ယူကရိန်းရဲ့ မြို့တော် ကိယက်ဗ်ကို ရုရှားက ညလုံးပေါက် တိုက်ခိုက်ခဲ့တဲ့နောက် သမ္မတ ဗိုလိုဒီမာ ဇီလန်စကီးဟာ တောင်အာဖရိက နိုင်ငံ ခရီးစဉ်ကနေ အမြန် ပြန်လာခဲ့ပါတယ်။
တောင်အာဖရိကမှာ သမ္မတ ဆိုင်ရဲလ် ရာမာဖိုဆာနဲ့ နှစ်နိုင်ငံ ပူးပေါင်းဆောင်ရွက်ရေး၊ ရုရှား-ယူကရိန်း စစ်ပွဲ ရပ်ဆိုင်းရေး ကိစ္စတွေကို ဆွေးနွေးခဲ့တဲ့နောက် တခြား ကြိုတင် စီစဉ်ထားတာတွေကို ဖျက်သိမ်းပြီး ယူကရိန်းဆီ ပြန်လာခဲ့ကြောင်း ဇီလန်စကီးက ဧပြီ ၂၄ ရက်နေ့မှာ ပြောပါတယ်။
ရုရှားဟာ ကိယက်ဗ်ကို ဧပြီ ၂၃ ရက်နေ့က ညလုံးပေါက် ဒုံးကျည်တွေ၊ ဒရုန်းတွေ အသုံးပြုပြီး တိုက်ခိုက်ခဲ့တာ ဖြစ်ပါတယ်။ ဇီလန်စကီးက နိုင်ငံခြားရေး ဝန်ကြီး အန်ဒရီ ဆိုင်ဘီဟာက တောင်အာဖရိကမှာ ဆက်နေခဲ့ပြီး လိုအပ်တဲ့ အစည်းအဝေးတွေ အားလုံးကို ကိုယ်စား တက်ရောက်သွားမယ်လို့ Telegramမှာ ရေးသားထားခဲ့ပါတယ်။
ရုရှားရဲ့ ပြင်းထန်တဲ့ တိုက်ခိုက်မှုတွေကြောင့် ကိယက်ဗ်မှာ အနည်းဆုံး လူ ၈ ဦး သေဆုံးခဲ့ကြောင်း သိရပါတယ်။ အခုတိုက်ခိုက်မှုတွေနဲ့ ကြုံခဲ့တဲ့နောက် နိုင်ငံတကာ အနေနဲ့ အပစ်အခတ် ရပ်စဲရေးအတွက် ရုရှားအပေါ် ပိုမို ဖိအားပေးဖို့ လိုအပ်နေပြီလို့ ပြောကြားခဲ့ပါတယ်။
Public Service Announcement
ရုရှားနဲ့ ယူကရိန်းကြား စစ်ပွဲ ရပ်ဆိုင်းရေး ကြားဝင် ညှိနှိုင်းပေးနေတဲ့ အမေရိကန် အစိုးရက အခြေအနေတွေ တိုးတက်မှု ရှိမလာရင် ကြားဝင်ဖြေရှင်းမှုတွေကို ရပ်တန့်လိုက်မယ်ဆိုတဲ့ သဘောမျိုး သတိပေးလာချိန်မှာ ရုရှားဟာ ယူကရိန်းကို တိုက်ခိုက်မှုတွေ အရှိန်မြှင့်တင်လာခဲ့တာပါ။
ရုရှားရဲ့ တိုက်ခိုက်မှုမှာတော့ အဆောက်အအုံတွေ ပြိုကျ ပျက်စီးခဲ့ပြီး လူ ၈ ဦး သေဆုံးခဲ့တဲ့အပြင် ကလေး ၆ ဦး အပါအဝင် ဒဏ်ရာရသူ ၇၀ ကျော် ရှိခဲ့တယ်လို့ ကိယက်ဗ် မြို့တော်ဝန် ဗစ်တာလီ ကလစ်ချ်ကိုက ပြောပါတယ်။
အခြေအနေ အဆိုးဆုံးဖြစ်တဲ့ ဆီဗွိုင်တိုရှန်စကီ ရပ်ကွက်မှာတော့ ကယ်ဆယ်ရေးတွေဟာ ပြိုကျနေတဲ့ အဆောက်အအုံ နှစ်ခုရဲ့ အပျက်အစီးပုံအောက် ပိတ်မိနေသူတွေကို ဆက်လက် ရှာဖွေနေရဆဲလို့လည်း မြို့တော်ဝန်က ဆိုပါတယ်။
ဒါဟာ အခုနှစ်အတွင်း ကိယက်ဗ်ကို ရုရှားက ပစ်မှတ်ထား လုပ်ဆောင်ခဲ့သမျှ အကြီးမားဆုံး တိုက်ခိုက်မှုကြီးလည်း ဖြစ်လာခဲ့ကြောင်း သိရပါတယ်။
ကိုးကား: BBC
