ယီမင်နိုင်ငံမှာ ကုလသမဂ္ဂရဲ့ ဝန်ထမ်း ၅ ဦးကို လက်နက်ကိုင်တွေက ပြန်ပေးဆွဲ ဖမ်းဆီးသွားကြောင်း သိရပါတယ်။
အခု သီတင်းပတ်ကုန်မှာ ယီမင်တောင်ပိုင်းကို ကွင်းဆင်း ခရီးစဉ်တစ်ခု သွားရောက်ခဲ့ပြီး အေဒန်မြို့ကို ပြန်လာချိန် အက်ဘ်ယန်း ဒေသမှာ အမည်မသိ လက်နက်ကိုင် အဖွဲ့တစ်ခုက ကုလသမဂ္ဂ ဝန်ထမ်းတွေကို ဖမ်းဆီးသွားခဲ့တာ ဖြစ်ပါတယ်။
ယီမင်အခြေစိုက် ကုလသမဂ္ဂ မစ်ရှင်တွေရဲ့ ပြောရေးဆိုခွင့်ရ အရာရှိ ရက်ဆဲလ် ဂိခ်ကိုင်းက ဝန်ထမ်း ၅ ဦး ပြန်ပေးဆွဲ ခံရတဲ့ သတင်းကို အတည်ပြုခဲ့ပြီး သူတို့ အမြန်ဆုံး ပြန်လည် လွတ်မြောက်ဖို့ ကြိုးစား ဆောင်ရွက်နေကြောင်း ပြောသွားပါတယ်။
ကုလသမဂ္ဂ ပြောရေးဆိုခွင့်ရ အရာရှိ စတက်ဖနီ ဒူဂျာရစ်ကတော့ ဒီကိစ္စကို သတင်းရထားပေမယ့် အသေးစိတ် အချက်အလက်တွေကိုတော့ မပြောနိုင်သေးဘူးလို့ ဆိုပါတယ်။ ဝန်ထမ်းတွေရဲ့ လုံခြုံရေး အပါအဝင် တချို့သော အကြောင်းရင်းတွေကြောင့် ဘာမှတ်ချက်မှ မပေးနိုင်သေးကြောင်း ဒူဂျာရစ်က ဆိုပါတယ်။
Public Service Announcement
ယီမင်ဟာ ကုလသမဂ္ဂ အသိအမှတ် ပြုထားတဲ့ အစိုးရနဲ့ ဟိုသီ လက်နက်ကိုင် သူပုန်တွေကြား ပြည်တွင်းစစ် အပြင်းအထန် ဖြစ်ပွားနေတဲ့ နိုင်ငံပါ။ အခုလို ကုလသမဂ္ဂ ဝန်ထမ်းတွေကို ဖမ်းဆီးသွားတာက ဘယ်သူဘယ်ဝါရဲ့ လက်ချက် ဆိုတာကိုလည်း အတိအကျ မသိရသေးပါဘူး။
ယီမင်မှာ အယ်လ်ကိုင်ဒါ အကြမ်းဖက် အဖွဲ့နဲ့ ဆက်စပ်နေတဲ့ စစ်သွေးကြွတွေလည်း လှုပ်ရှားနေပြီး အရင်ကလည်း ပြန်ပေးဆွဲတဲ့ ဖြစ်ရပ်မျိုးတွေ ရှိခဲ့ဖူးကြောင်း သိရပါတယ်။
