မကွေးတိုင်း မြိုင်မြို့နယ်တွင် ခြေလျင်စစ်ကြောင်းထိုးလာသည့် အကြမ်းဖက်စစ်ကောင်စီကို မိုင်းဆွဲတိုက်ခိုက်မှုများပြုလုပ်ခဲ့ရာ စစ်ကောင်စီတပ်သားခြောက်ဦးထက် မနည်းသေဆုံးကြောင်း ပြည်သူ့တော်လှန်ရေးတပ်မတော် (PRA) ဦးဆောင်သူ ဗိုလ်ဂျပန်က လူထုနွေဦးသို့ ပြောသည်။
တိုက်ပွဲ ဖြစ်စဥ်မှာ ဒီဇင်ဘာ ၉ ရက်ကဖြစ်ပြီး မြိုင်မြို့နယ်အတွင်း စစ်ကောင်စီ၏ စစ်ကြောင်းကို နှစ်ကြိမ်တိုင် တိုက်ခိုက်ခဲ့ခြင်းလည်း ဖြစ်သည်။
ကနဦး မိုင်းဆွဲတိုက်ခိုက်မှုကို ဒီဇင်ဘာ ၉ ရက် နံနက် ၄ နာရီခန့်က ကန်ကြီးတော-မင်းသားကျလမ်းမပေါ်တွင် မြိုင် PDFက ဆောင်ရွက်ခဲ့ပြီး စစ်သားလေးဦး ပြင်းထန်စွာဒဏ်ရာရရှိခဲ့သည်ဟု ဆိုသည်။
ထို့နောက် မြိုင်မြို့နယ် မင်းသားကျရွာ အထွက်တွင် ခြေလျင်တက်လာသည့် အကြမ်းဖက်စစ်ကောင်စီ တပ်သား ၆၀ ကျော်ကို ယမန်နေ့ နေ့လည် ၁ နာရီခွဲ ခန့်က PRA ဦးဆောင်၍ မိုင်းဆွဲတိုက်ခိုက်ခဲ့သည်။
Public Service Announcement
ထိုဖြစ်စဥ်တွင် အကြမ်းဖက်စစ်သား ခြောက်ဦးထက်မနည်းသေဆုံးသည်ကို ယနေ့(ဒီဇင်ဘာ ၁၀ ရက်) တွင် အတည်ပြုနိုင်ခဲ့ကြောင်း ဗိုလ်ဂျပန်က ဆိုသည်။
“မြိုင် နဲ့အနီးတစ်ဝိုက်မှာလည်း ကျွန်တော်တို့ တပ်ခွဲတွေရှိတယ်။ကြိုသတင်း ရတာလည်းပါတယ်။ ပခုက္ကူကနေပြီး ဒီဇင်ဘာ ၈ ရက်က စစ်ခွေးတွေမြိုင်ဘက်ကို ဆင်းလာမယ်ဆိုတာ။ဒါကြောင့် မိုင်းတွေ အဆင်သင့်ဆင်ပြီး တိုက်နိုင်ခဲ့တယ်”ဟု ၎င်းက ပြောသည်။
လက်ရှိတွင် တိုက်ပွဲကြောင့် မင်းသားကျရွာ အပါ အဝင် နီးစပ်ရာ ရွာလေးခု မှ ဒေသခံ ၈၀၀ခန့်ကို ပြည်သူ့တပ်ဖွဲ့များက ဘေးလွတ်ရာ ရွှေ့ပြောင်းနိုင်ရန် ကူညီခဲ့သည်။
