Moderna ကုမ္ပဏီက ထုတ်လုပ်တဲ့ Covid-19 ကာကွယ်ဆေး အလုံးရေ ၁.၆ သန်းကျော်ကို ဂျပန် အစိုးရက သုံးစွဲခွင့် ဆိုင်းငံ့ထားလိုက်ကြောင်း သိရပါတယ်။
အမေရိကန် ကုမ္ပဏီ Moderna ရဲ့ဆေးဟာ လက်ရှိ စျေးကွက်ထဲက Covid-19 ကာကွယ်ဆေးတွေထဲမှာ အစွမ်းအထက်ဆုံး အမျိုးအစား တစ်ခုအဖြစ် သတ်မှတ် ခံထားရပါတယ်။ ဒါပေမဲ့ ဆေးထဲမှာ လူသားတွေအတွက် မသင့်တော်တဲ့ ဓာတ်ပစ္စည်းတချို့ ရောနှော ပါဝင်နေနိုင်တယ်လို့ ယူဆတဲ့အတွက် ဂျပန်မှာ အသုံးပြုခွင့် ဆိုင်းငံ့ထားလိုက်တာပါ။
Moderna ရဲ့ ထိုးဆေး ၅ သိန်း ၆ သောင်းလောက်မှာ ကာကွယ်ဆေးနဲ့ တိုက်ရိုက် မသက်ဆိုင်တဲ့ ပြင်ပ ဓာတ်ပစ္စည်းတွေ ရောနှော ပါဝင်နေနိုင်တယ်လို့ ဂျပန် ကျန်းမာရေး ဝန်ကြီးဌာနက ကြေညာပါတယ်။ အမေရိကန်ကနေ ဆေးဝါး မှာယူပြီး ပြန်လည် ရောင်းချပေးနေတဲ့ တာဂီဒါ ဆေးဝါးကုမ္ပဏီက Moderna ဆီက ဆေးတွေကို သုံးသုတ်ခွဲ ဝယ်ယူထားကြောင်း၊ အဲဒီထဲက တစ်သုတ်ကို စစ်ဆေးတဲ့အခါ အခုကိစ္စမျိုး ကြုံလာတာဖြစ်ကြောင်း ပြောပါတယ်။
ကျန်းမာရေး ဝန်ကြီးဌာနက Moderna ရဲ့ ကာကွယ်ဆေး အလုံးရေ ၁.၆၃ သန်းလောက်ကို အသုံးပြုခွင့် ဆိုင်းငံ့ထားစေမယ်လို့ အတည်ပြုခဲ့ပါတယ်။ ဒီပြဿနာမျိုး စပိန်မှာလည်း ကြုံတွေ့ခဲ့ပေမယ့် အသေးစိတ် ထုတ်ပြန်တာမျိုးတော့ မရှိခဲ့ပါဘူး။
Public Service Announcement
Moderna ကတော့ လက်ရှိ အချိန်ထိ သူတို့ ကာကွယ်ဆေးရဲ့ ဘေးအန္တရာယ် ကင်းရှင်းမှုနဲ့ အာနိသင် ထိရောက်မှု အပိုင်းတွေမှာ ဘယ်လို ကြီးကြီးမားမား အမှားအယွင်းမှ မတွေ့သေးဘူးလို့ ဖြေရှင်းထားပါတယ်။ တာကီဒါ ကုမ္ပဏီက Moderna ရဲ့ ကာကွယ်ဆေးထဲမှာ ဘယ်လို ပြင်ပ ဓာတ်ပစ္စည်းမျိုး ရောနှောနေသလဲ ဆိုတာကိုတော့ ထုတ်မပြောသေးပါဘူး။
ဂျပန်ဟာ လတ်တလောမှာ Covid-19 ရောဂါ ကူးစက်မှုတွေ တဟုန်ထိုး မြင့်တက်လာတဲ့ အခြေအနေနဲ့ ရင်ဆိုင်နေရပါတယ်။ ဂျပန် လူဦးရေရဲ့ ၄၀ ရာခိုင်နှုန်းလောက်သာ ကာကွယ်ဆေး နှစ်ကြိမ် အပြည့် ထိုးထားပြီး တစ်ကြိမ်သာ ထိုးထားသူ ၅၀ ရာခိုင်နှုန်းလောက် ရှိနေကြောင်း သိရပါတယ်။
