ကျော်ဇော/People’s Spring
ပဲခူးတိုင်း၊ အုတ်ဖိုမြို့နယ်တွင် ဆိုင်ကယ်များဖြင့်လာသော စစ်ကောင်စီတပ်သားများအား တိုက်ခိုက်ခဲ့ရာ စစ်ဗိုလ်တစ်ဦးအပါအဝင် နှစ်ဦးသေဆုံးပြီး လက်နက်ခဲ့ယမ်းအချို့ရရှိခဲ့ကြောင်း မြေအောက်ပြောက်ကျား တပ်ဖွဲ့-အုတ်ဖိုမှ ပြန်ကြားရေးတာဝန်ခံက ပြောသည်။
ဒီဇင်ဘာ ၄ ရက် နံနက် ၉ နာရီခွဲခန့်က အုတ်ဖိုမြို့နယ်၊ တိမ်မြုပ်ရွာအခြေစိုက် ခမရ(၆)မှ ဆိုင်ကယ်လေးစီးဖြင့်လာသည့် စစ်ကောင်စီတပ်သားများအား စောင့်ကြိုတိုက်ခိုက်ခဲ့ခြင်းဟု ၎င်းက ပြောသည်။
“ဆိုင်ကယ်လေးစီး စကစ (၈)ယောက်။ အဲဒီစကစ ဆိုင်ကယ်တွေတက်လာတာကို ရှေ့ကနေစောင့်ပစ်တာပါ”ဟု တိုက်ခိုက်မှုနှင့်စပ်လျဥ်းပြီး မြေအောက်ပြောက်ကျားတပ်ဖွဲ့-အုတ်ဖိုမှ ပြန်ကြားရေးတာဝန်ခံက ပြောသည်။
Public Service Announcement
ပစ်ခတ်ခံရမှုကြောင့် သေဆုံးသူများတွင် စစ်ကောင်စီတပ်ကြပ်တင်အောင်နှင့် ဗိုလ်ကြီးသိန်းဝင်းဆိုသူနှစ်ဦး ဦးခေါင်းကျည်ထိမှန် သေဆုံးခဲ့ခြင်းဟု ၎င်းက ဆက်ပြောသည်။
တိုက်ခိုက်မှုအတွင်း အပြန်အလှန်ပစ်ခတ်မှု ၈ မိနစ်ခန့်ကြာမြင့်ပြီး ထိခိုက်သေဆုံးမှုမရှိဘဲကျန်နေသည့် စစ်ကောင်စီတပ်သားများမှာ ၎င်းတို့၏ဆိုင်ကယ်များဖြင့် ခလရ(၆)တပ်ဝန်းအတွင်းသို့ ပြန်ဆုတ်သွားကြောင်း စုံစမ်းသိရသည်။
စစ်ကောင်စီတပ်သားများထွက်ပြေးသွားပြီးနောက် ၎င်းတို့ကျန်ရစ်ခဲ့သော MA3 သေနတ်အသစ်တစ်လက်နှင့် ကျည်များအပါအဝင် ခမရ(၆)တပ်၏ လျှို့ဝှက်စာရွက်စာတမ်းများ သိမ်းဆည်းရရှိခဲ့သည်ဟု မြေအောက်ပြောက်ကျားတပ်ဖွဲ့- အုတ်ဖိုက အသိပေးသည်။
ယခုစစ်ဆင်ရေး လုပ်ဆောင်နိုင်ရန် သတင်းပေးပို့ခဲ့သည့် တပ်တွင်းဖရဲသီးအား လေးစားစွာ မှတ်တမ်းတင်အပ်ပြီး ဆက်လက်၍လည်း စစ်ကောင်စီနှင့် ၎င်း၏ထောက်တိုင်များကို ပြင်းပြင်းထန်ထန် အရေးယူသွားမည်ဟု ထုတ်ပြန်ထားသည်။
