ဧပြီ ၁၁၊၂၀၂၅။ဇော်ရမ်း/People’s Spring
စစ်ကောင်စီက စစ်ကိုင်းတိုင်းရှိ ကောလင်းမြို့ သဲချောင်းရွာသစ်အား ယနေ့ (ဧပြီ ၁၁ရက်) နံနက်က လေကြောင်းမှ ဗုံးကြဲတိုက်ခိုက်ခဲ့စဉ် မပေါက်ကွဲဘဲကျန်နေသည့် ဗုံးတစ်လုံးအား ကောလင်းခရိုင် အမှတ်(၁)တပ်ရင်းမှ ရဲဘော်များက တူးဖော်ခဲ့သည်။ ယမန်နေ့က လေ ကြောင်းတိုက်ခိုက်ခံရ၍ အရပ်သားထိခိုက်သေဆုံးမှုရှိခဲ့သော ကောလင်းမြို့နယ်ကို စစ်ကောင်စီက ထပ်မံ၍ လေကြောင်းထပ်မံတိုက်ခိုက်ခဲ့ခြင်းဖြစ်သည်။
သဲချောင်းရွာသစ်သည် ကောလင်းမြို့နယ်အရှေ့ခြမ်း ရွှေဘို-မြစ်ကြီးနားလမ်းဘေး၌ရှိပြီးယနေ့ နံနက် ၃နာရီ ၄၀မိနစ်တွင် စစ်ကောင်စီက လေကြောင်းမှ ဗုံးနှစ်လုံးကြဲချတိုက်ခိုက်ခြင်းဖြစ်သည်။ ကျေးရွာအနီးလယ်ကွင်းအတွင်း ကျရောက်ပြီး တစ်လုံးပေါက်ကွဲကာ တစ်လုံးမှာ မြေကြီးအတွင်း ၁၀ပေခန့်အထိ နစ်မြုပ်သွားခဲ့သည်။ မပေါက်ကွဲဘဲ မြေကြီးအတွင်း နစ်မြုပ်သွားသည့်ဗုံးကို ရဲဘော်များက ရှင်းလင်းခြင်းဖြစ်သည်။ ယနေ့တိုက်ခိုက်မှုတွင် အရပ်သားထိခိုက်မှုမရှိခဲ့ပေ။
မြေပြင်စစ်ရေးလှုပ်ရှားမှုမရှိဘဲ အရပ်သားပြည်သူများအားပစ်မှတ်ထား၍ လေကြောင်းတိုက်ခိုက်ခြင်းဟု ကောလင်းခရိုင် အမှတ်(၁)တပ်ရင်းက ထုတ်ပြန်ထားသည်။
Public Service Announcement
စစ်ကောင်စီသည် ယမန်နေ့ မွန်းလွဲပိုင်း ၁နာရီ ၄၀မိနစ်တွင် ကောလင်းမြို့နယ် အင်ပင်လှကျေးရွာ စာသင်ကျောင်းကို ပေါင် ၅၀၀ဗုံးနှစ်လုံး ကြဲချတိုက်ခိုက်ခဲ့ရာ (၁၄)နှစ်အရွယ် မိန်းကလေးတစ်ဦးသေဆုံးပြီး သုံးဦးဒဏ်ရာရရှိခဲ့သည်။
