'/%3E%3C/svg%3E){kind=small}
ဇူလိုင်-၁၅၊၂၀၂၆။ဖိုးသား/People’s Spring
မကွေးတိုင်း၊ ချောက်မြို့နယ်မှာ PDF ရဲဘော်တွေကို သတ်ဖြတ်ခဲ့တဲ့ စစ်တပ်ရဲ့ ရဲကွန်မန်ဒိုစစ်ကြောင်းကို ဒီကနေ့ ဇူလိုင် ၁၅ရက်မှာ တော်လှန်ရေးတပ်တွေက ကြားဖြတ်တိုက်ခိုက်မှုတွေလုပ်နေတယ်လို့ ဒေသခံစစ် ရေးသတင်းရင်းမြစ်တွေက ပြောပါတယ်။
ရဲကွန်မန်ဒိုစစ်ကြောင်းက စစ်ကား ၂စီးနဲ့ ချောက်မြို့နယ်ကတဆင့် ဆိပ်ဖြူ-ဆောလမ်းအတိုင်း နယ်မြေခံတပ်တွေနဲ့အတူ ဆိပ်ဖြူမြို့နယ်အတွင်း ၀င်လာချိန်မှာ တိုက်ခိုက်ခဲ့တာလို့ ဆိုပါတယ်။
“ဆိပ်ဖြူအခြေစိုက်နယ်မြေခံတပ်တွေနဲ့ ပါလာပြီး ဆိပ်ဖြူ-ဆောလမ်းဘေးတလျှောက် စစ်ကြောင်းထိုးလာတာ။ဂျုပ်ချောင်ကြီး၊ဂျုပ်ချောင်လေး ရွာတွေကို ရဲကွန်မန်ဒို အင်အား ၅၀ ၀န်းကျင်နဲ့ စ၀င်နေပြီ”လို့ ဆိပ်ဖြူမြို့နယ်ကာကွယ်ရေးတပ်ဖွဲ့၀င်တစ်ဦးက ပြောပါတယ်။
Public Service Announcement
အဲဒီရဲကွန်မန်ဒိုစစ်ကြောင်းကို မိုင်းဆွဲတိုက်ခိုက်ခဲ့ပြီး ထိခိုက်မှုအခြေအနေကို စုံစမ်းဆဲလို့ ဆိပ်ဖြူအခြေစိုက် တော်လှန်ရေးရဲဘော်တစ်ဦးက ပြောပါတယ်။
“ကပစ (၂၁)ကို ဦးတည်တယ်လို့ သိရတယ်။နောက်တခုက လောလောဆယ် စကစက တိုက်ခိုက်ရေးတပ်တွေကို တိုင်းရင်းသားလက်နက်ကိုင်နယ်မြေတွေဆီပို့နေရချိန် ရဲကွန်မန်ဒိုတွေကို ထုတ်သုံးလာတယ်”လို့ သူက ပြောပါတယ်။
ဒါ့အပြင် နိုင်ငံအလယ်ပိုင်းက မကွေးတိုင်းကို ရဲကွန်မန်ဒိုတွေ အသုံးပြုပြီး စစ်ရေးလှုပ်ရှားမယ့်အကြောင်းသိထားရတယ်လို့ မကွေးတိုင်းစစ်ရေးသတင်းရင်းမြစ်က ဆိုပါတယ်။
အခုဇူလိုင် ၁၀ ရက်က ချောက်မြို့နယ်၊တောင်သာကျေးရွာမှာ စစ်တပ်နဲ့ ရဲကွန်မန်ဒိုတပ်ဖွဲ့တွေလိုက်ပါလာတဲ့ စစ်ကြောင်းနဲ့ တော်လှန်ရေးတပ်ဖွဲ့တွေတိုက်ပွဲဖြစ်ရင်း မကွေးခရိုင် ပြည်သူ့ကာကွယ်ရေးအဖွဲ့၀င်တွေနဲ့ ခရိုင်တပ်ရင်း ၂ခုက ရဲဘော်စုစုပေါင်း ၂၀ ဦးကျဆုံးခဲ့ပါတယ်။
အဲဒီရဲကွန်မန်ဒိုစစ်ကြောင်း ၀င်လာတဲ့ ဆိပ်ဖြူမြို့နယ်မှာ စစ်တပ်ရဲ့ကာကွယ်ရေးပစ္စည်းရုံး ကပစ (၂၁၊ ၂၂) နဲ့ အမှတ်(၉)လေကြောင်းရန်ကာ ကွယ်ရေးကွပ်ကဲမှုစစ်ဆင်ရေးဌာနချုပ်(လစခ) တို့ရှိပါတယ်။
အမှတ်(၂၁) ကာကွယ်ရေးပစ္စည်းစက်ရုံ(ကပစ -၂၁)က လေတပ်သုံးဗုံးတွေထုတ်ပြီး အမှတ် (၂၂) ကာကွယ်ရေးပစ္စည်းစက်ရုံ(ကပစ−၂၂ )က လက်နက်တွေ ထုတ်နေတာဖြစ်ပါတယ်။
