ထိုင်းမှာ ဗင်ကား တိမ်းမှောက်ပြီး မီးလောင်တာကြောင့် ကလေးတွေ အပါအဝင် ၁၁ ဦးသေ

ထိုင်းနိုင်ငံမှာ ဆိုးရွားတဲ့ ယာဉ်မတော်တဆမှု တစ်ခုဖြစ်ပြီး ကားမီးလောင်ရာက ကလေးတွေ အပါအဝင် လူ ၁၁ ဦး အသက်ဆုံးရှုံးခဲ့ရပါတယ်။

ထိုင်းနိုင်ငံမှာ တရုတ်နှစ်သစ်ကူးကာလ ခရီးသွားတဲ့ မိသားစု တစ်ခုဟာ အခုလို ဖြစ်ရပ်ဆိုးနဲ့ ကြုံခဲ့တာလို့ ယာဉ်ထိန်းရဲ ဌာနက ဇန်နဝါရီ ၂၃ ရက်မှာ ထုတ်ပြန်ပါတယ်။ အဲဒီ ဗင်ကားဟာ ပြီးခဲ့တဲ့ သီတင်းပတ်ကုန်က နိုင်ငံ အနောက်ပိုင်းမှာရှိတဲ့ အမ်နတ် ချာရုန်း ဒေသကနေ မြို့တော် ဘန်ကောက်ဆီ ဦးတည် မောင်းနှင်နေရင်း လမ်းချော် တိမ်းမှောက်မှု ဖြစ်ခဲ့တာပါ။

ဗင်ကား တိမ်းမှောက်ပြီးတာနဲ့ ချက်ချင်းလိုလို မီးထလောင်တာကြောင့် ခရီးသည်တွေ ပိတ်မိပြီး မီးလောင် သေဆုံးကုန်တာလို့ ကယ်ဆယ်ရေးတွေက ပြောပါတယ်။ ကားပေါ်မှာ လိုက်ပါလာသူ ၁၂ ဦးအနက် အသက် ၂၀ အရွယ် တက္ကသိုလ်ကျောင်းသား လူငယ် တစ်ယောက်ပဲ ကားမှန်ပြတင်းပေါက်ကို ကန်ဖွင့်ပြီး ထွက်ပြေး လွတ်မြောက်နိုင်ခဲ့ပါတယ်။ သေဆုံးသူ ၁၁ ဦးမှာ ၂ ဦးက ကလေးငယ်တွေလို့ သိရပါတယ်။

တစ်ဦးတည်း အသက်ရှင် ကျန်ခဲ့တဲ့ သာနာချစ် ကင်ကာဝူက သူဟာ အိပ်ပျော်နေရာက ရုတ်တရက် လန့်နိုးခဲ့တာ ဖြစ်ကြောင်း၊ ဘာဖြစ်သွားသလဲ ဆိုတာကို ရုတ်တရက် မသိလိုက်ပေမယ့် ကားက တိမ်းမှောက်နေတယ် ဆိုတာကို သတိထားမိလိုက်ကြောင်း၊ နောက်တော့ ကားနောက်ပိုင်းမှာ စတင်ပြီး မီးစွဲလောင်ခဲ့ကြောင်း ရှင်းပြပါတယ်။

Public Service Announcement

သာနာချစ်ဟာ ကားမှန်ပြတင်းပေါက်တွေကို သွေးရူးသွေးတမ်း ကန်ကျောက်ပြီး အပေါက်ငယ်လေး တစ်ခုကနေ တိုးထွက်နိုင်ခဲ့ပါတယ်။ သူအပြင်ရောက်တာနဲ့ ကားတစ်စီးလုံးကို လျင်လျင်မြန်မြန် မီးကူးစက် လောင်ကျွမ်းသွားတာကြောင့် အထဲမှာ ပိတ်မိနေသူတွေကို မကယ်နိုင်ခဲ့ပါဘူး။

ကယ်ဆယ်ရေး အဖွဲ့ဝင် တစ်ဦးဖြစ်တဲ့ နစ်ခွမ်ဆူယန်ကလည်း ဗင်ကားဟာ တိမ်းမှောက်ပြီး မကြာခင်မှာပဲ ပေါက်ကွဲပြီး မီးလောင်သွားခဲ့တာလို့ ပြောပါတယ်။ ကိစ္စအားလုံးဟာ စက္ကန့် ၃၀ လောက်အတွင်း ဖြစ်ပျက်သွားခဲ့တယ်လို့ ယုံကြည်ရကြောင်း နစ်ခွမ်က ဆိုပါတယ်။

ဗင်ကားဟာ လောင်စာဆီရော၊ ဖိအားပေး ဓာတ်ငွေ့နဲ့ပါ နှစ်မျိုးမောင်းနှင်နိုင်တဲ့ အမျိုးအစား ဖြစ်ပေမယ့် ဓာတ်ငွေ့အိုး ယိုစိမ့်တဲ့ အထောက်အထား မတွေ့ရတာကြောင့် ဓာတ်ဆီကနေတဆင့် မီးလောင်တယ်လို့ ရဲတွေက ယူဆထားပါတယ်။ အဝေးပြေး လမ်းပေါ်မှာ အဲဒီကားက ရုတ်တရက် လမ်းကြောင်းပြောင်း တိမ်းမှောက်သွားတဲ့ အကြောင်းရင်းကိုတော့ ရဲတွေက ဆက်ပြီး စုံစမ်းနေဆဲ ဖြစ်ပါတယ်။

ထိုင်းက အဝေးပြေး လမ်းမတွေမှာ လုံခြုံရေး အစီအမံ အားနည်းချက်တွေ ရှိနေတာကြောင့် ဆိုးရွားတဲ့ ယာဉ်မတော်တဆမှု သတင်းတွေကို ရံဖန်ရံခါ ကြားရလေ့ ရှိကြောင်းလည်း သိရပါတယ်။