ပြည်ပစွက်ဖက်မှုတွေကို အလွန်အကျွံမျှော်မှန်းမထားကြဖို့ မြန်မာပြည်သူတွေကို စင်ကာပူနိုင်ငံခြားရေးဝန်ကြီး အကြံပြု

မြန်မာ့ပြည်သူတွေအနေနဲ့ ပြည်ပ စွက်ဖက်မှုတွေနဲ့ပတ်သက်ပြီး အလွန်အကျွံမျှော်မှန်းမထားကြဖို့စင်ကာပူနိုင်ငံခြားရေးဝန်ကြီး ဗီဗီယံခရစ်ရှနန် က အင်တာဗျုးတစ်ခုမှာထည့်သွင်းပြောလိုက်ပါတယ်။

တခြားသူတွေရဲ့ ပါဝင်စွက်ဖက်ဖို့ အားမထုတ်ရဘဲ ပြည်တွင်းရေးပြဿနာတွေကို ပြည်တွင်းမှာပဲဖြေရှင်းဖို့လိုအပ်ပါလိ့မ်မယ်လို့ Bloomberg သတင်းဌာနဲ့ အင်တာဗျုး မှာထည့်ပြောခဲ့တာပါ။

စင်ကာပူအနေနဲ့ မြန်မာနိုင်ငံဖြစ်စဉ်တွေနဲ့ပတ်သက်ပြီး လွှမ်းမိုးနိုင်မှု၊ စွမ်းဆောင်နိုင်မှုတွေကို အသုံးချပြီး ဝင်ပါတာမျိုး မလုပ်မှာဖြစ်သလို စေ့စပ်ညှိနှိုင်းမှုနဲ့ရင်ကြားစေ့မှုတွေရှိစေချင်တယ်လို့ ဆိုပါတယ်။

” ဒါပေမဲ့ မြန်မာ ပြည်သူတွေရော၊ နိုင်ငံရေး ရပ်ဝန်းရဲ့ နှစ်ဖက် အသိုက်အဝန်းကပါ စင်ကာပူရဲ့ ရပ်တည်မှုကို သေချာ နားလည်ထားပြီးသားပါ ” လို့စင်ကာပူနိုင်ငံခြားရေးဝန်ကြီးက ပြောပါတယ်။

Public Service Announcement

စင်ကာပူ ဟာစစ်ခေါင်းဆောင်ကို ကတိမတည်တာကြောင့် အာဆီယံထိပ်သီးအစည်းအဝေးကိုပေးမတက်ဖို့ ဆုံးဖြတ်ရာမှာ တက်တက်ကြွကြွပါဝင်ခဲ့တဲ့ နိုင်ငံဖြစ်ပါတယ်။

ဒါအပြင် လာမယ့် တနလာၤနေ့မှာ ပြုလုပ်မယ့် တရုတ် − အာဆီယံ ထိပ်သီးအစည်းအဝေး မှာ မင်းအောင်လှိုင်ကို တက်ခွင့်မပြုဘဲ အာဆီယံ ဆုံးဖြတ် ချက်အတိုင်းရပ်တည်တဲ့ နိုင်ငံတစ်နိုင်ငံလည်းဖြစ်ပါတယ်။

Bloomberg သတင်းဌာနဲ့ အင်တာဗျုးမှာတော့ မြန်မာနိုင်ငံမှာ ဖြစ်ပျက်နေတာတွေဟာ ဒီမိုကရေစီတိုးတက်ပြောင်းလဲရေးအတွက် သာမက ဆင်းရဲနွမ်းပါးမှုတွေ ပိုမိုးဆိုးရွားလာပြီး ကပ်ရောဂါကိုလည်း ကြုံနေရတာကြောင့် အကြီးအကျယ် စိတ်ပျက်စရာလို့ စင်ကာနိုင်ငံခြားရေးဝန်ကြီးက ပြောခဲ့ပါတယ်။

မြန်မာပြည်သူတွေ ကြုံတွေ့နေရတဲ့ စီးပွားရေး ၊လူသားရေးရာ ဘေးဒုက္ခတွေနဲ့ နာကျင်ထိခိုက်မှုတွေကို အဓိက စိတ်ပူနေရတယ်လို့လည်း ဝန်ကြီးက ထည့်ပြောခဲ့ပါတယ်။

မြန်မာနိုင်ငံအကျပ်အတည်းကို ကိုင်တွယ်ရာမှာ စင်ကာပူဟာအရေးပါတဲ့နေရာမှာရှိနေတယ်လို့ ပြီးခဲ့တဲ့ အောက်တိုဘာလအတွင်းက စင်ကာပူ ကိုသွားရောက်ခဲ့တဲ့ အမေရိကန် နိုင်ငံခြားရေး ဝန်ကြီးဌာန အတိုင်ပင်ခံ ဒဲရက်ချိုလေးက စင်ကာပူခရီးစဉ်အပြီးသတင်းစာရှင်းလင်းပွဲမှာ ပြောခဲ့တာရှိပါတယ်။