အာဇာနည်​ခေါင်း​ဆောင်​တွေကို ရန်ကုန်မှာကားဟွန်းတီး အ​လေးပြု

​ရောင်နီ၊တာရာ/People’s Spring

ဗိုလ်ချုပ်အောင်ဆန်းနဲ့တကွ အာဇာနည်ခေါင်းဆောင်တွေ ကျဆုံးခဲ့တာ ၇၉ နှစ်မြောက်အာဇာနည်နေ့ ဒီက​နေ့နံနက် ၁၀ နာရီ ၃၇ မိနစ်က ရန်ကုန်မြို့ မှာကား​တွေကရပ်တန့်ပြီး ဟွန်းတီး အ​လေးပြုခဲ့ကြပါတယ်။

“အသံတွေကြားတော့ စိတ်မကောင်းဘူး။ အဲဒါကြောင့် အနက်ရောင်ဝတ်လာတာ”လို့ အမျိုးသမီးတစ်ဦးကပြောပါတယ်။

ကားဟွန်းတီးချိန်မှာ လမ်းပေါ်သွားလာနေသူ​တွေလည်း ရောက်တဲ့နေရာမှာရပ်ပြီး ငြိမ်သက်ကာ ဂါရဝပြုခဲ့ကြပါတယ်။

Public Service Announcement

ဒီနေ့မှာ ခေတ်အဆက်ဆက်ကျဆုံးခဲ့ရတဲ့ တော်လှန်ရေးရဲဘော်တွေအတွက် ပြည်လုံးကျွတ် လူထုလှုပ်ရှားမှုကြီး ပြုလုပ်ဖို့ တော်လှန်ရေးအင်အားစုတွေကတိုက်တွန်းထားပါတယ်။

ပြည်သူ့ကာကွယ်ရေးတပ်မတော်(PDF) ရဲဘော်တွေ အပါအဝင် တော်လှန်ရေးရဲဘော်တွေနဲ့ ဒေါ်အောင်ဆန်းစုကြည်အပါအဝင် မတရားဖမ်းဆီးခံထားရတဲ့ စစ်အာဏာရှင်ကို အရှုံးမပေးဘဲ တိုက်ပွဲဝင်နေသူအားလုံးဟာ သက်ရှိအာဇာနည်တွေဖြစ်တယ်လို့ အမျိုးသားညီညွတ်ရေးအစိုးရ(NUG) ယာယီသမ္မတ ဒူဝါလရှီးလက ​ပြောပါတယ်။

ဒီကနေ့ မနက်မှာ ကျင်းပတဲ့ ၇၉ နှစ်မြောက် အာဇာနည်နေ့ အထိမ်းအမှတ် အခမ်းအနား မိန့်ခွန်းမှာ ယာယီသမ္မတက အခုလို ပြောကြားခဲ့တာဖြစ်ပါတယ်။

အာဇာနည်နေ့ဟာ ၁၉၄၇ ဇူလိုင် ၁၉ရက်က ရန်ကုန်မြို့ ဝန်ကြီးများရုံးမှာ ဗိုလ်ချုပ်အောင်ဆန်းအပါအဝင် အာဇာနည်​ခေါင်း​​ဆောင်​တွေအစည်းအ​ဝေးလုပ်​နေတုန်း မသမာသူ​တွေရဲ့လုပ်ကြံသတ်ဖြတ်မှုခံခဲ့ရတာ​ ကြောင့် တိုင်းပြု ပြည်ပြုခေါင်းဆောင်ကြီးတွေကို ဂုဏ်ပြုရင်း​ပေါ်​ပေါက်လာတာဖြစ်ပါတယ်။

တဖက်မှာ အာဏာသိမ်း​ခေါင်း​ဆောင်မင်း​အောင်လှိုင် ဟာ ဒီက​နေ့မှာရန်ကုန်မြို့က အာဇာနည်ကုန်းကို သွား​ရောက်ခဲ့ပြီး ဒီက​နေ့မနက်မှာ ရန်ကုန်မြို့နယ်အများစုမှာအင်တာနက်ဖြတ်​တောက်ခံခဲ့ရပါတယ် ။ ဒါအပြင် လွန်ခဲ့တဲ့ရက်​တွေကတည်းက ရန်ကုန်မှာစစ်တပ်ကအင်အားအများအပြားနဲ့ လုံခြုံ​ရေးမြှင့်ထားပြီး မြို့အဝင်အထွက်ခရီးသည်​တွေကိုစစ်​​ဆေးတာ ၊လမ်းသွားလမ်းလာ​လူငယ်အချို့ဖုန်း​တွေပါစစ်​ဆေးတာ​တွေလုပ်ခဲ့တယ်လို့မြို့ခံအချို့က​ပြောပါတယ် ။

ဒါ​ကြောင့် အာဏာသိမ်း​ခေါင်း​ဆောင်ဟာဗိုလ်ချုပ်​အောင်ဆန်းရဲ့သမီးဖြစ်သူလူထု​ခေါင်း​ဆောင်​ဒေါ်​အောင်ဆန်းစုကြည်ကိုဖမ်းဆီး​ထောင်ချထားပြီး နိုင်ငံတစ်ဝန်းကဗိုလ်ချုပ်ရုပ်ထု​တွေကိုလည်းဖျက်ဆီး​နေပြီး​တော့ အာဇာနည်​နေ့မှာကြ ဗိုလ်ချုပ်နဲ့တကွအာဇာနည်​ခေါင်း​ဆောင်​တွေကို တက်ပြီး ဂါရဝပြုဟန်လုပ်ပြခဲ့တာဖြစ်ပါတယ်။