နာမည်ကြီး သတင်းဌာန တစ်ခုဖြစ်တဲ့ Bloombergဟာ ယူကရိန်းကို ရုရှားက ဝင်ရောက် တိုက်ခိုက်ပြီဆိုတဲ့ သတင်းကို မှားယွင်းပြီး ဖော်ပြမိခဲ့ပါတယ်။
ဖေဖော်ဝါရီ ၅ ရက်မှာ Bloombergရဲ့ စာဖတ်သူတွေက သတင်းဌာန ဝက်ဘ်ဆိုက်ပေါ်မှာ အထိတ်တလန့် ဖြစ်လောက်စရာ ခေါင်းစဉ်တစ်ခုကို ရှာတွေ့ခဲ့ပါတယ်။ အဲဒါကတော့ “တိုက်ရိုက် တင်ဆက်မှု – ယူကရိန်းကို ရုရှား၏ ကျူးကျော်မှု”ဆိုတဲ့ ခေါင်းစဉ်ပါပဲ။
Bloomberg သတင်းဌာန ဝက်ဘ်ဆိုက်ရဲ့ စာမျက်နှာမှာ အဲဒီသတင်းခေါင်းစဉ်ဟာ နာရီဝက်လောက်ကြာအောင် ရှိနေပြီးမှ ပြန်ဖြုတ်ချသွားခဲ့ပါတယ်။ သတင်းထဲကို ဝင်ဖတ်ကြည့်ရင်တော့ ဘာစာမှ မတွေ့ရဘဲ Error တက်နေခဲ့ပါတယ်။
ယူကရိန်းနဲ့ နယ်စပ်အနီးတဝိုက်မှာ ရုရှားစစ်သည် သိန်းဂဏန်းလောက် ဖြန့်ကျက်ထားပြီး ကျူးကျော်စစ်က နေ့ဖြစ်မလား၊ ညဖြစ်မလား စိတ်ပူနေရချိန်မှာ Bloombergရဲ့ သတင်းကြောင့် ပိုပြီး အထိတ်တလန့် ဖြစ်ခဲ့ရပါတယ်။
Public Service Announcement
နောက်ပိုင်းမှာတော့ Bloombergက ဒါဟာ လွဲချော်မှု တစ်ခုသာ ဖြစ်တယ်လို့ ပြန်လည် ဝန်ခံ ဖြေရှင်းခဲ့ပါတယ်။ အခြေအနေ အပြောင်းအလဲ တစ်ခုခု ဖြစ်ပေါ်လာရင် ချက်ချင်း ဝက်ဘ်ဆိုက်ပေါ် တင်ဖို့ ကြိုတင် ပြင်ဆင်ထားတဲ့ သတင်းမူကြမ်း ခေါင်းစဉ်က မရည်ရွယ်ဘဲ ဝက်ဘ်ဆိုက်ပေါ် ရောက်သွားတာလို့ Bloombergက ဖြေရှင်းပါတယ်။
Bloombergရဲ့ ပြောရေးဆိုခွင့်ရ အရာရှိကတော့ သူတို့ဟာ ကမ္ဘာ့နိုင်ငံရေး အခြေအနေ ရုတ်တရက် ပြောင်းလဲသွားနိုင်တဲ့ အလားအလာ အားလုံးအတွက် သတင်းမူကြမ်း ပုံစံတွေ ကြိုတင် ပြင်ဆင်ထားလေ့ ရှိကြောင်း၊ အခုလို အမှားမျိုး ဖြစ်သွားတဲ့အတွက် စိတ်မကောင်းပါကြောင်း အီးမေးလ်နဲ့ အင်တာဗျူး တစ်ခုမှာ ဖြေဆိုသွားပါတယ်။ ပြီးတော့ ဒီလို ချွတ်ချော်မှုနဲ့ ပတ်သက်လို့လည်း စုံစမ်း စစ်ဆေးသွားမယ်လို့လည်း Bloombergဖက်က ပြောကြားထားပါတယ်။
