ဩဂုတ် ၉၊ ၂၀၂၆။ ထားမြတ်/People’s Spring
ရက္ခိုင်ပြည်နယ်၊ အမ်းမြို့နယ်က တလိုင်းတောင်ကျေးရွာကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့လို့ အရပ်သား ၂ဦးသေဆုံးကာ ၃ဦး ဒဏ်ရာရရှိခဲ့ကြောင်း အာရက္ခတပ်တော် (AA)က သတင်းထုတ်ပြန်ပါတယ်။
ဩဂုတ် ၈ရက် ညပိုင်းမှာ တလိုင်းတောင်ကျေးရွာက ကားဝပ်ရှော့တစ်ခုနဲ့ အနီးဝန်းကျင်ကို စစ်တပ်က ဗုံးကြဲခဲ့တာလို့ ဆိုပါတယ်။
ဗုံးကြဲတိုက်ခိုက်မှုကြောင့် အသက် ၆၇ နှစ်အရွယ် သက်ကြီးရွယ်အို ၁ဦးနဲ့ ကားဝပ်ရှော့ အလုပ်သမား ၁ဦး တို့ သေဆုံးကာ ကလေး ၂ဦး အပါအဝင် ၃ဦး ဒဏ်ရာရရှိခဲ့ကြောင်း အသိပေးပါတယ်။
Public Service Announcement
အာဏာသိမ်းစစ်တပ်ဟာ ဇူလိုင်နဲ့ ဩဂုတ်အတွင်းမှာ AA ထိန်းချုပ်ထားတဲ့ ရက္ခိုင်ပြည်နယ်က အရပ်သား ပြည်သူနေထိုင်ရာနေရာတွေကို ပစ်မှတ်ထား လေကြောင်း တိုက်ခိုက်မှုတွေ မကြာခဏလုပ်ဆောင်ခဲ့ရာ လေယာဉ်အုပ်စုဖွဲ့ တိုက်ခိုက်မှုတွေပါ ပြုလုပ်ခဲ့ပါတယ်။
မြောက်ဦးနဲ့ သံတွဲမြို့တွေကို စစ်တပ်က လေကြောင်းဗုံးကြဲခဲ့ရာ ဇူလိုင် ၂၃ရက်ကနေ ဩဂုတ် ၄ရက်အထိ နှစ်ပတ်အတွင်း အရပ်သား ၇ဦး ထက်မနည်းသေဆုံးကာ ၂၉ဦးထက်မနည်း ဒဏ်ရာရခဲ့ကြောင်း AAက ထုတ်ပြန်ထားချက်တွေအရ သိရပါတယ်။
မိုးတွင်းကာလဖြစ်ပေမဲ့ ပြည်သူတွေအနေနဲ့ စစ်တပ်ရဲ့ လေကြောင်းရန်ကို သတိထားသွားလာနေထိုင်ကြဖို့ လိုအပ်ကြောင်းAAက ထုတ်ပြန်တိုက်တွန်းထားပါတယ်။
