ဆွီဒင်မှာ နှစ်ပေါင်း ၁၀၀ ကျော် သက်တမ်းရှိတဲ့ ခရစ်ယာန် ရှေးဘုရားကျောင်းကြီးကို အလုံးအထည်မပျက် နေရာရွှေ့ပြောင်းဖို့ စီစဉ်နေပါတယ်။
ဆွီဒင်နိုင်ငံ မြောက်ပိုင်းမှာ တည်ရှိတဲ့ အဲဒီ အနီရောင် ဘုရားကျောင်းကြီးဟာ မြေကျွံနစ်မြုပ်မှု အန္တရာယ်နဲ့ ကြုံတွေ့နေတဲ့နောက် ၅ ကီလိုမီတာလောက် အကွာကို ရွှေ့ပြောင်းဖို့ အာဏာပိုင်တွေက ဆုံးဖြတ်ခဲ့တာပါ။
၁၉၁၂ တုန်းက စတင် တည်ဆောက်ခဲ့တာကြောင့် သက်တမ်း ၁၁၃ နှစ်ရှိပြီဖြစ်တဲ့ ဘုရားကျောင်းကြီးအတွက် ကီရူနာ မြို့လယ်နားမှာလည်း နေရာသစ် ရွေးချယ်ထားပြီးပါပြီ။
လောလောဆယ်တော့ ဘုရားကျောင်းကြီးကို အလုံးအထည် မပျက်အောင် သတိထားပြီး ကုန်တင်ကား နောက်တွဲယာဉ်ကြီး တစ်ခုပေါ် တင်ဆောင်ထားပါတယ်။ ပြီးတော့ တစ်နာရီကို မီတာ ၅၀၀ လောက်နှုန်းနဲ့ ဖြည်းဖြည်းချင်း မောင်းနှင်ရင်း နေရာသစ်ဆီ သယ်ယူမှာပါ။ အဲဒီ ခရီးစဉ်ဟာ ၂ ရက်လောက် ကြာမယ်လို့ ခန့်မှန်းရပါတယ်။
Public Service Announcement
ဘုရားကျောင်း တည်ရှိရာ မြို့ဟောင်းနေရာဟာ အရင်က သံသတ္တုရိုင်းတွေ အလွန်အကျွံ တူးဖော်ထားတဲ့ဒဏ်ကြောင့် မြေကျွံနိမ့်ကျမှုတွေ ဖြစ်ပေါ်နိုင်ခြေ ခြိမ်းခြောက်မှုတွေ ကြုံနေရပါတယ်။
ဘုရားကျောင်းကြီး တည်ရှိရာ ကီရူနာမြို့ဟာ အာတိတ်စက်ဝိုင်းရဲ့ မြောက်ဖက် ၁၄၅ မိုင်လောက်အကွာ၊ ဆွီဒင်နိုင်ငံ မြောက်ဖျားပိုင်းမှာ တည်ရှိနေတာပါ။
ယဉ်ကျေးမှု လက်ရာ ထိန်းသိမ်းရေး ပညာရှင် ဆိုဖီယာ လက်ဂါလော့ဖ် မက်တာက အခုပရောဂျက်အတွက် နှစ်တွေနဲ့ချီ အချိန်ယူ ပြင်ဆင်ခဲ့ရပြီး အပြီးသတ် ခရီးစဉ် စတင်နိုင်တော့မယ်လို့ ပြောကြားခဲ့ပါတယ်။ အရမ်းကြီးမားတဲ့ ရှေးအဆောက်အအုံ တစ်ခုကို အလုံးအထည် မပျက်အောင် ရွှေ့ပြောင်းရတာဟာ အရမ်းရှုပ်ထွေးပြီး ခက်ခဲကြောင်း၊ ဒီခရီးစဉ်ဟာ သေချာပေါက် သမိုင်းဝင် လုပ်ဆောင်မှုတစ်ခု ဖြစ်လာမယ်လို့ ယုံကြည်ကြောင်း သူက ဆိုပါတယ်။
၂၀၁၀ အလွန် နှစ်တွေကစပြီး ကီရူနာမှာရှိတဲ့ အဆောက်အအုံ တချို့ကို ပိုပြီး ဘေးကင်းလုံခြုံတဲ့ ဧရိယာတွေဆီ ရွှေ့ပြောင်းခဲ့ပါတယ်။ ဒါပေမဲ့ အများစုက အလုံးလိုက် သေသေသပ်သပ် ဖျက်ယူပြီး ပြန်ဆောက်လုပ်တာမျိုး နည်းကိုပဲ သုံးခဲ့တာပါ။ ပိုသေးတဲ့ ရုပ်တုတွေနဲ့ အဆောက်အအုံတွေကိုတော့ အလုံးအထည်အလိုက် ရွှေ့ပြောင်းခဲ့ပါတယ်။
အရင်က မြို့ဟောင်းအလယ်မှာ ရှိခဲ့တဲ့ နာရီစင်ဟာလည်း အခုဆိုရင် အသစ်ပြောင်းလဲ သတ်မှတ်လိုက်တဲ့ မြို့သစ်ရဲ့ အလယ်ဗဟိုမှာ ခန့်ခန့်ထည်ထည် တည်ရှိနေပြီလို့ သိရပါတယ်။
ကိုးကား: BBC
