နိုင်ငံသားတွေ ၇၂ နာရီစာ ရိက္ခာ ကြိုစုထားသင့်တယ်လို့ EU အကြံပြု

ဥရောပ သမဂ္ဂ (EU) အဖွဲ့ဝင် နိုင်ငံသားတွေ အနေနဲ့ လိုရမယ်ရ သဘောမျိုးအဖြစ် ၇၂ နာရီစာ ဖူလုံဖို့ ရိက္ခာတွေ ကြိုတင် စုဆောင်းထားသင့်ကြောင်း EUက တိုက်တွန်းခဲ့ပါတယ်။

အရေးပေါ် အခြေအနေ တစ်ခုခု ကြုံလာရင် အဆင်ပြေစေဖို့အတွက် အနည်းဆုံး ၇၂ နာရီစာ အစားအသောက်တွေကို ကြိုတင် စုဆောင်းထားတာဟာ သင့်တော်တဲ့ အစီအမံတစ်ခု ဖြစ်လိမ့်မယ်ုလိ့ မတ်လ ၂၆ ရက်နေ့မှာ EUရဲ့ ဥရောပ ကော်မရှင်က ပြောပါတယ်။

ဥရောပ ကော်မရှင်ရဲ့ အဆိုအရ EUရဲ့ စုပေါင်းကြိုတင်ပြင်ဆင်မှု မဟာဗျူဟာ လမ်းညွှန်ချက် အသစ်တွေကို ရေးဆွဲနေပြီး သဘာဝ ဘေးအန္တရာယ်၊ ဆိုက်ဘာတိုက်ခိုက်မှုနဲ့ ပထဝီဝင် နိုင်ငံရေး အကျပ်အတည်းတွေ ကြုံလာတဲ့ အခြေအနေတွေအတွက် EU အဖွဲ့ဝင် နိုင်ငံတွေရဲ့ ပြည်သူတွေ ကြိုတင် ပြင်ဆင်ထားဖို့ အခုလို အကြံပြုရတာလို့ သိရပါတယ်။

ဥရောပ ကော်မရှင်က ထည့်သွင်းတွက်ချက်ထားတဲ့ ဖြစ်နိုင်ခြေတွေထဲမှာတော့ EU အဖွဲ့ဝင် နိုင်ငံတွေအပေါ် ပစ်မှတ်ထားလာမယ့် လက်နက်ကိုင် ရန်လို တိုက်ခိုက်မှုတွေလည်း ပါဝင်ပါတယ်။

Public Service Announcement

ရေကြီးမှုတွေ ကြုံနိုင်တဲ့ ဇုန်နေရာတွေမှာ နေထိုင်တဲ့ မိသားစုတွေဟာ ရေမျက်နှာပြင် အမြင့်ကို နိုးနိုးကြားကြား စောင့်ကြည့်ပြီး အချိန်နဲ့ တပြေးညီ သိရှိနေသင့်ကြောင်း၊ တောမီးနဲ့ ပတ်သက်တဲ့ သတိပေး စနစ်တွေကလည်း ရွှေ့ပြောင်းဖို့ အဖိုးတန် အချိန်တွေ ဆုံးရှုံးမသွားအောင် အကူအညီ ပေးနိုင်မှာဖြစ်ကြောင်း ဥရောပ ကော်မရှင် ဥက္က
အာဆူလာ ဗန်ဒါ လီယန်က ပြောပါတယ်။

EUရဲ့ မဟာဗျူဟာ အသစ်ဟာ လုံခြုံရေးနဲ့ ပတ်သက်ရင် အစောပိုင်း ကြိုတင် သတိပေးမှု စနစ်တွေ ပိုမို ထိရောက် ကောင်းမွန်ရေးကို ဦးတည်ထားပြီး အကျပ်အတည်း ကာလမှာ ကျန်းမာရေး စောင့်ရှောက်မှု၊ သောက်သုံးရေ ရရှိစေမှုစတဲ့ အခြေခံ လိုအပ်ချက်တွေကို လူထုဆီ အထောက်အပံ့ ပြတ်တောက် မသွားစေဖို့လည်း ရည်ရွယ်ထားတာ ဖြစ်ပါတယ်။

ဥရောပ ကော်မရှင်ရဲ့ ကြိုတင်ပြင်ဆင်မှုနဲ့ အကျပ်အတည်း စီမံခန့်ခွဲမှုဌာန အကြီးအကဲ ဟက်ဒ်ဂျာ လာဘစ်ဘ်ကတော့ EU အဖွဲ့ဝင် နိုင်ငံတွေရဲ့ နိုင်ငံသားတိုင်းဟာ အနည်းဆုံး ၇၂ နာရီစာ စားနပ်ရိက္ခာနဲ့ သောက်ရေတွေ ကြိုတင် စုဆောင်း ပြင်ဆင်ထားသင့်ကြောင်း ဆိုပါတယ်။ အရာရာအတွက် ကြိုတင်ပြင်ဆင်ထားတာဟာ ဥရောပရဲ့ လူနေမှု ပုံစံသစ် ဖြစ်လာမယ်လို့ သူက လူမှုကွန်ရက် မီဒီယာ Xမှာ ရေးသားထားခဲ့ပါတယ်။

လာဘစ်ဘ်က EU အဖွဲ့ဝင် နိုင်ငံတွေရဲ့ နိုင်ငံသားတွေ ကြိုတင် စုဆောင်း သိုမှီးထားသင့်တာတွေက စားနပ်ရိက္ခာ၊ သောက်ရော၊ ဓာတ်မီး၊ ပါဝါဘန့်ခ်၊ ရေဒီယို၊ ငွေသားနဲ့ ဆေးဝါးတွေ ဖြစ်တယ်လို့လည်း အကြံပြုထားခဲ့ပါတယ်။

ကိုးကား: Reuters