People’s Spring
အမေရိကန် ရွေးကောက်ပွဲမှာ ပြည်နယ်အလိုက် မဲရေတွက်မှု ရလဒ်တွေ ဆက်လက် ထွက်ပေါ်နေခြင်းနဲ့အတူ ဒေါ်နယ်လ်ထရမ့် အနိုင်ရရေး လမ်းကြောင်းက ပိုမိုပီပြင်လာနေပါတယ်။
အမေရိကန် ရွေးကောက်ပွဲရဲ့ စည်းမျဉ်းတွေအရ ပြည်နယ် တစ်ခုချင်းစီမှာ အနိုင်ရတဲ့ သမ္မတလောင်းဟာ အဲဒီ ပြည်နယ်အတွက် ခွဲတမ်း သတ်မှတ်ထားတဲ့ သမ္မတ တင်မြှောက်ပိုင်ခွင့် ကိုယ်စားလှယ်မဲ အရေအတွက် အားလုံးကို ရရှိပါတယ်။ အမေရိကန် ရွေးကောက်ပွဲမှာ ကိုယ်စားလှယ်မဲ ၂၇၀ အထက် အနိုင်ရတဲ့သူက သမ္မတ နေရာကို ရရှိမှာ ဖြစ်ပါတယ်။
နိုဝင်ဘာ ၆ ရက်နေ့၊ မြန်မာစံတော်ချိန် မွန်းလွဲပိုင်း ၁၂ နာရီခွဲအထိ အခြေအနေအရ ထရမ့်ဟာ ကိုယ်စားလှယ်မဲ ၂၄၇ နေရာစာ အနိုင်ရထားပြီး ဟားရစ်က ၂၁၄ နေရာသာ အနိုင်ရထားသေးတာကို New York Timesနဲ့ AP သတင်းဌာနတွေရဲ့ အချိန်နဲ့ တပြေးညီ ဖော်ပြမှုတွေအရ သိရပါတယ်။
Public Service Announcement
အမေရိကန် ရွေးကောက်ပွဲတွေမှာ ပါတီစွဲ မရှိတဲ့ ကြားပြည်နယ်တွေအဖြစ် သတ်မှတ် ခံရတဲ့ အဓိက ပြည်နယ် ၇ ခုမှာ အနိုင်ရရေးဟာ သမ္မတလောင်းတွေအတွက် အရေးအကြီးဆုံး လိုအပ်ချက် ဖြစ်ပါတယ်။ ထရမ့်ဟာ ကြားပြည်နယ်တွေမှာ ဒီမိုကရက်တစ်ပါတီ ကိုယ်စားပြု ပြိုင်ဘက် ကာမာလာ ဟားရစ်အပေါ် အသာစီး ရထားတဲ့ အခြေအနေတွေကို တွေ့ရပါတယ်။
ဥပမာ ကိုယ်စားလှယ်မဲ ၁၆ နေရာစီ ခွဲတမ်းရှိတဲ့ ဂျော်ဂျီယာနဲ့ မြောက်ပိုင်း ကာရိုလိုင်းနားတို့မှာ ထရမ့်အနိုင်ရဖို့ သေချာခြင်းက ဟားရစ်ကို အများကြီး အခက်ကြုံသွားစေပါတယ်။ တခြား ကြားပြည်နယ်တွေဖြစ်တဲ့ ဝစ္စကွန်ဆင်၊ မစ်ချီဂန်၊ ပင်ဆယ်လ်ဗေးနီးယားတို့မှာလည်း မဲတွေကို ဆက်လက် ရေတွက်နေဆဲ အခြေအနေ ဖြစ်ပေမယ့် ထရမ့်က ဦးဆောင်နေပါတယ်။
လေ့လာစောင့်ကြည့်သူ အများစုကတော့ ရွေးကောက်ပွဲ ရလဒ်ရဲ့ ချိန်ခွင်လျှာဟာ သမ္မတဟောင်း ထရမ့်ဖက်ကို ယိမ်းနေပြီလို့ လက်ခံထားပါတယ်။ သင်္ချာနည်းအရ နောက်ဆုံးအပြီးသတ် မဲကြေညာချက်တွေ ထွက်မလာခင်အထိ ဟားရစ်အတွက် အခွင့်အရေး ရှိနေဆဲ ဆိုပေမယ့် လက်တွေ့အားဖြင့်တော့ အခြေအနေတွေက ခက်ခဲလာနေပါတယ်။
ထရမ့်ဟာ ၂၀၁၇ ကနေ ၂၀၂၁ ခုနှစ်ထိ အမေရိကန် သမ္မတ တာဝန်ကို ရယူခဲ့ဖူးပြီး ၂၀၂၀ ရွေးကောက်ပွဲမှာ လက်ရှိ သမ္မတ ဂျိုးဘိုင်ဒန်ကို အရေးနိမ့်ခဲ့ပါတယ်။ အခုတော့ သူဟာ အိမ်ဖြူတော်ဆီ ပြန်လာဖို့ အလားအလာ ကောင်းလာနေတာ ဖြစ်ပါတယ်။
ကိုးကား: AP
ဓာတ်ပုံ – Reuters
