စီးပွားရေး လုပ်ငန်းကြီးတွေအပေါ် အမြတ်ခွန် အနည်းဆုံး ၁၅ ရာခိုင်နှုန်း ကောက်ခံ စည်းကြပ်ဖို့အတွက် G20 အဖွဲ့ဝင် နိုင်ငံ ခေါင်းဆောင်တွေ သဘောတူခဲ့ကြပါတယ်။
ကမ္ဘာ့စီးပွားရေး အင်အားကြီး ၁၉ နိုင်ငံနဲ့ ဥရောပ သမဂ္ဂတို့ ပါဝင် ဖွဲ့စည်းထားတဲ့ G20 ညီလာခံကို အီတလီနိုင်ငံ၊ ရောမမြို့မှာ ကျင်းပခဲ့ပြီး နိုင်ငံခေါင်းဆောင် တော်တော်များများ စုံညီ တက်ရောက်ခဲ့ကြပါတယ်။ ဒါဟာ ကပ်ရောဂါ ကူးစက်မှုတွေ စတင်ပြီးနောက်ပိုင်း ပထမဆုံး အကြိမ်အဖြစ် လူချင်းတွေ့ဖြစ်ကြတာပါ။ ဒါပေမဲ့ ရုရှား သမ္မတ ဗလာဒီမာ ပူတင်နဲ့ တရုတ် သမ္မတ ရှီကျင့်ဖျင်တို့ကတော့ အွန်လိုင်းကနေပဲ ချိတ်ဆက်ပြီး အစည်းအဝေး တက်ခဲ့ကြပါတယ်။
ကမ္ဘာတလွှားမှာ နိုင်ငံတကာ စီးပွားရေး လုပ်ငန်းစုကြီးတွေက အခွန်နှုန်း လျှော့ပေါ့ထားတဲ့ နိုင်ငံတွေဆီ ပြောင်းရွှေ့ပြီး ရင်းနှီးမြှုပ်နှံတာတွေ ပိုထူပြောလာမှာကို စိုးရိမ်မှုတွေ ရှိနေချိန်မှာ အခုလိုမျိုး G20 သဘောတူညီချက် ထွက်ပေါ်လာာတာ ဖြစ်ပါတယ်။
အမေရိကန်က စတင် အဆိုပြုတဲ့ အဲဒီသဘောတူညီမှုကို နိုဝင်ဘာ ၁ ရက်မှာ အတည်ပြုပြီး ၂၀၂၃ ခုနှစ်လောက်မှာ စတင် ကျင့်သုံးလာဖွယ် ရှိနေပါတယ်။ အမေရိကန် ဘဏ္ဍာရေးဝန်ကြီး ဂျဲနတ် ယယ်လန်ကတော့ ဒီလို သမိုင်းဝင် သဘောတူညီမှုဟာ ကမ္ဘာ့စီးပွားရေး ကဏ္ဍ တစ်ခုလုံးအတွက် အရေးပါတဲ့ အခိုက်အတန့်တစ်ခု ဖြစ်လာစေတယ်လို့ ပြောပါတယ်။
အမေရိကန်မှာလည်း နိုင်ငံတကာ စီးပွားရေး လုပ်ငန်းကြီးတွေက အခွန်နှုန်း တိုးမြှင့်ပေးရမှာဖြစ်ပြီး ပြည်တွင်း ကုမ္ပဏီတွေနဲ့ လုပ်သားတွေအတွက် အကျိုးဖြစ်ထွန်းစေမယ်လို့ ယယ်လန်က Twitterမှာ ရေးသားထားပါတယ်။
အိမ်ရှင်နိုင်ငံဖြစ်တဲ့ အီတလီရဲ့ ဝန်ကြီးချုပ် မာရီယို ဒရာဂီက G20ဟာ ပေါင်းစည်းမှုရဲ့ သင်္ကေတ ပြယုဂ်တစ်ခု ဖြစ်ရုံသာ မကဘဲ ကမ္ဘာ့ခေါင်းဆောင်တွေကြားက ကွဲပြားမှုတွေကိုပါ ကျော်လွှားပေါင်းကူးပြတဲ့ ဆွေးနွေးပွဲမျိုး ဖြစ်မယ်လို့ ပြောကြားခဲ့ပါတယ်။
အခုနှစ် G20 ညီလာခံမှာ ကမ္ဘာ့ရာသီဥတု ပြောင်းလဲမှု ပြဿနာနဲ့ ကိုဗစ်ကပ်ရောဂါ ကိစ္စတွေကိုလည်း ထည့်သွင်း ဆွေးနွေးခဲ့ကြပါတယ်။ ဒါ့အပြင် အဖွဲ့ဝင် နိုင်ငံတွေ စုပေါင်းပြီး အီရန်အနေနဲ့ နျူကလီးယား ထိန်းချုပ်ရေး သဘောတူညီချက်အတွက် ဆွေးနွေးမှုတွေ ပြန်လည် စတင်ဖို့လည်း ကြေညာချက် ထုတ်ပြန် တိုက်တွန်းခဲ့ကြောင်း သိရပါတယ်။