ဧပြီ-၁၈။၂၀၂၅။ခွာညို/People’s Spring
တရုတ်အစိုးရ၏အကူအညီနှင့်အတူ စစ်ကောင်စီက လားရှိုးမြို့ထဲသို့ပြန်ဝင်လာသည့် ဧပြီ ၁၈ ရက်နေ့တွင် မိုးကုတ်မြို့အား စစ်ကောင်စီတပ်က ညပိုင်းအထိ Y12ဗုံးကြဲလေယာဉ်ဖြင့် ပတ်ပျံပြီး ကင်းထောက်နေသည်။
“တနေကုန်ပတ်ပျံနေတာ။ လားရှိုးကို သူတို့ ဝင်သွားတာက ပြဿနာ တော်တော်ကိုကြီးပါတယ်။ ရှမ်းမြောက်ရော မိုးကုတ်ကိုပါ စစ်ရေးခြိမ်းခြောက်မှုတွေ နေ့မဆိုင်းဘဲ လုပ်လာတဲ့သဘောပါ” ဟု မိုးကုတ်မြို့ခံတဦးကပြောသည်။
Y12ဗုံးကြဲလေယာဉ်သည်ဧပြီ၁၈ရက်နံနက်ပိုင်းမှစ၍ ပတ်ပျံနေခဲ့ပြီးမိုးကုတ်မြို့နယ် ညောင်ပင်သာရွာကိုညနေ ၄နာရီ၅၀မိနစ်တွင် ဗုံးကြဲခဲ့သည်။ အဆိုပါတိုက်ခိုက်မှု၌ ဒေသခံနှစ်ဦးဒဏ်ရာရရှိခဲ့သည်။
Public Service Announcement
လားရှိုးမြို့သို့ စစ်ကောင်စီတပ်ဖွဲ့ဝင်များမှာ ဧပြီ ၁၈ ရက်နေ့ နံနက်ပိုင်း၌ လားရှိူး- သီပေါပြည်ထောင်စုလမ်းရှိ နောင်မွန်လမ်းပိုင်းမှတဆင့် ဝင်လာသလို ဌာနဆိုင်ရာဝန်ထမ်းအချို့ကိုလည်း ရဟတ်ယာဉ်ဖြင့်လည်း ပို့ဆောင်ခဲ့သည်။
လက်ရှိအခြေအနေများနှင့်ပတ်သက်၍ စစ်ကောင်စီကရော MNDAAကပါ သတင်းထုတ်ပြန်ထားခြင်းမရှိသေးပေ။MNDAA က ၁၀၂၇ စစ်ဆင်ရေးနှင့်အတူ သိမ်းပိုက်ခဲ့ပြီး အုပ်ချုပ်ရေးယန္တရားဖော်ဆောင်နေသည့်လားရှိုးမြို့အား စစ်ကောင်စီထံပြန်ပေးရန် တရုတ်က ဖိအားပေးခဲ့ပြီး ယခုအခါ စစ်ကောင်စီတပ်က ပြန်ဝင်လာခြင်းဖြစ်သည်။ လားရှိုးမြို့သို့ စစ်ကောင်စီပြန်ဝင်လာပါက မြောက်ပိုင်းမဟာမိတ်သုံးဖွဲ့ထိန်းချုပ်ထားသည်မြို့နယ်များကို စစ်ရေးအရ ခြိမ်းခြောက်ခံရလာနိုင်ကြောင်း တော်လှန်ရေးအင်အားစုများနှင့်ဒေသခံများကသုံးသပ်ထားသည်။
မိုးကုတ်မြို့ကို TNLA၊ PDFနှင့် မိုးကုတ်ဗျူဟာက ပြီးခဲ့သည့် ၂၀၂၄ ဇူလိုင် ၂၄ရက်တွင် သိမ်းယူခဲ့ပြီး မြို့နယ်ပြည်သူ့အုပ်ချုပ်ရေးအဖွဲ့နှင့် TNLAတို့က မြို့နယ်အုပ်ချုပ်ရေးနှင့် ပြန်လည်ထူထောင်ရေး ဆောင်ရွက်နေသည်။မိုးကုတ်မြို့ကို မြန်မာနှစ်ဆန်း ၁ရက်နေ့(ဧပြီ ၁၇)နံနက် ၁၀နာရီကလည်း စစ်ကောင်စီက လေကြောင်းမှဗုံးကြဲခဲ့သည်။
