အင်ဒိုနီးရှား နိုင်ငံက ကမ်းခြေတစ်ခုမှာ လှိုင်းလုံးတွေ ရိုက်ခတ်မှုကြောင့် လူ ၁၁ ဦး သေဆုံးသွားကြောင်း သိရပါတယ်။
အရှေ့ဂျာဗားက ကမ်းခြေတစ်ခုမှာ လှိုင်းကြီးနိုင်တဲ့အတွက် ပင်လယ်ထဲ မဆင်းဖို့ သတိပေးချက် ထုတ်ပြန်ထားတာကို မလိုက်နာတဲ့သူတွေ ရေနစ် သေဆုံးကုန်တာလို့ တာဝန်ရှိသူတွေက ပြောပါတယ်။ အနီးအနား ကျေးရွာတချို့က လူ ၂၄ ဦး ပါဝင်တဲ့ အဖွဲ့ဟာ ဖေဖော်ဝါရီ ၁၂ ရက် ညပိုင်းက ပင်လယ်ထဲဆင်းပြီး ရေကူး ခဲ့ကြတာ ဖြစ်ပါတယ်။
အဲဒီအဖွဲ့ထဲက ၁၁ ဦးဟာ လှိုင်းတွေ ရိုက်ခတ်တဲ့ဒဏ်ကြောင့် ပင်လယ်ဖက် မျောပါပြီး ရေနစ် သေဆုံးကုန်တာလို့ ဒေသခံ ကယ်ဆယ်ရေး အဖွဲ့တွေက ပြောပါတယ်။ အသက်ရှင် လွတ်မြောက်ခဲ့သူ ၁၃ ဦးထဲမှာ ၂ နှစ်အရွယ် ကလေးငယ် တစ်ဦးလည်း ပါဝင်ခဲ့ပါတယ်။
သူတို့အဖွဲ့ ကမ်းခြေ ရောက်လာချိန်မှာ ရေထဲ မဆင်းကြဖို့ ဒေသခံ တချို့က တားကြပေမယ့် နားမထောင်ခဲ့ကြဘူးလို့လည်း ကယ်ဆယ်ရေးအဖွဲ့ ခေါင်းဆောင် အိုင်ဝါယန် ဆူယတ်နားက ပြောပါတယ်။
Public Service Announcement
သေဆုံးသူတွေ အားလုံးရဲ့ ရုပ်အလောင်းတွေကို နောက်တစ်နေ့ ညနေပိုင်းကျမှ စုံစုံလင်လင် ပြန်လည်ဆယ်ယူ ရရှိခဲ့ပါတယ်။ ပြီးခဲ့တဲ့ သီတင်းပတ်ကုန်က အရှေ့ဂျာဗား အပါအဝင် နိုင်ငံရဲ့ ဒေသတချို့မှာ ရာသီဥတု ပြင်းထန်ပြီး လှိုင်းကြီးနိုင်ကြောင်း အင်ဒိုနီးရှား မိုးလေဝသ အေဂျင်စီက ကြိုတင် သတိပေးထားပါတယ်။
