ကျင်းပဆဲ အမျိုးသားအတိုင်ပင်ခံကောင်စီ (NUCC ) ရဲ့ညီလာခံမှာ အတည်ပြုမယ့် ဖက်ဒရယ်ပဋိဉာဉ်ဟာ နွေဦးတော်လှန်ရေးအတွက် မီးရှုးသဖွယ် ရှေ့ဆောင်လမ်းပြဖြစ်လာမယ်လို့ NUG ရဲ့ ယာယီသမ္မတ ဒူဝါလရှီလ က ဒီနေ့စတင်ကျင်းပတဲ့ညီလာခံဖွင့်ပွဲမှာပြောလိုက်ပါတယ်။
ညီလာခံမှာဆိုရင် မြန်မာနိုင်ငံရဲ့အဓိက အရင်းခံပြဿနာတွေရဲ့ရေသောက်မြစ်ကိုဖြေရှင်းနိုင်ဖို့အတွက် ရေးဆွဲထားတဲ့ ဖက်ဒရယ်ပဋိဉာဉ်ကိုအတည်ပြုမှာဖြစ်ပါတယ်။
ဒီပဋိဉာဉ်ကိုအတည်ပြုရတာဟာ စစ်အာဏာရှင်စနစ်ချုပ်ငြိမ်းဖို့ ၊ ၂၀၀၈ အခြေခံဥပဒေကိုအပြီးတိုင်ဖျက်သိမ်းဖို့ ၊ ဖက်ဒရယ်ဒီမိုကရေစီပြည်ထောင်စုပေါ်ထွန်းဖို့၊အရပ်သားအစိုးရ ပေါ်ပေါက်ဖို့အတွက်ဖြစ်တယ်လို့ ယာယီသမ္မတ ဒူဝါလရှီလက ရှင်းပြပါတယ်။
ဒါအပြင် ညီလာခံမှာ NUG အစိုးရ ဆောင်ရွက်ခဲ့တဲ့ အချက်တွေကို တင်ပြမယ်လို့သိရပါတယ်။
အခုကျင်းပနေတဲ့ NUCC ရဲ့ညီလာခံဟာဆိုရင် နွေဦးတော်လှန်ရေးမှာပါဝင်တဲ့ တိုင်းရင်းသားလက်နက်ကိုင်အင်အားစုတွေ ၊ လွှတ်တော်ကိုယ်စာလှယ်တွေ ၊စစ်အာဏာရှင်ဆန့်ကျင်ရေးအင်အားစုတွေ ၊သပိတ်တွေ ၊ CDM တွေ၊အရပ်ဖက်အဖွဲ့အစည်းတွေ ပါဝင်ကြတာပါ။