ဗြိတိန်ဘုရင် တတိယ ချားလ်စ်ဟာ ကင်ဆာရောဂါ စွဲကပ်နေကြောင်း စစ်ဆေး တွေ့ရှိခဲ့တယ်လို့ တော်ဝင် မိသားစုက ကြေညာပြီး အခုရက်ပိုင်းအတွင်း အနားယူနေမှာဖြစ်သလို လူအများနဲ့ တွေ့ဆုံမှု ပွဲလမ်းသဘင်တွေကို တက်ရောက်ဖြစ်မှာ မဟုတ်ဘူးလို့လည်း ထုတ်ပြန်ခဲ့ပါတယ်။
တော်ဝင်မိသားစု အရေးကို စောင့်ကြည့် လေ့လာသူတွေကတော့ ပုံမှန်အားဖြင့် နန်းတော်ဟာ ဘုရင်နဲ့ အတွင်းစည်း မိသားစုဝင်တွေရဲ့ ကျန်းမာရေးကို လူသိရှင်ကြား ထုတ်ပြန်လေ့ မရှိတဲ့ အစဉ်အလာကနေ သိသိသာသာ ခွဲထွက်သွားတာ ဖြစ်တယ်လို့ သုံးသပ်ခဲ့ပါတယ်။ ဒါပေမဲ့ အသက် ၇၅ နှစ်အရွယ် ချားလ်စ်မှာ စွဲကပ်နေတဲ့ ကင်ဆာရောဂါ အမျိုးအစားနဲ့ ရောဂါရဲ့ ပြင်းထန်မှု အတိုင်းအတာတွေကိုတော့ မထုတ်ပြန်ခဲ့ပါဘူး။
ချားလ်စ်ဘုရင်ဟာ မကြာသေးခင်က ဆီးကြိတ်ရောင်ရမ်းမှု တစ်ခုကြောင့် ကုသမှုတွေ ခံယူခဲ့ရပေမယ့် အခု ဆေးစစ်တွေ့ရှိခဲ့တာက ဆီးကြိတ်ကင်ဆာ မဟုတ်ဘူးလို့တော့ ဆိုပါတယ်။ ဆီးကြိတ်ပြဿနာက သာမန် ရောင်ရမ်းမှုသာ ဖြစ်ခဲ့တယ်လို့လည်း သိရပါတယ်။
ဘက်ကင်ဟမ် နန်းတော်က အခုအခါ ချားလ်စ်ဘုရင်ဟာ ပြည်ပလူနာအဆင့်မှာ ဆေးဝါးကုသမှုတွေ စတင်ခံယူတော့မယ်လို့လည်း ကြေညာခဲ့ပါတယ်။
Public Service Announcement
မကြာသေးခင်က ချားလ်စ်ဘုရင်အပြင် ချွေးမဖြစ်သူ အိမ်ရှေ့စံ ကြင်ရာတော် မင်းသမီး ကိတ်မစ်ဒယ်လ်တန်ပါ ဆေးရုံတက်ခဲ့ကြရပြီး ကိတ်ကလည်း အကြောင်းရင်း အတိကျ မဖော်ပြတဲ့ ဝမ်းဗိုက်ခွဲစိတ် ကုသမှုတစ်ခု ခံယူခဲ့ရတယ်လို့ ဆိုပါတယ်။
ချားလ်စ်ဘုရင် ဆေးကုသမှု ခံယူနေတဲ့ ကာလတွေအတွင်း သူ့ရဲ့ လုပ်ငန်းတာဝန်တွေကို တခြားတစ်ဦးဦးဆီ လွှဲပြောင်းပေးထားမှာ မဟုတ်ဘူးလို့လည်း နန်းတော်က ဆိုပါတယ်။
ဗြိတိန်မှာတော့ ကင်ဆာရောဂါ အမျိုးမျိုးကြောင့် သေဆုံးသူ အချိုးအစားဟာ ပြီးခဲ့တဲ့ နှစ်ပိုင်းတွေအတွင်း အကျဖက်ကို ဆက်တိုက် ဦးတည်လာနေခဲ့ပြီး ကင်ဆာ ဖြစ်ပွားနေကြောင်း ဆေးစစ်တွေ့ရှိသူ အားလုံးရဲ့ သုံးပုံတစ်ပုံကျော်ဟာ အသက် ၇၅ နှစ်အထက် အရွယ်တွေလို့လည်း သိရပါတယ်။
ကိုးကား: NBC
