မြောက်ကိုရီးယားရဲ့ ဒုံးကျည် ပစ်လွှတ်မှု တစ်ခုကြောင့် ဂျပန်နိုင်ငံ မြောက်ပိုင်းမှာ အရှုပ်အထွေးတွေ ဖြစ်ပေါ်ခဲ့ပြီး အရေးပေါ် ရွှေ့ပြောင်းဖို့ အမိန့်တွေပါ ထုတ်ပြန်ခဲ့ရပါတယ်။
ဟော့ကိုင်ဒိုး ကျွန်းမှာ နေထိုင်သူတွေဟာ ဧပြီ ၁၃ ရက်မှာ လေကြောင်း အန္တရာယ် သတိပေး ဥဩသံတွေ မြည်ဟည်းလာချိန်မှာ ဗုံးခိုဖို့ သတ်မှတ်ထားတဲ့ နေရာတွေဆီ စုဝေး သွားရောက်ခဲ့ရပါတယ်။ ဒါပေမဲ့ မိနစ် ၃၀ အကြာမှာတော့ လေကြောင်း အန္တရာယ် သတိပေးချက်ကို ပြန်လည် ရုပ်သိမ်းခဲ့ပါတယ်။ ဒီလို ဖြစ်ရတာဟာ ဂျပန်ဖက်ကို ချိန်ရွယ်ပြီး မြောက်ကိုရီးယား ဒုံးကျည်တစ်စင်း ပစ်ခတ်ခဲ့တာကြောင့်ပါ။
မြောက်ကိုရီးယားရဲ့ ဒုံးကျည်ဟာ ဂျပန်ပိုင်နက်ထဲ ကျရောက်မှု မရှိဘူးလို့ အတည်ပြုပြီးတဲ့နောက် လေကြောင်း အန္တရာယ် သတိပေးချက်ကို ပြန်ရုပ်သိမ်းခဲ့တာ ဖြစ်ပါတယ်။
အဲဒီ ဒုံးကျည်ဟာ တာလတ်စပ်၊ ဒါမှမဟုတ် တာဝေးပစ် အမျိုးအစားလို့ ယူဆရပြီး ဒီနှစ်ထဲမှာ မြောက်ကိုရီးယား လွှတ်တင်တဲ့ ၂၇ စင်းမြောက် ဒုံးကျည်လည်း ဖြစ်ပါတယ်။ အခုဒုံးကျည်နဲ့ ပတ်သက်လို့ အသေးစိတ် အချက်အလက်တွေကိုတော့ ထုတ်ပြန်တာမျိုး မရှိသေးပါဘူး။
Public Service Announcement
ဂျပန်အပြင် တောင်ကိုရီးယားနဲ့ အမေရိကန်တို့က အဲဒီ ဒုံးကျည် ပစ်ခတ်မှုကို ချက်ချင်း ကန့်ကွက်ခဲ့ကြပါတယ်။ ဂျပန် ကာကွယ်ရေး ဝန်ကြီး ယာဆူကာဇူ ဟာမာဒါက မြောက်ကိုရီးယားရဲ့ ဒုံးကျည်ဟာ ဂျပန်ရဲ့ အထူးစီးပွားရေးဇုန် သတ်မှတ် ဧရိယာပေါ်က ဖြတ်ပျံသွားသလား ဆိုတာကို အတည်မပြုနိုင်သေးဘူးလို့ ပြောပါတယ်။
ပြီးခဲ့တဲ့ လပိုင်းတွေအတွင်း အမေရိကန်နဲ့ တောင်ကိုရီးယားတို့က ပူးပေါင်း စစ်ရေးလေ့ကျင့်မှုတွေ အရှိန်မြှင့် လုပ်ဆောင်ခဲ့သလို မြောက်ကိုရီးယားကလည်း ဒုံးကျည် စမ်းသပ်မှုတွေနဲ့ တုံ့ပြန်ခဲ့တာကြောင့် ကိုရီးယား ကျွန်းဆွယ်ရဲ့ အခြေအနေက တင်းမာမှုတွေ မြင့်တက်နေပါတယ်။
မြောက်ကိုရီးယားက ပြိုင်ဘက် မဟာမိတ် နှစ်နိုင်ငံရဲ့ စစ်ရေးလေ့ကျင့်မှုတွေဟာ ကျူးကျော်စစ်အတွက် ပြင်ဆင်မှုတွေလို့ အစဉ်တစိုက် စွပ်စွဲလေ့ရှိပြီး အဲဒီအတွက်လည်း ကိုယ့်နိုင်ငံကိုယ် ကာကွယ်ဖို့ နျူကလီးယား လက်နက် စွမ်းရည်ကို မြှင့်တင်မယ်လို့ ကြုံးဝါးထားပါတယ်။
