ဇူလိုင် ၂၄၊ ၂၀၂၆။ ထားမြတ်/People’s Spring
အာဏာသိမ်းစစ်တပ်ရဲ့ လေယာဉ်တွေ မင်းတပ်မြို့ပေါ် အကြိမ်ပေါင်းများစွာ ပျံဝဲနေသလို လေယာဉ်နဲ့ ကင်းထောက်တာတွေ ပြုလုပ်နေလို့ လူစုလူဝေး လုပ်တာ အပါအဝင် သတိပြု ဆင်ခြင်ရမှာတွေကို ဆင်ခြင်ဖို့ ချင်းပြည်သူ့အစည်းအရုံး/ချင်းပြည်သူ့တပ်မတော်(CPU/CPA) အထွေထွေအတွင်းရေးမှူး ဆလိုင်းယောမာန်က လူမှုကွန်ရက်ကနေ သတိပေးနှိုးဆော်လိုက်ပါတယ်။
အာဏာသိမ်းစစ်တပ်က မင်းတပ်နဲ့ကန်ပက်လက်မြို့ ပြန်ထိန်းချုပ်ဖို့ ထိုးစစ်ဆင်လာလို့ တိုက်ပွဲတွေ တောက်လျှောက်ပြင်းထန်နေတဲ့ ချင်းတောင်ပိုင်းမှာ စစ်တပ်က လေကြောင်းဗုံးကြဲတာတွေ ဆက်တိုက်ပြုလုပ်နေတဲ့ အခြေအနေမှာ ချင်းတောင်ပိုင်းထိန်းချုပ်ထားတဲ့ CPU/CPA ခေါင်းဆောင်က လေကြောင်းရန် သတိပြုဖို့ ထပ်မံ နှိုးဆော်ခဲ့တာပါ။
“ဒီမနက်ကိုပဲ.. ကြဲမလို ကြဲမလို ရှေ့နောက်တောင်မြောက် ဝဲတာ ၁၀ ကြိမ် လောက်ရှိမယ်။ Jet Fighter အသံကြားနေရတုန်းကိုပဲ ကင်းထောက် Y 12 လေယာဥ် ဝဲလာတယ်။လူစုလူဝေး လုပ်တာတွေ၊ ဆိုင်ကယ်ရပ်တာတွေ၊ ကားရပ်တာတွေ၊ အဝတ်လှန်းတာတွေကအစ ဆင်ခြင်ကြပါ။အမိုးအကာအောက်၊ အရိပ်အောက်မှာပဲ ဆိုင်ကယ်တွေ၊ ကားတွေ ရပ်ကြ၊ အဝတ်တွေ လှန်းတာကောင်းပါတယ်။ ဖြစ်နိုင်ရင် ဖိနပ်ချွတ်တာကစလို့ အိမ်ထဲချွတ်ပြီး လူရိပ်လူခြေတိတ်နေရင် အကောင်းဆုံးပါပဲ” လို့ ဆလိုင်းယောမာန်က ရေးသားထားပါတယ်။
Public Service Announcement
ဒီလိုလေကြောင်းရန် သတိပေးရာမှာ လေကြောင်း တိုက်ခိုက်ခံရတဲ့နေရာတခုကို ရောက်ရှိနေတဲ့ ဆလိုင်းယောမာန်က နိုင်ငံခြားသားတစ်ဦးကို တိုက်လေယာဉ် လာရောက်မှု အခြေအနေကို ရှင်းပြနေတဲ့ ရုပ်သံကို ဖော်ပြထားပါတယ်။ အဲဒီရုပ်သံမှာ လေယာဉ်လာတာကြောင့် ဘေးကင်းရေး နေရာယူတာ၊ စစ်တပ်က ဖျက်အားပြင်းဗုံးတွေ အသုံးပြု တိုက်ခိုက်လာတို့ ဒေသတွင်း ထိခိုက်ပျက်စီးမှု အခြေအနေတွေ လိုက်လံပြသတာလည်းတွေ့ရပါတယ်။
“this is the price of freedom” လို့လည်း ဆလိုင်းယောမာန်က လွတ်လပ်မှုအတွက် ပေးဆပ်ရမှု အခြေအနေကို ပြောပြတာလည်း ကြားရပါတယ်။
မင်းတပ်အပါအဝင် ဒေသတွင်း လေကြောင်း တိုက်ခိုက်ခံရမှုတွေ အသိပေးနေတဲ့ ဒေသခံ သတင်းရင်းမြစ်ကလည်း အာဏာသိမ်းစစ်တပ်ဟာ ဒီကနေ့ ဇူလိုင် ၂၄ရက်မနက်မှာ မင်းတပ်မြို့အနီးနေရာတွေကို တိုက်လေယာဉ်နဲ့ ၁၀ကြိမ် ဗုံးကြဲတိုက်ခိုက်ခဲ့တယ်လို့ အသိပေးထားပါတယ်။
တစ်ကြိမ် ပေါင် ၃၀၀ ဗုံး ၂လုံး အသုံးပြု တိုက်ခိုက်ခဲ့တာမို့ ဗုံးအလုံး ၂၀ ကြဲချခဲ့တယ်လို့ အသိပေးထားပါတယ်။ဒါ့အပြင် Y12 လေယာဉ်နဲ့လည်း အကြိမ် ၂၀ခန့် ဗုံးအလုံး ၉၀ခန့် ကြဲချတိုက်ခိုက်ခဲ့ကြောင်း ဖော်ပြထားပါတယ်။
“ ယနေ့တမနက်တည်း မင်းတပ်အရှေ့ခြမ်းနေရာများကို ဗုံးအလုံး ၁၀၀ ကျော်ကြဲချ တိုက်ခိုက်ပြီး လက်နက်ကြီး ဒရုန်းများဖြင့်လည်း ဗုံးကြဲတိုက်ခိုက်နေကြောင်း ကြားသိရပါတယ်” လို့ မင်းတပ်ဒေသခံက အသိပေးထားပါတယ်။
အာဏာသိမ်းစစ်တပ်ဟာ မင်းတပ်မြို့အပါအဝင် ချင်းတောင်ပိုင်းနဲ့ ဆက်စပ်နေတဲ့ မကွေးတိုင်း ယော၊ ဆောဒေသကိုလည်း လေကြောင်းဗုံးကြဲတိုက်ခိုက်ခဲ့ကြောင်း ဒေသတွင်း သတင်းရင်းမြစ်တွေက အသိပေးထားပါတယ်။
ယောဒေသ သတင်းတွေ ဖော်ပြနေတဲ့ ယောအလင်းတန်းကလည်း ဇူလိုင် ၂၃ရက် မနေ့ညပိုင်းမှာ စစ်တပ်ဟာ ယောနယ်ကို လေယာဉ် ၅စီး အုပ်စုဖွဲ့ ပျံသန်းကာ ဆောမြို့နယ် တနေရာကို ဗုံးသီးအလုံး ၅၀ ကြဲချ တိုက်ခိုက်ခဲ့တယ်လို့ အသိပေးထားပါတယ်။ ဒါ့အပြင် ထီးလင်းမြို့နယ်ကို ကင်းထောက်ပျံသန်းတာတွေလည်း လုပ်ဆောင်ခဲ့တယ်လို့ အသိပေးထားပြီး ဒေသတွင်း ပြည်သူတွေ တော်လှန်ရေးအင်အားစုတွေ လေကြောင်းရန် ပိုမိုသတိထား နေထိုင်ကြဖို့ ဖော်ပြထားပါတယ်။
