ဂန့်ဂေါမြို့နယ် နှမ်းခါးရွာကို စစ်ကောင်စီတပ် မီးရှို့ဖျက်ဆီး

အကြမ်းဖက်စစ်ကောင်စီတပ်သည် မကွေးတိုင်း ဂန့်ဂေါမြို့နယ် နှမ်းခါးရွာသို့ ယ​နေ့ဝင်ရောက်စီးနင်းပြီး ကျေးရွာအတွင်းရှိနေအိမ်များကို မီးရှို့ဖျက်ဆီးခဲ့သည်။

စစ်ကောင်စီတပ်သည် နှမ်းခါးရွာမှ အိမ်ခြေ ၃၀ ထက်မနည်းကို မီးရှို့ဖျက်ဆီးခဲ့ကြောင်း ဒေသခံများ၏ ပြောကြားချက်ကို ကိုးကားပြီး Gangaw Youths Voice က ဖော်ပြသည်။

ဒေသခံ ပြည်သူ့ကာကွယ်ရေးတပ်ဖွဲ့ဝင်တစ်ဦးကလည်း စစ်ကောင်စီတပ် မီးရှို့ဖျက်ဆီးခဲ့သည့် နှမ်းခါးရွာ အခြေအနေကို ရုပ်သံရိုက်ကူးပြီး Facebook စာမျက်နှာတွင် ဖော်ပြခဲ့ရာ နှမ်းခါးရွာ လမ်းမ ဘေးဝဲယာရှိ နေအိမ်များ မီးလောင်နေသည်ကို တွေ့ရသည်။

“ အိမ်ကြီးအိမ်ကောင်းတွေကို ​ရွေးဆော်သွားတာ” ဟု အဆိုပါ တပ်ဖွဲ့ဝင်က ပြောကြားသည်။
နှမ်းခါးရွာတွင် ယနေ့မနက်က ဒေသခံ ကာကွယ်ရေးတပ်ဖွဲ့ဝင်များနှင့် စစ်ကောင်စီတပ်အကြား တိုက်ပွဲဖြစ်ပွားခဲ့ကြောင်း ဒေသခံအချို့က ပြောသည်။သို့​သော် တိုက်ပွဲအခြေအနေ အသေးစိတ်ကို မသိရသေးပေ။ ​ဒေသခံကာကွယ်​ရေးအဖွဲ့ဝင်များသည် အဓိက တူးမီး​သေနတ်များကို ကိုင်​ဆောင်၍ ခုခံကာကွယ်​နေကြသည်။

Public Service Announcement

နှမ်းခါးရွာအနီးရှိ မြင်သားရွာခံတစ်ဦးကလည်း စစ်ကောင်စီတပ်သည် စက်တင်ဘာ ၉ရက်တွင် မြင်သားရွာသို့ လက်နက်ကြီးဖြင့်ပစ်ခတ် ဝင်ရောက်စီးနင်း တိုက်ခိုက်ခဲ့ပြီး ကျေးရွာ ကာကွယ်ရေးလူငယ်များနှင့်ရွာခံများကို ပါ ပစ်ခတ်သတ်ဖြတ်ခဲ့သည်။ထိုသို့ ရွာကို စီးနင်းပစ်ခတ်မှု​ကြောင့် လူငယ် ၁၁ဦးကျဆုံးခဲ့ကြောင်း၊ မြင်သားရွာရှိ နေအိမ် ၂၀ထက်မနည်းကို မီးရှို့ဖျက်ဆီးခဲ့ကြောင်း ​ဒေသခံများကပြောကြားသည်။ ကျဆုံးသွား​သောလူငယ်များသည် PDF အဖွဲ့ဝင်များမဟုတ်ဘဲ စစ်​ကောင်စီက ရွာသို့ မကြာခဏ လာ​ရောက်ဖျက်ဆီးသဖြင့် ရပ်ရွာလုံခြုံ​ရေးအတွက် ဖွဲ့စည်းထား​သောလူငယ်များဖြစ်ကာ တူမီး​သေနတ်သာရှိ​ကြောင်း ​ဒေသခံအချို့က​ပြောသည်။ ရွာကို ဒလန်လမ်းပြမှုဖြင့်စစ်​ကောင်စီကလာ​ရောက်စီးနင်း​ပစ်ခတ်သောအခါ လူငယ်အချို့က ရှိ​​သောတူမီး​သေနတ်ဖြင့်သာခုခံကာကွယ်ခဲ့​ကြောင်းလည်း ​ဒေသခံများက​ပြောသည်။

မြင်သားရွာနှင့် နှမ်းခါးရွာသာမက စစ်ကောင်စီတပ်သည် ဂန့်ဂေါ်မြို့နယ် သာလင်းရွာကိုလည်း ဝင်ရောက်စီးနင်းပြီး နေအိမ်များကို မီးရှို့ခဲ့ကြောင်းလည်း ဒေသခံက ပြောသည်။