ကွန်ဂိုနိုင်ငံမှာ လူစည်ကားနေတဲ့ စျေးတစ်ခုထဲ လျှပ်စစ်ဓာတ်ကြိုး ပြတ်ကျပြီး ၂၆ ဦးထက်မနည်း ဓာတ်လိုက် သေဆုံးသွားကြောင်း သိရပါတယ်။
ဖေဖော်ဝါရီ ၁ ရက်က မြို့တော် ကင်ရှာဆာမှာရှိတဲ့ စျေးတစ်ခုထဲမှာ ဗို့အား အရမ်းများတဲ့ ဓာတ်ကြိုး ပြတ်ကျခဲ့တာ ဖြစ်ပါတယ်။ အဲဒီ ဓာတ်ကြိုးဟာ နေအိမ်တွေပေါ်ကိုရော၊ စျေးဆိုင်တွေနဲ့ စျေးဝယ်သူတွေ အပေါ်ကိုပါ ကန့်လန့်ဖြတ် ပြတ်ကျခဲ့တာလို့ မျက်မြင်တွေက ပြောပါတယ်။
လူမှု ကွန်ရက်တွေပေါ် တင်ထားတဲ့ ဗီဒီယိုတွေမှာတော့ စျေးလမ်းပေါ်က ဗွက်အိုင်တွေထဲမှာ အသက်မဲ့ ခန္ဓာကိုယ်တွေ လဲကျနေတာကို တွေ့ရပါတယ်။ ဓာတ်ကြိုး ဘာကြောင့် ပြတ်ကျခဲ့သလဲ ဆိုတာကိုတော့ အကြောင်းရင်း သေချာ မသိရသေးပါဘူး။
ကွန်ဂို အမျိုးသား လျှပ်စစ် ကော်ပိုရေးရှင်းကတော့ ဓာတ်ကြိုး သွယ်တန်းထားရာ တစ်နေရာရာကို မိုးကြိုးပစ်ချလို့ မြေပေါ် ကျဆင်းလာတာ ဖြစ်နိုင်ကြောင်း မှတ်ချက် ပေးထားပြီး သေဆုံးသူတွေရဲ့ မိသားစုတွေနဲ့ ထပ်တူ ဝမ်းနည်းကြောင်း ထုတ်ပြန်ခဲ့ပါတယ်။
Public Service Announcement
ရဲတပ်ဖွဲ့က စျေးထဲကို ဓာတ်ကြိုး ပြတ်ကျတဲ့ ဖြစ်စဉ်မှာ လူပေါင်း ဒါဇင်နဲ့ချီ သေဆုံးကြောင်း ပြောပေမယ့် အသေးစိတ် အချက်အလက်တွေကိုတော့ မကြေညာခဲ့ပါဘူး။ ဒေသခံ မီဒီယာတွေကတော့ သေဆုံးသူ အများစုဟာ စျေးရောင်းနေတဲ့ အမျိုးသမီးတွေ ဖြစ်တယ်လို့ ဖော်ပြထားပါတယ်။
သေဆုံးသူတွေရဲ့ ရုပ်အလောင်းတွေကို ရင်ခွဲရုံဆီ သယ်ယူပြီး မှုခင်းဆိုင်ရာ စစ်ဆေးမှုတွေ ပြုလုပ်သွားမှာ ဖြစ်ပါတယ်။ မျက်မြင်တွေရဲ့ အဆိုအရ အဲဒီစျေးဟာ မိုးရွာရင် ရေဝပ်ပြီး ရွှံ့ဗွက်တွေ ထူထပ်နေလေ့ ရှိတယ်လို့လည်း သိရပါတယ်။
