မေ-၉၊ ၂၀၂၆။ ထားမြတ်/People’s Spring
အာဏာသိမ်းစစ်တပ်ဟာ လေကြောင်းတိုက်ခိုက်မှုတွေ ပြုလုပ်အပြီးမှာ ကယ်ဆယ်ရေးလုပ်သူတွေကို ထပ်မံ ပစ်မှတ်ထား တိုက်ခိုက်နေကြောင်း ချင်းပြည်သူ့အစည်းအရုံး/ချင်းပြည်သူ့တပ်မတော်(CPU/CPA) အထွေထွေအတွင်းရေးမှူး ဆလိုင်းယောမာန်က ပြောကြားပြီး ဒီလို ပစ်မှတ်ထား တိုက်ခိုက်တာကို သတိရှိဖို့ လူစုလူဝေး တက်နိုင်သမျှ ရှောင်ဖို့ သတိပေးထားပါတယ်။
မေလ ၈ရက်မနက်မှာ စစ်တပ်က မင်းတပ်မြို့တနေရာကို လေကြောင်းကနေ ဗုံးကြဲပြီး ဒရုန်းနဲ့ စောင့်ကြည့်ကာ နေ့လည်ပိုင်းမှာ ကယ်ဆယ်ရေးလုပ်သူတွေကို မီးလောင်ဗုံးတွေသုံး တိုက်ခိုက်ခဲ့တဲ့ ဖြစ်စဉ်အပြီး ဆလိုင်းယောမာန်က အခုလို သတိပေးချက်ကို လူမှုကွန်ရက်မှာ ရေးသားခဲ့ပါတယ်။
“၂၀၂၁ – ၂၀၂၃ စစ်ကောင်စီ ဗုံးကြဲပြီးသွားတာနဲ့… ဒေသခံတွေ ကယ်ဆယ်ရေးလုပ်ကြ၊ ဒဏ်ရာရသူတွေဆွဲထုတ်ကြ၊ ကူညီကြတယ်။ လေကြောင်း ထပ်ဆင့်မလာတော့ဘူး။၂၀၂၄-၂၀၂၅ … စစ်ကောင်စီ လေကြောင်းတိုက်ခိုက်မှုလုပ်တယ်။ ဗုံးကြဲပြီး ၁၅ မိနစ်၊ နာရီဝက်အကြာ… ဒေသခံတွေ မီးငြိမ်းနေတုန်း၊ ဒဏ်ရာရသူတွေ ဆွဲထုတ်နေတုန်း၊ ကူညီကယ်ဆယ်ရေးလုပ်နေတုန်း.. အချိန်ကိုက် နောက်တစ်ကြိမ် ဗုံးလာကြဲတယ်။၂၀၂၆ – စစ်ကော်မရှင် လေကြောင်းတိုက်ခိုက်မှုလုပ်တယ်။ ဗုံးကြဲပြီး… နာရီ ၃ ချက်လောက် ဒေသခံတွေ စောင့်ကြည့်တယ်။ ဘာမှ လှုပ်ရှားမှု မရှိဘူး။ ကူညီကယ်ဆယ်ရေး၊ ဒဏ်ရာရသူတွေ ဆွဲထုတ်နေတာလုပ်တယ်။ စကမ က အဲဒီလို လူစုလူဝေး ရှိ မရှိကို ဒရုန်းနဲ့စောင့်ကြည့်တယ်။ ပြီးမှ… လူစုလူဝေးရှိရာနေရာကို စောင့်ကြည့်ပြီး ထပ်ဗုံးကြဲတယ်” လို့ ဆလိုင်းယောမာန်က လေကြောင်း ဗုံးကြဲတိုက်ခိုက်ခံရမှု အတွေ့အကြုံတွေကို ပြောထားပါတယ်။
Public Service Announcement
စစ်တပ်ရဲ့ ဒရုန်းကို သတိထားဖို့ ၊ ကူညီကယ်ဆယ်ရေး လုပ်ဆောင်ရာမှာ အမြန်လုပ်ဆောင်ပြီး အမြန်လူစုခွဲဖို့ သတိပေးပါတယ်။
“ကယ်ဆယ်ရေးလုပ်နေတုန်းမှာလည်း.. သတိရှိပါ။ လူထုအနေနဲ့…. လူစုလူဝေး တတ်နိုင်သမျှ ရှောင်ပါ။ ဆိုင်ကယ်တွေ အစုလိုက်အပုံလိုက်ရပ်တာ၊ ကားတွေ အစုလိုက်ရပ်တာမျိုး ရှောင်ပါ။ လေကြောင်းသတင်း အမြဲနားစွင့်ပြီး… ကိုယ်ရောက်တဲ့နေရာတိုင်း အနီးအနားမှာ ဗုံးခိုကျင်း၊ ကတုတ်ကျင်း၊ ရေမြောင်း၊ ရေပြွန်၊ ဗုံးဒဏ်ခံနိုင်တဲ့ အဆောက်အဦတွေ ရှိ မရှိ လေ့လာမှတ်သားပါ။ သတိ/အသိနဲ့ တော်လှန်ကြပါစို့” လို့ ဆလိုင်းယောမာန်က ပြောပါတယ်။
မနေ့က မင်းတပ် အရှေ့ခြမ်းလေကြောင်းတိုက်ခိုက်ခံရမှုမှာ လူထိခိုက်သေဆုံးနဲ့ နေအိမ်ပျက်စီးမှု ရှိခဲ့တယ်လို့ ဒေသခံက ပြောပြထားပါတယ်။
CPU/CPAဟာ ချင်းပြည်တောင်ပိုင်းက ဒေသကာကွယ်ရေးတပ်(CDF) လေးဖွဲ့ စုစည်းထားတာဖြစ်ပြီး မင်းတပ်၊ ကန်ပက်လက်၊ မတူပီမြို့နယ်တွေကို ထိန်းချုပ်ထားတာပါ။
စစ်တပ်ဟာ ပြီးခဲ့တဲ့ရက်ပိုင်းတွေအတွင်းမှာ CPU/CPA ထိန်းချုပ်ထားတဲ့ ချင်းတောင်ပိုင်းဒေသတွေကို လေကြောင်းဗုံးကြဲတိုက်ခိုက်မှုတွေ ဆက်တိုက်လုပ်ဆောင်ခဲ့လို့ထိခိုက်သေဆုံးမှုတွေလည်း များပြားခဲ့ပါတယ်။
ဧပြီ ၂၉ရက်က ကန်ပက်လက်မြို့နယ် ကျင်ဒွေးမြို့ကို စစ်တပ်က လေကြောင်းဗုံးကြဲတိုက်ခိုက်ခဲ့ရာ တံတားလုပ်သား ၉ဦးသေဆုံးခဲ့ပါတယ်။ နောက်နေ့မှာ အဲဒီတံတားနေရာကိုလည်း စစ်တပ်က လေကြောင်းတိုက်ခိုက်ခဲ့လို့ ချင်းတော်လှန်ရေးရဲဘော် ၂ဦးထပ်မံ ကျဆုံးခဲ့တယ်လို့ ဒေသခံ က ပြောပါတယ်။
လက်ရှိမှာ ပြည်သူတွေအနေနဲ့ နေအိမ်တွေ ၊ စျေးဆိုင်ခန်းတွေမျာ ဗုံးခိုကျင်းတွေ ကတုတ်ကျင်းတွေ အသင့်ထားရှိပြီး လေကြောင်းရန် သတိထားနေထိုင်ကြဖို့လည်း CPU/CPAက သတိပေးချက် ထုတ်ပြန်ထားပါတယ်။
