ဧပြီ-၁၉၊၂၀၂၆။ဇော်ရမ်း/People’s Spring
မြောက်ဦးမြို့နယ်၊ ကျောက်ဆည်ပြင်ရွာ ဘုန်းကြီးကျောင်းကို စစ်တပ်က ဒီကနေ့ တိုက်လေယာဥ်နဲ့ဗုံးကြဲတာကြောင့် သံဃာတော်သုံးပါးနဲ့ စစ်ရှောင် ၁၀ဦးဒဏ်ရာရခဲ့ပါတယ်။
ဧပြီလ ၁၉ရက် မနက် ၁၀နာရီခန့်နဲ့ နေ့လယ် ၁၂နာရီ ၃၀ မိနစ်ခန့်မှာကျောက်ဆည်ပြင်ရွာ ဘုန်းကြီးကျောင်းကိုစစ်တပ်ကဂျက်ဖိုက်တာ နှစ်စီးနဲ့ ပေါင် ၅၀၀ ဗုံး လေးလုံးကြဲခဲ့တာပါ။
ရဟန်းပြည်သူစုစုပေါင်း ၁၃ဦးဒဏ်ရာရခဲ့ပြီး ဘုန်းကြီးကျောင်းနဲ့သိမ် အဆောက်အအုံလုံးဝပျက်စီးသွားသလို နွားငါးကောင်လည်းသေဆုံးခဲ့တယ်လို့စုံစမ်းသိရပါတယ်။သံဃာတော်သုံးပါး၊အမျိုးသမီးရှစ်ဦး၊ အမျိုးသားနှစ်ဦးဒဏ်ရာရခဲ့တာဖြစ်ပြီး ၎င်းတို့ထဲမှာ အသက်အန္တရာယ်စိုးရိမ်ရတဲ့သူတွေလည်းရှိနေတယ်လို့ စစ်ဘေးရှောင်တွေကိုကူညီနေတဲ့ စာရေးဆရာ ဝေဟင်အောင်က ပြောပါတယ်။
Public Service Announcement
စစ်ကောင်စီဟာဧပြီလ ၁၉ရက် နေ့လယ်ပိုင်းမှာ မြောက်ဦးမြို့နယ်အပြင် ပုဏ္ဏားကျွန်းမြို့နယ်ထဲက ဓာတ်အားခွဲရုံ၊ နတလကျောင်းအနီးကိုလည်း ဂျက်ဖိုက်တာ သုံးစီးနဲ့ ဗုံးကြဲခဲ့ပါတယ်။
ပုဏ္ဏားကျွန်းမြို့နယ်ကိုလေကြောင်းတိုက်ခိုက်မှုမှာလည်း နေအိမ်ဆယ်လုံးထက်မနည်းမီးလောင်သွားတယ်လို့ ပုဏ္ဏားကျွန်းလူငယ်များအစည်းအရုံးသတင်းနှင့်ပြန်ကြားရေးကော်မတီက သတင်းထုတ်ပြန်ထားပါတယ်။
ရခိုင်ပြည်နယ်မှာသိမ်းပိုက်ဖို့ကျန်ရှိနေသေးတဲ့မြို့နယ်တွေကို စစ်ရေးရည်မှန်းချက်ပြည့်ဝတဲ့အထိ တိုက်ခိုက်သွားမယ်လို့ အာရက္ခတပ်တော်(AA) စစ်ဦးစီးချုပ်ဗိုလ်ချုပ်ထွန်းမြတ်နိုင်က ဧပြီလ ၁၀ရက်နေ့ကျရောက်တဲ့ ၁၇နှစ်မြောက်အာရက္ခတပ်တော်နေ့မှာ ထုတ်ဖော်ပြောကြားထားပါတယ်။ စစ်ကောင်စီကအရပ်သားပြည်သူတွေကိုဦးတည်ပြီးတော့ပစ်ခတ်နိုင်လို့ စစ်ရေးနဲ့လုံခြုံရေးအန္တရာယ်သတိပြုကြဖို့ AAက ထုတ်ပြန်ထားပါတယ်။
