အမျိုးသားညီညွတ်ရေးအစိုးရ(NUG)ကို ထောက်ခံကြောင်း ‘ကမ္ဘာလုံးဆိုင်ရာမြန်မာ့နွေဦးတော်လှန် ရေး’ လှုပ်ရှားမှု ဆန္ဒထုတ်ဖော်ပွဲကို ဒီနေ့မနက်ပိုင်းမှာ ဂျပန်နိုင်ငံ တိုကျိုမြို့နဲ့ ဟိုကိုင်းဒိုတို့မှာဆက်လက်ပြုလုပ်ခဲ့ပြီး ထောင်နဲ့ချီတဲ့မြန်မာနိုင်ငံသားတွေ တက်ရောက်ပါဝင်ခဲ့ကြပါတယ်။
ကုလသမဂ္ဂအထွေထွေညီလာခံကို လာမယ့် စက်တင်ဘာ ၁၄ ရက်မှာ စတင်ကျင်းပဖို့ရှိနေပြီး ကုလသမဂ္ဂမှာ မြန်မာနိုင်ငံကို NUG က ကိုယ်စားပြုခွင့်ရရှိရေးနဲ့ လက်ရှိမြန်မာသံအမတ်ကြီး ဦးကျော်မိုးထွန်းကို ဆက်လက်ခန့်ထားရေးအတွက် ပြည်ပရောက်မြန်မာတွေက အခုလိုလှုပ်ရှားမှုကို ကမ္ဘာတစ်ဝန်းလုပ်ဆောင်နေတာဖြစ်ပါတယ်။
ဆန္ဒထုတ်ဖော်ပွဲမှာ အကြမ်းဖက်မြန်မာစစ်တပ်ရဲ့ အာဏာသိမ်းမှုကို လက်မခံဘဲ ကန့်ကွက်ကြောင်း၊ အမျိုး သားညီညွတ်ရေးအစိုးရ(NUG)ကသာ ပြည်သူရွေးချယ်တင်မြှောက်တဲ့၊ လက်ခံတဲ့အစိုးရဖြစ်ကြောင်းကို ပြသခဲ့ကြပါတယ်။
‘ကမ္ဘာလုံးဆိုင်ရာမြန်မာ့နွေဦးတော်လှန်ရေး’ လှုပ်ရှားမှုကို စက်တင်ဘာ ၁၁ ရက်က ဒိန်းမတ်၊ ယူကေ၊ ဖင်လန်၊ ဩစတြေးလျ၊ အစ္စရေး၊ အမေရိကန် စတဲ့နိုင်ငံတွေမှာလည်း ဆင်နွှဲခဲ့ကြပါတယ်။
Public Service Announcement
