ပီရူးနိုင်ငံမှာ ခရီးသည်တင် လေယာဉ်နဲ့ မီးသတ်ကား တစ်စီး တိုက်မိရာက မီးသတ်ဝန်ထမ်း ၂ ဦး သေဆုံးသွားခဲ့ကြောင်း သိရပါတယ်။
LATAM လေကြောင်းလိုင်းပိုင် လေယာဉ်ဟာ နိုဝင်ဘာ ၁၈ ရက်က လူပေါင်း ၁၀၂ ဦးကို တင်ဆောင်ပြီး ပျံတက်ဖို့ ပြင်ဆင်ချိန်မှာ လေယာဉ်ပြေးလမ်းပေါ်က မီးသတ်ကားနဲ့ တိုက်မိခဲ့တာ ဖြစ်ပါတယ်။ အဲဒီဖြစ်စဉ်မှာ လေယာဉ်ပေါ်က ခရီးသည်တွေနဲ့ အမှုထမ်းတွေ ထိခိုက်ခဲ့တာတော့ မရှိဘူးလို့ လေကြောင်းလိုင်းက ဆိုပါတယ်။
Airbus A320 အမျိုးအစားလေယာဉ်ဟာ ပျံတက်ဖို့အတွက် ပြေးလမ်းပေါ် အရှိန်နဲ့ ပြေးလွှားနေတဲ့အချိန်မှာပဲ အရှိန်ပြင်းပြင်း မောင်းနေတဲ့ မီးသတ် ထရပ်ကားကို တိုက်မိသွားတာ ဖြစ်ပါတယ်။ လေယာဉ်ဟာ တိုက်မိတဲ့ အရှိန်ကြောင့် ညာဖက်ကို တစ်ခြမ်းစောင်းသွားပေမယ့် ပြေးလမ်းပေါ်ကနေတော့ ချော်ထွက် မသွားခဲ့ပါဘူး။
အခင်းဖြစ်ပွားရာ ဂျော့ဂျ်ချားဗက်ဇ် လေဆိပ်ရဲ့ လုပ်ငန်းလည်ပတ်မှုတွေကို တာဝန်ယူတဲ့ LAP ကုမ္ပဏီက အခုလို မတော်တဆမှုမျိုးကြောင့် အဖိုးတန် လူ့အသက်တွေ ဆုံးရှုံးခဲ့ရတဲ့အတွက် အထူးတလည် ဝမ်းနည်း ကြေကွဲကြောင်း ထုတ်ပြန်ခဲ့ပါတယ်။
ဖြစ်တောင့်ဖြစ်ခဲ အခြေအနေမျိုးမှာ လေယာဉ်ပြေးလမ်းပေါ် မီးသတ်ကားနဲ့ လေယာဉ် တိုက်မိခဲ့တာနဲ့ ပတ်သက်လို့ စုံစမ်းစစ်ဆေးမှုတွေ ပြုလုပ်သွားမယ်လို့ ပီရူး အစိုးရ ရှေ့နေတွေက ပြောပါတယ်။ မီးသတ်ကားဟာ ဘာကြောင့် လေယာဉ်ပြေးလမ်းပေါ် ရောက်နေသလဲ ဆိုတာကိုလည်း တိတိကျကျ မသိရသေးပါဘူး။
ပြီးခဲ့တဲ့ လကလည်း လူပေါင်း ၄၈ ဦး စီးနင်းလိုက်ပါခဲ့တဲ့ LATAM လေကြောင်းပိုင် ခရီးသည်တင် လေယာဉ် တစ်စီးဟာ မုန်တိုင်းမိရာက ပါရာဂွေးနိုင်ငံ၊ အဆွန်စီယိုမြို့မှာ အရေးပေါ် ဆင်းသက်ခဲ့ရကြောင်း သိရပါတယ်။
