အမေရိကန်နဲ့ ပေါင်းပြီး တရုတ်ကို ထိခိုက် နစ်နာစေတာမျိုး လုံးဝ မလုပ်ဖို့ တရုတ် အစိုးရက ကုန်သွယ်ဖက် နိုင်ငံတွေကို ရည်ရွယ် သတိပေးလိုက်ပါတယ်။
အမေရိကန်မှာ ဒေါ်နယ်လ်ထရမ့် သမ္မတ ဖြစ်လာကတည်းက တရုတ်နဲ့ ကုန်သွယ်ရေး စစ်ပွဲကို အရှိန်မြှင့်ပြီး တရုတ် ကုန်စည်တွေအပေါ် အခွန်ပမာဏ အများအပြားတိုးပြီး ကောက်ခံနေပါတယ်။ အမေရိကန်ရဲ့ အခွန်စည်းကြပ်မှုတွေ မြှင့်တင်တာဟာ တရုတ် တစ်နိုင်ငံတည်းကို ပစ်မှတ်ထားတာ မဟုတ်ဘဲ တခြား အမေရိကန်ရဲ့ ပြိုင်ဘက်တွေရော၊ မိတ်ဆွေ နိုင်ငံတွေကိုပါ သတ်မှတ်လိုက်တာ ဖြစ်ပါတယ်။
အဲဒီအတွက် အမေရိကန်ရဲ့ ကုန်သွယ်ဖက် နိုင်ငံတွေဟာ ထရမ့်ရဲ့ အစိုးရနဲ့ ညှိနှိုင်းဖို့ ကြိုးစားနေပြီး နိုင်ငံပေါင်း ၇၀ ကျော်လောက်က အမေရိကန်နဲ့ စကားပြောဖို့ တန်းစီ စောင့်နေတယ်လို့ ထရမ့်က ကြွေးကြော်ထားပါတယ်။
ထရမ့်ဟာ ကုန်သွယ်ဖက် နိုင်ငံတွေနဲ့ ဆွေးနွေးချိန်မှာ ချော့တစ်ချီ၊ ခြောက်တစ်လှည့်နဲ့ နည်းအမျိုးမျိုးသုံးပြီး တရုတ်နဲ့ ကုန်သွယ်မှုကို လျှော့ချဖို့ ဖိအားပေးတာ၊ အကျပ်ကိုင်တာတွေ ရှိလာနိုင်ကြောင်း စျေးကွက် လေ့လာသူတွေက သုံးသပ်ထားပါတယ်။
Public Service Announcement
အဲဒီ ဖြစ်နိုင်ခြေ အလားအလာကို တရုတ်ကလည်း စိုးရိမ်နေပြီး ဧပြီ ၂၁ ရက်နေ့မှာတော့ တရုတ် စီးပွားရေး ဝန်ကြီးဌာန ပြောရေးဆိုခွင့်ရ အရာရှိ တစ်ဦးက နိုင်ငံအသီးသီး အနေနဲ့ အမေရိကန်ကို လိုက်လျောပြီး တရုတ်ကို ကုန်သွယ်ရေးအရ ထိခိုက်စေမယ့် လမ်းကြောင်းမျိုးတွေ မရွေးကြဖို့ သတိပေးသွားခဲ့ပါတယ်။
နိုင်ငံတစ်ခုခုကို ချော့ပြီး ပေါင်းနေရတာက တကယ်တမ်း စိတ်အေးစရာ မဟုတ်သလို အပေးအယူတွေ လုပ်နေရတာကလည်း စစ်မှန်တဲ့ လေးစားမှုကို ရရှိစေမှာ မဟုတ်ဘူးလို့ အဲဒီ အရာရှိက ပြောပါတယ်။ နိုင်ငံတစ်ခုစီက ကိုယ်တိုင် ခဏတာ သက်သာ ကင်းလွတ်ခွင့်အတွက် တခြားနိုင်ငံတွေ ပိုအထိနာစေမယ့် ညှိနှိုင်းမှုတွေကို လက်ခံတာမျိုး မရှိဖို့ လိုကြောင်း၊ အဆုံးမှာတော့ အဲဒီ ကိစ္စမျိုးဟာ သူတစ်ပါးရော၊ ကိုယ်တိုင်အတွက်ပါ နစ်နာစေနိုင်ကြောင်း တရုတ်က ဆိုပါတယ်။
တရုတ် အနေနဲ့ နိုင်ငံရဲ့ အကျိုးစီးပွားကို ထိခိုက်နစ်နာစေမယ့် သဘောတူညီမှု မှန်သမျှကို ထိထိရောက်ရောက် ဆန့်ကျင်မှာ ဖြစ်ကြောင်း၊ အဲဒီလို အခြေအနေမျိုး တကယ်တမ်း ကြုံလာရင် တရုတ်က လက်မခံဘဲ အသင့်တော်ဆုံး ဖြစ်နိုင်ခြေတွေနဲ့ လက်တုံ့ပြန်ဖို့ ဆုံးဖြတ်ထားကြောင်းလည်း အဲဒီ အရာရှိက ဆက်ပြီး ပြောကြားသွားပါတယ်။
ဒီအတောအတွင်း တရုတ် သမ္မတ ရှီကျင့်ဖျင်ဟာ အရှေ့တောင်အာရှ နိုင်ငံတချို့ဆီ ခရီးလှည့်လည်ခဲ့ပြီး အမေရိကန် အစိုးရရဲ့ ကုန်သွယ်ရေးဆိုင်ရာ ဖိအားပေးမှုတွေကို လိုက်လျော အလျှော့ပေးတာမျိုး မလုပ်ဖို့ စည်းရုံးရေး ဆင်းနေခဲ့ပါတယ်။
ကုန်သွယ်ရေးအရ တရုတ်ကို အကြီးအကျယ် ရန်လို ဖိအားပေးနေတဲ့ ထရမ့်ရဲ့ မူဝါဒတွေကြောင့် လက်ရှိ အချိန်မှာတော့ ကမ္ဘာ့နိုင်ငံ အများအပြားဟာ တရုတ်နဲ့ အမေရိကန်တို့ကြားမှာ ဘေးကျပ်နံကျပ်ဖြစ်မယ့် အနေအထားမျိုးဆီ ဖိအားပေး တွန်းပို့တာ ခံလာရပါတယ်။
ကိုးကား: CNN
