ဇွန် – ၁၊၂၀၂၆
အရှေ့တောင်အာရှ နိုင်ငံများ အစည်းအရုံး (အာဆီယံ)ရဲ့ လူ့အခွင့်အရေးဆိုင်ရာ လွှတ်တော် အမတ်များ အစုအဖွဲ့ (APHR)က အာဏာသိမ်း မြန်မာစစ်ခေါင်းဆောင်ကို အသိအမှတ်ပြု ဆက်ဆံခဲ့တဲ့ အိန္ဒိယ အစိုးရအပေါ် ဝေဖန် ရှုတ်ချသွားခဲ့ပါတယ်။
ဒီမိုကရေစီအရပ်သားအစိုးရဆီကနေ အာဏာသိမ်းခဲ့တဲ့ စစ်ခေါင်းဆောင်ဟာ အတုအယောင် ရွေးကောက်ပွဲ တစ်ခုကနေတဆင့် သမ္မတ ရာထူးကို ရယူခဲ့တဲ့နောက် ပထမဆုံး ပြည်ပ ခရီးစဉ်အဖြစ် အိန္ဒိယကို သွားရောက်ခဲ့ပါတယ်။
APHRကတော့ အိန္ဒိယ အစိုးရရော၊ ဝန်ကြီးချုပ် နာယန်ဒရာ မိုဒီပါ စစ်ခေါင်းဆောင်ကို အသိအမှတ်ပြု ဆက်ဆံမှုတွေကို ရုပ်သိမ်းဖို့၊ မြန်မာပြည်သူတွေရဲ့ သဘောထား ဆန္ဒတွေကို လေးစားပေးဖို့ တောင်းဆိုခဲ့ပါတယ်။
Public Service Announcement
မင်းအောင်လှိုင်ဟာမြန်မာနိုင်ငံကိုကိုယ်စားပြုတဲ့တရားဝင်သမ္မတမဟုတ်ဘူးလို့ APHRရဲ့ အင်ဒိုနီးရှား လွှတ်တော်အမတ် ခရစ္စတီး ဘာရန်းစ်က ပြောကြားခဲ့ပါတယ်။
မင်းအောင်လှိုင် ဦးဆောင်ခဲ့တဲ့ စစ်တပ်ဟာ ရွေးကောက်ခံ မြန်မာအစိုးရကို အဓမ္မ ဖယ်ရှားပြီး ဆိုးရွားလှတဲ့ လူ့အခွင့်အရေး ချိုးဖောက်မှုတွေကိုလည်း ကျူးလွန်ခဲ့ကြောင်း သူက ဆိုပါတယ်။
အိန္ဒိယရဲ့နိုင်ငံခြားရေးမူဝါဒတွေဟာအိမ်နီးချင်းတွေ၊အထူးသဖြင့်အရှေ့ပိုင်းဒေသကနိုင်ငံတွေနဲ့အတူတည်ငြိမ်မှု၊ယုံကြည်မှုနဲ့ ပူးပေါင်းဆောင်ရွက်မှုတွေ မြှင့်တင်ရေးကို အခြေပြုထားကြောင်း၊ ဒါပေမဲ့ မြန်မာနိုင်ငံမှာ လွန်ခဲ့တဲ့ နှစ်တွေအတွင်း စစ်တပ်ရဲ့ အကြမ်းဖက် လုပ်ရပ်တွေကြောင့် အဲဒီ ရည်မှန်းချက်တွေ ထိခိုက်ယိမ်းယိုင်ခဲ့ရကြောင်းလည်း APHRက ထောက်ပြခဲ့ပါတယ်။
မြန်မာစစ်တပ်ဟာ ကျေးရွာတွေကို ဗုံးကြဲတာ၊ ပြည်သူတွေကို စစ်မှုထမ်းဖို့ အတင်းအကျပ် ဖမ်းဆီးတာ၊ စစ်ရှောင်ပြည်သူ သိန်းနဲ့ချီ ရွှေ့ပြောင်းစေတာမျိုး လုပ်ရပ်တွေ ကျူးလွန်ခဲ့တဲ့အပြင် အရပ်သား ၇၇၀၀ ကျော်ကို သတ်ဖြတ်ခဲ့ကြောင်းလည်း APHRက ပြောပါတယ်။
နိုင်ငံတကာ အသိုက်အဝန်းဟာ အသွင်ပြောင်း စစ်အုပ်ချုပ်ရေး အစုအဖွဲ့ကိုပုံမှန်ဆက်ဆံဖို့ ကြိုးစားမယ်ဆိုရင် စစ်တပ်က အကြမ်းဖက်မှုတွေ ဆက်ပြီး ကျူးလွန်အောင်၊ မြန်မာပြည်သူတွေရဲ့ နာကျင်ဒုက္ခတွေ သက်ဆိုးရှည်အောင် တွန်းအားပေးရာ ရောက်လိမ့်မယ်လို့လည်း APHRက သတိပေးထားပါတယ်။
ဒီမိုကရေစီ နိုင်ငံကြီးတစ်ခုလည်းဖြစ်၊ အာဆီယံရဲ့ ဆွေးနွေးမှု မိတ်ဖက် နိုင်ငံလည်းဖြစ်တဲ့ အိန္ဒိယ အနေနဲ့ မြန်မာနဲ့ ဆက်ဆံရာမှာ ဒီမိုကရေစီ စံတန်ဖိုးတွေကို အလေးထား ချဉ်းကပ်ဖို့ မျှော်လင့်ကြောင်းလည်း APHRက တိုက်တွန်းသွားပါတယ်။
ကိုးကား – APHR
