အစ္စရေးဟာ ကမ္ဘာပေါ်မှာ စတုတ္ထမြောက် Booster ဆေးထပ်ထိုးဖို့ ပထမဆုံး အကောင်အထည်ဖော်ခဲ့တဲ့ နိုင်ငံလည်း ဖြစ်ပါတယ်။ ကူးစက်မြန် Omicronမျိုးကွဲ ကူးစက်မှုတွေ စတင် အရှိန်ရလာချိန် ကတည်းက အစ္စရေးမှာ Pfizerနဲ့ Modernaတို့က ထုတ်လုပ်တဲ့ ကာကွယ်ဆေးတွေကို စတုတ္ထအကြိမ်မြောက်အဖြစ် ထိုးနှံစေခဲ့ပါတယ်။ mRNA နည်းပညာနဲ့ တီထွင်ထားတဲ့ ဒီဆေးတွေဟာ လက်ရှိ သုံးစွဲနေသမျှ ကိုဗစ် ကာကွယ်ဆေးတွေ အားလုံးထဲမှာ အစွမ်းအထက်ဆုံး အမျိုးအစားတွေလို့ အသိအမှတ်ပြု ခံထားရပါတယ်။
အဲဒီနောက်ပိုင်းမှာ ဆေးထိုးထားသူတွေဆီက ထွက်ပေါ်လာတဲ့ ကိုယ်ခံအား Antibody တုံ့ပြန်နိုင်စွမ်းကို အစ္စရေး သုတေသီတွေက လေ့လာခဲ့ကြပါတယ်။ ကနဦး တွေ့ရှိချက်တွေအရ စတုတ္ထအကြိမ် ကာကွယ်ဆေး ထပ်ထိုးထားသူတွေဟာ တတိယ တစ်လုံးသာ ထိုးရသူတွေထက် ပိုမိုကောင်းမွန်တဲ့ Antibody တည်ဆောက်မှုမျိုး ရှိနေကြောင်း အတည်ပြုနိုင်ခဲ့ပါတယ်။ ဒါပေမဲ့ အဲဒီပမာဏဟာ Omicron ကူးစက်မှုကို ထိထိရောက်ရောက် ကာကွယ်နိုင်လောက်တဲ့ထိ မလုံလောက်သေးဘူးလို့ ဆိုပါတယ်။
စတုတ္ထမြောက် ကာကွယ်ဆေး ထိုးလိုက်တဲ့ အခါမှာ တတိယ တစ်လုံးသာ ထိုးထားသူတွေထက် နည်းနည်း ပိုကောင်းတဲ့ Antibodyမျိုး ပိုင်ဆိုင်လာတာကိုတော့ အသိအမှတ် ပြုရမယ်လို့ လေ့လာမှုမှာ ဦးဆောင် ပါဝင်တဲ့ ဒေါက်တာ ရီဂျက်ဗ် ယိုချေက ဆိုပါတယ်။ ဒါပေမဲ့ ဒီလောက်နဲ့တော့ Omicronကို ဟန့်တားဖို့ မလုံလောက်သေးကြောင်း၊ အသုံးပြုတဲ့ ကာကွယ်ဆေးက အမျိုးအစား အရမ်းကောင်းရင်တောင် Omicron ကူးစက်မှုကို ကာကွယ်နိုင်မယ့် Antibody ပမာဏ တောင်းဆိုမှုက အရမ်း မြင့်မားနေတာ ပြဿနာ တစ်ခုအဖြစ် ဆက်ရှိနေကြောင်း သူက ရှင်းပြပါတယ်။
ကမ္ဘာ့ကျန်းမာရေး အဖွဲ့ကြီး (WHO)ကတော့ Omicronဟာ အရင်မျိုးကွဲဟောင်း ကိုရိုနာ ဗိုင်းရပ်စ်တွေနဲ့ ယှဉ်ရင် ကူးစက်နှုန်း အရမ်းမြန်လာပေမယ့် သေဆုံးနိုင်ခြေ အချိုးအစားကတော့ သိသိသာသာ လျော့ကျသွားနိုင်ကြောင်း မှတ်ချက် ပေးထားပါတယ်။ ပြီးတော့ ကူးစက်မှုကို အပြည့်အဝ မတားဆီးနိုင်ဘူး ဆိုရင်တောင် Omicronကြောင့် ရောဂါ ပြင်းထန်နိုင်ခြေကို လျော့ကျသွားစေတဲ့အတွက် အခွင့်အရေးရရင် ကာကွယ်ဆေး မပျက်မကွက် ထိုးကြဖို့လည်း WHOက တိုက်တွန်း အကြံပြုထားပါတယ်။