲ့ ဆည်အင်းကျေးရွာက ဘုန်းကြီးကျောင်းကို စစ်တပ်က လေကြောင်းကနေဗုံးကြဲသွားလို့ သံဃာတော်ချို့အပါအဝင်စစ်ဘေးရှောင်တွေ ထိခိုက်သေဆုံးမှုရှိတယ်လို့ သတင်းရရှိပါတယ်။
ဒီကနေ့ ဧပြီ ၆ရက် မနက် ၁၁နာရီကျော်မှာ ဗုံးကြဲတာဖြစ်ပြီး လက်ရှိမှာ သေဆုံးသူတွေနဲ့ ထိခိုက်သူတွေကို သယ်ယူနေရတယ်လို့ ဒေသခံတွေက ပြောပါတယ်။
“ ဘုန်းကြီးကိုပါ ထိသွားတယ်။ အထိအခိုက်များတယ်လို့ပဲ ပြောနိုင်သေးတယ်။ ဒါက တောကျောင်းလို့ ခေါ်တဲ့ စစ်ဘေးရှောင်တွေနေတဲ့နေရာဖြစ်ပါတယ်” လို့ ဒေသခံတစ်ဦးက ပြောပါတယ်။
Public Service Announcement
လေကြောင်း တိုက်ခိုက်မှုကြောင့် စစ်ဘေးရှောင်တွေကိုစာသင်ပေးတဲ့ ဆရာတော်တစ်ပါး ပျံလွန်တော်မူပြီး ကလေးငယ်တွေလည်း ထိခိုက်ဒဏ်ရာရရှိခဲ့ကြောင်း ဒီပဲယင်းမြို့နယ် ညီနောင်များအဖွဲ့က အသိပေးပါတယ်။
“ ပေါင်ပြတ် တစ်ယောက်။ ဘုန်းကြီးက ဇက်ပြတ်ထွက်သွားတာ။ မီးလောင်ဗုံးတွေရောကျဲ
စက်လက်နဲ့ပါစွဲတာ။” လို့ ဒေသခံတစ်ဦးက ပြောပါတယ်။
ကလေးငယ်တွေထိခိုက်တဲ့ အရေအတွက်ကို အတည်ပြုဖို့ကြိုးစားနေပြီး လက်တလော မသိရသေးပါဘူး။
စစ်တပ်က ၎င်းတို့စိတ်တိုင်းကျ ပုံဖော်ထားတဲ့လွှတ်တော်ကတဆင့် သမ္မတနေရာရွေးချယ်တာတွေ၊အစိုးရအဖွဲ့ဖွဲ့စည်းတာတွေ လုပ်ဆောင်နေချိန်မှာ နေပြည်တော်နဲ့ရန်ကုန်ကလွဲလို့ ကျန်တဲ့တိုင်းနဲ့ပြည်နယ်တွေတွေ လေကြောင်းကနေတိုက်ခိုက်တာတွေပြုလုပ်နေပါတယ်။
မတ်လ ၂၀ရက်က ကသာမြို့အမှတ်(၃)ရပ်ကွက်ထဲက စစ်ဘေးရှောင်တွေခိုလှုံနေတဲ့လေးထပ်ကျောင်းကို ဗုံးကြဲလို့သံဃာတော်အချို့နဲ့အရပ်သား ၈၀ဦးခန့်အထိ သေဆုံးခဲ့ပါတယ်။
