KD Pendekar သင်္ဘောဟာ ဩဂုတ် ၂၅ ရက်နေ့၊ နစ်မြုပ်ချိန်က ထိခိုက်သေပျောက်မှု မရှိခဲ့ပေမယ့် ပြန်ဆယ်တင်ဖို့ အားထုတ်မှုတွေအတွင်း ပထမဆုံး လူ့အသက် ဆုံးရှုံးမှုနဲ့ ကြုံတွေ့လာတာ ဖြစ်ပါတယ်။
မလေးရှား တော်ဝင်ရေတပ်က ဝါရင့် ရေငုပ်သမား တစ်ဦးဖြစ်တဲ့ အာမန်ဆန် ဟာမန်ဆာဟာ ဂျိုဟာမြို့ ကမ်းလွန်မှာရှိတဲ့ သင်္ဘော နစ်မြုပ်ရာ ရေပြင်မှာ တာဝန် ထမ်းဆောင်နေရင်း ဩဂုတ်လ ၂၈ ရက်နေ့က ကွယ်လွန်ခဲ့ကြောင်း ကြေညာသွားပါတယ်။
Public Service Announcement
အပေါ့စား ဖျက်သင်္ဘောငယ် တစ်စီးဖြစ်တဲ့ KD Pendekarဟာ ကမ်းရိုးတန်းနဲ့ ရေမိုင် ၂ မိုင်လောက် အကွာမှာ အမျိုးအမည်မသိ ရေအောက်က အရာတစ်ခုခုနဲ့ ဝင်တိုက်မိပြီး နစ်မြုပ်ခဲ့တာ ဖြစ်ပါတယ်။ သင်္ဘော တစ်စီးလုံး နစ်မသွားခင် အတောအတွင်း ရေတပ်သား ၃၉ ယောက် စလုံးကို အောင်အောင်မြင်မြင် ကယ်ဆယ် ရွှေ့ပြောင်းပေးနိုင်ခဲ့ပါတယ်။
သင်္ဘောဟာ တစ်ခုခုနဲ့ တိုက်မိလို့ ဝမ်းဗိုက် ကွဲထွက်သွားခဲ့ပြီး ရေတွေ ဒလဟော ဝင်လာခဲ့တာလို့ လွတ်မြောက်လာတဲ့ ရေတပ်သားတွေက ပြောပါတယ်။
ရေတပ်ဟာ သင်္ဘောပျက်ကို ပြန်ဆယ်ဖို့ ကြိုးစားနေပြီး ရေငုပ်သမားတွေက အဲဒီမစ်ရှင်အတွက် အလုပ်လုပ်နေကြတာပါ။ ဟာမန်ဆာဟာ သင်္ဘောကို ရေပေါ် ပေါ်လာစေမယ့် လေအိတ်တွေ တပ်ဆင်နေရင်း ရေနစ် သေဆုံးခဲ့တယ်လို့ ယူဆရပြီး အလောင်းကိုတော့ ဂျိုဟာမှာရှိတဲ့ ဆူလ်တန် အစ္စမေးလ် ဆေးရုံမှာ သေမှုသေခင်း စစ်ဆေးမှုတွေ ပြုလုပ်မယ်လို့ ဆိုပါတယ်။ နာရေးကိုတော့ ဆာဘားဟ်မြို့မှာ ပြုလုပ်သွားမှာပါ။ ကျန်ရစ်သူ မိသားစုအတွက် လိုအပ်သမျှ အကူအညီ အားလုံးကိုလည်း စီစဉ် ပေးအပ်သွားမယ်လို့ ရေတပ်က ထုတ်ပြန်ထားပါတယ်။
KD Pendekarကို ဆွီဒင်မှာ တည်ဆောက်ခဲ့ပြီး ၁၉၇၉ ခုနှစ်၊ ဇူလိုင်လမှာ မလေးရှားရေတပ်အတွက် စတင် အမှုထမ်းခဲ့ပါတယ်။ သင်္ဘော နစ်မြုပ်မှုအပြီး ရေတပ်ရဲ့ လက်ရှိ အသုံးပြုနေတဲ့ ရေယာဉ် သုံးပုံတစ်ပုံလောက်ကို ကြံ့ခိုင်မှု ပြန်လည် စစ်ဆေးသွားမယ်လို့ ကာကွယ်ရေး ဝန်ကြီး ခါလက်ဒ် နော်ဒင်က ပြောပါတယ်။ ရေတပ်မှာ သုံးစွဲနေတဲ့ ရေယာဉ် တစ်ဒါဇင် ဝန်းကျင်လောက်ဟာ သက်တမ်း နှစ် ၄၀ အထက် ရှိနေပြီလို့လည်း ဝန်ကြီးက ဆိုပါတယ်။
ဒါပေမဲ့ KD Pendekar နစ်မြုပ်မှုရဲ့ အကြောင်းရင်းကတော့ သက်တမ်းအိုဟောင်းမှုကြောင့် မဟုတ်ဘူးလို့ သူက အခိုင်အမာ ပြောကြားသွားခဲ့ပါတယ်။
ကိုးကား: CNA
