ထိုင်းနဲ့ ကမ္ဘောဒီးယား နယ်စပ်မှာ ကာစီနို ဟိုတယ်တစ်လုံး မီးလောင်မှုကြောင့် လူ ၁၁ ဦးထက်မနည်း သေဆုံးခဲ့ကြောင်း သိရပါတယ်။
နှစ်နိုင်ငံ နယ်စပ်နားက ကမ္ဘောဒီးယားပိုင် ဖွိုင်ဖက်မြို့မှာ ဖွင့်လှစ်ထားတဲ့ ဟိုတယ်မှာ ဒီဇင်ဘာ ၂၈ ရက် ညသန်းခေါင်ယံ မတိုင်ခင် အပြင်းအထန် မီးလောင်မှု ဖြစ်ခဲ့တာပါ။ Grand Diamond ဟိုတယ်မှာ မီးလောင်ခဲ့တဲ့နောက် အထပ်မြင့်ကနေ လူတွေ သွေးရူးသွေးတမ်း ခုန်ချပြီး သေဆုံးတာတွေလည်း ရှိခဲ့ပါတယ်။
ဖွိုင်ဖက်ဟာ ထိုင်း-ကမ္ဘောဒီးယား ကုန်သွယ်ရေး နယ်စပ်ဂိတ် တည်ရှိရာ မြို့တစ်ခုဖြစ်ပြီး ကာစီနိုရုံတွေ အများအပြား ဖွင့်လှစ်ထားပါတယ်။ ထိုင်းနိုင်ငံမှာ လောင်းကစားနဲ့ ပတ်သက်ရင် ဥပဒေတွေ တင်းကျပ်တာကြောင့် နယ်စပ်ဖြတ်ကျော်ပြီး ဖွိုင်ဖက်ကို သွားရောက်တဲ့ ထိုင်းနိုင်ငံသားတွေ စည်ကားနေလေ့ ရှိပါတယ်။ အခု မီးလောင်မှု ဖြစ်ချိန်မှာလည်း ဟိုတယ်ထဲမှာ ထိုင်းနိုင်ငံသား တော်တော်များများ ရှိနေတယ်လို့ ဆိုပါတယ်။
မီးသတ် တပ်ဖွဲ့တွေရဲ့ အဆိုအရ ထိုင်းနိုင်ငံသား ၇၀၀ နီးပါးလောက်ကို ဟိုတယ်ထဲက ကယ်ထုတ်ပြီး ထိုင်းဖက်ခြမ်းက ဆေးရုံတွေဆီ ပို့ဆောင်ပေးခဲ့ရတယ်လို့ သိရပါတယ်။ မီးလောင်မှုအတွင်း ထိခိုက် ဒဏ်ရာရရှိမှု အရေအတွက်ကိုတော့ မသိရသေးပါဘူး။ ခုန်ချသူတွေထဲမှာ ၂ ဦးက ပွဲချင်းပြီး သေဆုံးပြီး နောက်ထပ် ၅ ယောက်လောက်က ခြေထောက်တွေ ကျိုးကုန်တယ်လို့ ကယ်ဆယ်ရေး အဖွဲ့ဝင် တစ်ဦးက ပြောပါတယ်။
Public Service Announcement
ကမ္ဘောဒီးယား မီးသတ်တပ်ဖွဲ့က ကရိန်းတွေနဲ့ လာကယ်မယ်ထင်လို့ လူတွေက အဆောက်အအုံ အမိုးပေါ် တက်ပြေးခဲ့ကြောင်း၊ ဒါပေမဲ့ မီးသတ်တပ်ဖွဲ့မှာ ကရိန်း တစ်စင်းမှ မရှိခဲ့ကြောင်းလည်း မြို့ခံ တစ်ဦးက ပြောပါတယ်။ မီးလောင်မှု ဖြစ်ပွားချိန်မှာ လေတိုက်ခတ်မှုလည်း ပြင်းထန်နေတာကြောင့် မီးကူးစက်မှုကို ပိုမို မြန်ဆန်စေခဲ့ကြောင်း သိရပါတယ်။
မီးစတင်လောင်ကျွမ်းတဲ့ အကြောင်းရင်းကိုတော့ မသိရသေးဘဲ စုံစမ်းမှုတွေ ဆက်လက် လုပ်ဆောင်နေဆဲလို့ ဖွိုင်ဖက်မြို့နယ် ရဲတပ်ဖွဲ့က ပြောပါတယ်။ မီးငြှိမ်းဖို့အတွက် မီးသတ် ဝန်ထမ်း ၃၀၀ လောက်နဲ့ မီးသတ်ကား ၁၁ စီး၊ ရဟတ်ယာဉ် တချို့ကိုပါ အသုံးပြုခဲ့ရပါတယ်။
ဟိုတယ်ရဲ့ ဖွဲ့စည်းပုံအရ စင်္ကြန်လမ်းတွေက ကျဉ်းမြောင်းပြီး ရှုပ်ထွေးတာကြောင့်လည်း ဧည့်သည်တွေ လွတ်မြောက်အောင် ထွက်ပြေးရာမှာ အခက်အခဲတွေ ရှိခဲ့တယ်လို့ ယုံကြည်ရကြောင်း စုံစမ်းစစ်ဆေးရေး အရာရှိတွေက မှတ်ချက် ပေးထားပါတယ်။
