ဧပြီ၁၁၊၂၀၂၅။ဇော်ရမ်း/People’s Spring
စစ်ကိုင်းတိုင်း၊ ကောလင်းမြို့နယ်ကို စစ်ကောင်စီက ယနေ့(ဧပြီလ ၁၁ရက်)နံနက်တွင် လေကြောင်းမှ ဗုံးကြဲတိုက်ခိုက်ခဲ့ပြီး စစ်ကောင်စီသည် ကောလင်းမြို့နယ်ကို နှစ်ရက်ဆက် လေကြောင်းမှတိုက်ခိုက်ခဲ့ခြင်း ဖြစ်သည်။
ကောလင်းမြို့နယ်အရှေ့ခြမ်း ရွှေဘို – မြစ်ကြီးနားလမ်းဘေးရှိ သဲချောင်းရွာသစ်အား
ယနေ့ နံနက်စော ၃နာရီ ၄၀မိနစ်တွင် လေကြောာင်းမှ တိုက်ခိုက်ခြင်းဖြစ်သည်။
မြေပြင်စစ်ရေးလှုပ်ရှားမှုမရှိဘဲ အရပ်သားပြည်သူများအားပစ်မှတ်ထား၍ လေကြောင်းတိုက်ခိုက်ခြင်းဟု ကောလင်းခရိုင် အမှတ်(၁)တပ်ရင်း(KLPDF)က သတင်းထုတ်ပြန်သည်။
Public Service Announcement
ဗုံးသီးနှစ်လုံးချတိုက်ခိုက်ခြင်းဖြစ်ပြီး ကျေးရွာအနီး လယ်ကွင်းအတွင်း တစ်လုံးကျရောက်ပေါက်ကွဲပြီး ထိခိုက်ပျက်စီးမှုအနည်းငယ်သာရှိခဲ့သည်ဟု ထုတ်ပြန်သည်။
စစ်ကောင်စီသည် ဧပြီ ၁၀ရက် မွန်းလွဲပိုင်း ၁နာရီ ၄၀မိနစ်ကလည်း ကောလင်းမြို့နယ် အင်ပင်လှကျေးရွာ စာသင်ကျောင်းကို ပေါင် ၅၀၀ ဗုံးနှစ်လုံးကြဲချတိုက်ခိုက်ခဲ့ရာ (၁၄)နှစ်အရွယ် မိန်းကလေးတစ်ဦးသေဆုံးပြီး သုံးဦးဒဏ်ရာရရှိခဲ့သည်။
အင်းတော်မြို့ကို ဆုံးရှုံးပြီးနောက် တပ်မမှူးပါအဖမ်းခံထားရသည့် စစ်ကောင်စီတပ်က အင်းတော်၊ကောလင်း၊ ဝန်းသိုမြို့နယ်အတွင်း လေကြောင်းတိုက်ခိုက်မှုများ ဆက်တိုက်ပြုလုပ်နေသည်။
အင်းတော်မြို့ကို ဧပြီ ၇ရက်တွင် တော်လှန်ရေးပူးပေါင်းတပ်များက တိုက်ခိုက်သိမ်းယူခဲ့ပြီး တပ်မ(၇၇)တပ်မမှူး ဗိုလ်မှူးချုပ်အောင်သက်ဦးနှင့် စစ်သုံ့ပန်းအများအပြားကို ဖမ်းဆီးထားသည်။
စစ်ကောင်စီက လေကြောင်းမှ လာရောက်တိုက်ခိုက်နေပြီး ဧပြီ ၉ရက်က ဝန်းသိုမြို့နယ် နမ်းခမ်းကျေးရွာကိုလေကြောင်းမှ ဗုံးကြဲတိုက်ခိုက်ရာ အမျိုးသမီးနှင့် ကလေးငယ်များအပါအဝင် အရပ်သား ၂၄ဦးသေဆုံးပြီး ဒဏ်ရာရသူများလည်းရှိကြောင်း သတင်းရရှိသည်။
ထို့ကြောင့် စစ်ကောင်စီလေကြောင်းအန္တရာယ်ကို ကောလင်း၊ ဝန်းသိုနှင့် အင်းတော်တနယ်လုံး ဂရုစိုက်ကြရန် တော်လှန်ရေးတပ်ဖွဲ့များက သတိပေးထားသည်။
