NGO အဖွဲ့အစည်း တစ်ခုဖြစ်တဲ့ National Geographic Societyက ကမ္ဘာပေါ်မှာ သမုဒ္ဒရာကြီး လေးစင်းအစား၊ ငါးစင်းအဖြစ် ဇွန်လ ၈ ရက်မှာ ပြောင်းလဲ သတ်မှတ်လိုက်ကြောင်း အတည်ပြုခဲ့ပါတယ်။
အသစ်တိုးလာတဲ့ သမုဒ္ဒရာကို တောင်သမုဒ္ဒရာလို့ ခေါ်ဝေါ်ပြီး အန္တာတိကတိုက် ပတ်ပတ်လည် ရေပြင်ကို ရည်ညွှန်း သတ်မှတ်ထားတာပါ။ အဲဒီရေပြင်ဟာ သီးခြားတည်ရှိတယ်လို့ ယူဆသင့်ကြောင်း National Geographic Societyက ဆိုပါတယ်။
အရင်က ကမ္ဘာတလွှားမှာ အတ္တလန္တိတ်၊ ပစိဖိတ်၊ အိန္ဒိယနဲ့ အာတိတ် သမုဒ္ဒရာကြီး လေးစင်း ရှိတယ်လို့ပဲ ခွဲခြား သတ်မှတ်ထားတာပါ။ National Geographic Societyက တောင်သမုဒ္ဒရာဟာ အန္တာတိကတိုက်ကို ဝန်းရံထားတဲ့ ရေစီးကြောင်းတွေနဲ့ ဖွဲ့စည်းထားပြီး သမုဒ္ဒရာ တစ်စင်းရဲ့ ကိုယ်ပိုင် ဝိသေသတွေ ပိုင်ဆိုင်ထားကြောင်း ပြောပါတယ်။
တောင်သမုဒ္ဒရာ သီးခြားရှိသင့်တာကို သိပ္ပံပညာရှင်တွေက ကာလရှည်ကြာ ထောက်ခံခဲ့ပေမယ့် နိုင်ငံတကာ အသိအမှတ်ပြုမှုမျိုးတော့ မရရှိဘဲ ကြန့်ကြာနေခဲ့တာဖြစ်ကြောင်း National Geographic Societyရဲ့ ပထဝီဝင် ပညာရှင် အဲလက်စ်တိတ်ထ်က ပြောပါတယ်။
ကမ္ဘာ့ သားရိုင်းတိရစ္ဆာန် ရန်ပုံငွေအဖွဲ့ (WWF)ကတော့ တောင်သမုဒ္ဒရာရဲ့ ရေပြင် အနေအထားဟာ အန္တာတိကတိုက် တစ်ခုလုံးရဲ့ ဂေဟစနစ်ကို သီးခြား ဖန်တီး ထောက်ပံ့ပေးနေတယ်လို့ သုံးသပ်ပါတယ်။ ပင်ဂွင်းငှက်တွေ၊ ဖျံတွေ၊ ဝေလငါးတွေအပြင် ရေနေ သက်ရှိတွေ အမြောက်အမြားအတွက် ကြွယ်ဝတဲ့ အစာရင်းမြစ်ကို ဒီသမုဒ္ဒရာက ဖန်တီးပေးထားတယ်လို့ ဆိုပါတယ်။ တောင်သမုဒ္ဒရာဟာ ကမ္ဘာ့သမုဒ္ဒရာကြီး ငါးစင်းထဲမှာ ဖွဲ့စည်းပုံသက်တမ်း အနုနယ်ဆုံးလို့လည်း သိရပါတယ်။