ဇေအောင်/People’s Spring
မန္တလေးတိုင်း၊ မြင်းခြံမြို့နယ်၊ မြင်းခြံ − မြို့သာလမ်းပိုင်းရှိ သစ်ရုံကျေးရွာတွင် တိုက်ပွဲဖြစ်ပွားနေပြီး တော်လှန်ရေး ရဲဘော်နှင့် ပြည်သူများ ထိခိုက်မှုရှိကြောင်း ဒေသခံများက ပြောသည်။
ယနေ့(ဒီဇင်ဘာ ၆ရက်)နံနက်ပိုင်းက မြင်းခြံမြို့ပေါ်မှ စစ်ကောင်စီတပ်နှင့်ပျူစောထီးများသည် မြင်းခြံ-မြို့သာလမ်းပိုင်းရှိ သစ်ရုံကျေးရွာသို့ စစ်ကြောင်းထိုးဝင်ရောက်လာချိန် တော်လှန်ရေးတပ်ဖွဲ့များနှင့် တိုက်ပွဲဖြစ်ပွားခဲ့ခြင်းဟု ဒေသခံများက ပြောသည်။
“ရဲဘော်နှစ်ဦးကျတယ်လို့လည်း သတင်းရတယ်။ အတိအကျတော့ မသိရသေးဘူး။”ဟု ဒေသတွင်း တော်လှန်ရေးရဲဘော်တစ်ဦးက ပြောသည်။
Public Service Announcement
စစ်ကောင်စီက ဂျက်ဖိုက်တာတစ်စီးဖြင့်လည်းကောင်း၊ မြင်းခြံမြို့အခြေစိုက် ခမရ(၁၅)တပ်ရင်းမှ လက်နက်ကြီးဖြင့်လည်းကောင်း ပစ်ကူပေးခဲ့ကြောင်း၊ လက်နက်ကြီးပစ်ခတ်မှုကြောင့် မြင်းခြံမြို့နယ်အတွင်းမှ ဒေသခံပြည်သူသုံးဦး ထိမှန်သေဆုံးခဲ့ကြောင်း မြင်းခြံမြို့ခံတစ်ဦးက ပြောသည်။
“မီးရှို့ဖျက်ဆီးတယ်လည်းကြားတယ်။ သစ်ရုံကတော့ ရွာတောင်ခြမ်းကအိမ်တွေမရှိသလောက်ပဲတဲ့။”ဟု မြင်းခြံမြို့ခံတစ်ဦးက ပြောသည်။
ရဲဘော်နှင့်ပြည်သူများ ထိခိုက်သေဆုံးမှုများအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
စစ်ကောင်စီတပ်သည် မြင်းခြံခရိုင်အတွင်း လေကြောင်းတိုက်ခိုက်မှုများ ဆက်တိုက်ပြုလုပ်နေပြီး ယခုဒီဇင်ဘာ ပထမပတ်အတွင်း နွားထိုးကြီးမြို့နယ်မှ ပြည်သူ ၁၁ဦး၊ ငါန်းဇွန်မြို့နယ်မှ တော်လှန်ရေးရဲဘော်၂ဦး သေဆုံးခဲ့သေးသည်။
