ကယ်လီဖိုးနီးယား ပြည်နယ်ကို တစ်ပတ်ကြာလောက် သွားရောက်ခဲ့တဲ့ ခရီးစဉ်အပြီး အမေရိကန် ဒုတိယ သမ္မတ ကာမာလာ ဟားရစ်ဟာ ကိုဗစ်ရောဂါ ကူးစက် ခံခဲ့ရပါတယ်။
ဟားရစ်က သူဟာ ဆေးစစ်ကြည့်တဲ့ အချိန်မှာ ကိုဗစ်ရောဂါ ဖြစ်နေတယ်ဆိုတဲ့ Positive အဖြေ ထွက်ခဲ့ကြောင်း၊ ဒါပေမဲ့ ရောဂါလက္ခဏာတွေ ပြသတာမျိုး မရှိကြောင်း Twitterမှာ ရေးသားခဲ့ပါတယ်။ သူ့အနေနဲ့ ကာကွယ်ဆေးတွေ၊ Booster အားဖြည့်ဆေးတွေ ထိုးထားမိတာကို ကျေးဇူးတင်ရမယ်လို့လည်း ဟားရစ်က မှတ်ချက် ပေးထားပါတယ်။
ဒုတိယ သမ္မတရဲ့ ပြန်ကြားရေး တာဝန်ခံ ခရစ္စတန် အလန်က ဟားရစ်ဟာ ဆေးစစ်အဖြေ Positive ထွက်ပေါ်ပြီးတာနဲ့ ကျန်းမာရေး ဌာနရဲ့ ညွှန်ကြားချက်တွေနဲ့အညီ သီးသန့်ခွဲခြား နေထိုင်ပြီး လုပ်ငန်းတာဝန်တွေကိုလည်း အိမ်မှာနေရင်းပဲ လုပ်ဆောင်သွားမယ်လို့ ပြောကြားခဲ့ပါတယ်။
ဟားရစ်ဟာ သမ္မတ ဂျိုးဘိုင်ဒန်၊ သမ္မတကတော် ဂျီလ်ဘိုင်ဒန်တို့နဲ့ လတ်တလော အနီးကပ် ထိတွေ့ထားတာမျိုး မရှိဘူးလို့လည်း အလန်က အတည်ပြုခဲ့ပါတယ်။ ဟားရစ်ဟာ ဆေးစစ်ရလဒ် Negative ပြန်မဖြစ်မချင်း ရုံးမတက်ဘူးလို့လည်း သိရပါတယ်။
Public Service Announcement
ဟားရစ်ဟာ ရောဂါမပြင်းထန်ပေမယ့်လည်း ဗိုင်းရပ်စ် တိုက်ဖျက် ဆေးဝါး Paxlovid ကုထုံးနဲ့ ကုသမှု ခံယူသွားမယ်လို့လည်း ဒုတိယ သမ္မတရဲ့ ရုံးအဖွဲ့က ထုတ်ပြန်ပါတယ်။ ပြီးခဲ့တဲ့ သီတင်းပတ်က ဟားရစ်နဲ့အတူ အိမ်ဖြူတော်က ဝန်ထမ်းတချို့ပါ ကယ်လီဖိုးနီးယားကို လိုက်ပါသွားခဲ့ကြတယ်လို့ ဆိုပါတယ်။ ဒုတိယ သမ္မတ အနေနဲ့ ဘယ်လိုဘယ်ပုံ ရောဂါ ကူးစက်ခဲ့သလဲ ဆိုတာကိုတော့ ရှင်းရှင်းလင်းလင်း မသိရသေးပါဘူး။
ဟားရစ်ရဲ့ ဆေးစစ်ရလဒ်အကြောင်း သတင်းကြားပြီးတဲ့နောက် သမ္မတ ဘိုင်ဒန်က ဖုန်းဆက်ပြီး သတင်းမေးခဲ့တယ်လို့လည်း အိမ်ဖြူတော်က ထုတ်ပြန် ကြေညာသွားပါတယ်။
