ပျက်ကျခဲ့တဲ့ ဂျယ်ဂျူ လေကြောင်း ခရီးသည်တင် လေယာဉ်ရဲ့ ပျံသန်းမှု မှတ်တမ်းဆိုင်ရာ ကိရိယာ black boxတွေကနေ ကနဦး ရရှိထားတဲ့ အချက်အလက်တွေကို အမေရိကန်ဆီ ပို့ဆောင်ပြီး စုံစမ်း စစ်ဆေးစေမယ်လို့ တောင်ကိုရီးယား အာဏာပိုင်တွေက ပြောကြားခဲ့ပါတယ်။
ဒီဇင်ဘာ ၂၉ ရက်နေ့က မူအန် နိုင်ငံတကာ လေဆိပ်မှာ ဘီးချလို့မရတဲ့ အခြေအနေနဲ့ အရေးပေါ် ဆင်းသက်ဖို့ ကြိုးစားရင်း ဂျယ်ဂျူလေကြောင်းရဲ့ ခရီးစဉ်အမှတ် ၂၂၁၆ လေယာဉ်ဟာ ပြေးလမ်းအလွန်မှာရှိတဲ့ ကွန်ကရစ်နံရံကို အရှိန်နဲ့ ဝင်တိုက်ပြီး မီးလောင် ပေါက်ကွဲခဲ့ပါတယ်။ အဲဒီဖြစ်စဉ်ကြောင့် လေယာဉ်ပေါ် ပါလာသူ ၁၈၁ ဦးထဲက ၁၇၉ ယောက်သေဆုံးပြီး အမှုထမ်း ၂ ဦးသာ အသက်ရှင်ခဲ့ပါတယ်။ ဒါဟာ တောင်ကိုရီးယားနိုင်ငံ သမိုင်းမှာ အဆိုးဆုံး လေကြောင်း မတော်တဆမှု အဖြစ်လည်း မှတ်တမ်းဝင်စေခဲ့ပါတယ်။
ဇန်နဝါရီ ၁ ရက်နေ့မှာတော့ တောင်ကိုရီးယား အာဏာပိုင်တွေဟာ သေဆုံးသူတွေရဲ့ ရုပ်အလောင်းတွေကို မိသားစုဝင်တွေဆီ စတင်လွှဲပြောင်းပေးနေပြီ ဖြစ်သလို Boeing 737-800 အမျိုးအစား လေယာဉ်ပျက်ဆီက ရှာတွေ့ထားတဲ့ black boxတွေ ဆီကနေ အချက်အလက် တချို့ကိုလည်း ထုတ်နုတ် ရရှိထားပြီလို့ ပြောပါတယ်။
ဒါပေမဲ့ လေယာဉ်ပျက်ကျချိန်မှာ black boxတစ်ခုရဲ့ အစိတ်အပိုင်းတစ်ခု ပျောက်ဆုံးနေတာကြောင့် အချက်အလက်တွေ ထုတ်ယူရေးမှာ အကန့်အသတ်တချို့ ကြုံနေရတယ်လို့ ဆိုပါတယ်။ လက်ရှိ ရထားသမျှ အချက်အလက်တွေကိုတော့ အမေရိကန်ကို ပေးပို့ပြီး ကျွမ်းကျင်သူတွေ အကူအညီနဲ့ စစ်ဆေးသွားမှာပါ။
Public Service Announcement
လေယာဉ်တွေရဲ့ black boxတွေဟာ ပျံသန်းမှုဆိုင်ရာ အချက်အလက်တွေကို မှတ်တမ်းတင်ထားသလို လေယာဉ်မှူး အခန်းထဲက အသံတွေကိုလည်း သိုမှီးသိမ်းဆည်းထားတာကြောင့် လေယာဉ်ပျက်ကျမှုနဲ့ ပတ်သက်ရင် တိကျတဲ့ အကြောင်းရင်းကို ဖော်ထုတ်ရာမှာ အများကြီး အရေးကြီးပါတယ်။
လေယာဉ်ပျက်ကျတဲ့ နေရာကို စုံစမ်းစစ်ဆေးမှုတွေ ပြုလုပ်ရာမှာ တောင်ကိုရီးယားအပြင် အမေရိကန်က စုံစမ်းရေး အရာရှိတွေနဲ့ Boeing ကုမ္ပဏီက စေလွှတ်တဲ့ ပညာရှင်တွေပါ ပူးပေါင်း ပါဝင်ခဲ့တယ်လို့လည်း သိရပါတယ်။ လေယာဉ်ရဲ့ black box နှစ်လုံးစလုံးကို ရှာတွေ့ထားပြီး လေယာဉ်မှူး အခန်းထဲက အသံသွင်း black boxဆီက အချက်အလက်တွေကိုတော့ အသံဖိုင်အဖြစ် ပြောင်းလဲဖို့ စတင်စီစဉ်နေပြီလို့ တောင်ကိုရီးယား အရပ်ဖက်လေကြောင်း ပို့ဆောင်ရေး ဒုတိယ ဝန်ကြီး ဂျူဂျောင်ဝမ်က ပြောပါတယ်။
လေယာဉ်ရဲ့ ပျံသန်းမှု မှတ်တမ်းတင် ဒုတိယ black boxမှာတော့ connectorတစ်ခု ပျောက်ဆုံးနေတယ်လို့ ဂျူက ဆိုပါတယ်။
လေယာဉ်ပျက်ကျမှုနဲ့ ပတ်သက်ပြီး ကနဦးမှာ လေယာဉ်က ငှက်အုပ်နဲ့ ဝင်တိုက်ခဲ့တာလို့ စုံစမ်းရေး အရာရှိတွေက သုံးသပ်ထားပေမယ့် လေယာဉ်ပြေးလမ်းရဲ့ အဆုံးမှာ ကွန်ကရစ် နံရံတစ်ခု တည်ဆောက်ထားတဲ့ အခြေအနေကိုလည်း ဆန်းစစ်နေပါတယ်။ နောက်ပြီး ဘီးချလို့ မရတဲ့ ကိစ္စအပါအဝင် လေယာဉ်ရဲ့ စက်ပိုင်းဆိုင်ရာ ပြဿနာ ကြုံနိုင်ခြေကိုလည်း စုံစမ်းနေပါတယ်။
တောင်ကိုရီးယားမှာ လေယာဉ်ပျက်ကျပြီး သေဆုံးသူတွေအတွက် ရည်ရွယ်တဲ့ ဝမ်းနည်းကြေကွဲမှု ကာလကို ဇန်နဝါရီ ၄ ရက်နေ့ ညသန်းခေါင်ထိ သတ်မှတ် ကြေညာထားတယ်လို့လည်း သိရပါတယ်။
ကိုးကား: CNA
