မေ ၉ ၊၂၀၂၅/People’s Spring
ကရင်အမျိုးသားအစည်းအရုံး(KNU)နယ်မြေရှိ စစ်ကောင်စီ၏ ထီးထာဗျူဟာစခန်းနှင့် ထီးခီးဗျူဟာစခန်းအား ကရင်အမျိုးသားလွတ်မြောက်ရေးတပ်မတော် (KNLA)ပူးပေါင်းတပ်များက သိမ်းပိုက်ခဲ့ကြောင်း KNUက ယနေ့(မေ ၉ရက်) ထုတ်ပြန်သည်။
မြိတ်−ထားဝယ်ခရိုင်၏ ခရိုင်ဌာနချုပ်နှင့် တပ်မဟာဌာနချုပ်ဟောင်းတည်ရှိရာ ထီးခီးဒေသအား အလုံးစုံပြန်လည်သိမ်းပိုက်နိုင်ခြင်းဟု KNU က ဆိုသည်။
ကရင်အမျိုးသားအစည်းအရုံး၊ ကော်သူးလေအုပ်ချုပ်နယ်မြေ၊ မြိတ်−ထားဝယ်ခရိုင်၊ ထီးခီးဒေသ အတွင်းရှိ ထီးထာဗျူဟာစခန်းအား ပြီးခဲ့သည့် ဧပြီ ၁၉ရက် နှင့် ထီးခီးဗျူဟာစခန်းအား ယနေ့(မေ ၉ရက်) နံနက်တွင် ကရင်အမျိုးသားလွတ်မြောက်ရေးတပ်မတော် (K.N.L.A)နှင့် ကရင်အမျိုးသား ကာကွယ်ရေးတပ်ဖွဲ့ (K.N.D.O)ဦးဆောင်သော တော်လှန်ရေး ပူးပေါင်းတပ်များက အလုံးစုံသိမ်းပိုက် ရရှိခဲ့သည်ဟု KNUက ထုတ်ပြန်သည်။
Public Service Announcement
ထီးခီးဒေသတွင် မြိတ်−ထားဝယ်ခရိုင်၏ ခရိုင်ဌာနချုပ် နှင့် တပ်မဟာဌာနချုပ် တည်ဆောက်ရန် ၁၉၇၄တွင် စတင်စီစဉ်ခဲ့၍ ၁၉၇၅တွင် စတင်တည်ဆောက်ခဲ့ရာ ထီးခီးဒေသတွင် ခရိုင်ဌာနချုပ် နှင့် တပ်မဟာ ဌာနချုပ်ရုံးများတည်ရှိပြီး ထီးထာ၌ ခရိုင်ဌာနချုပ် နှင့် တပ်မဟာ ဌာနချုပ်တွင် တာဝန်ထမ်းဆောင်နေသော ရုံးအဖွဲ့ဝင်များ၏ မိသားစုဝင်များ နေထိုင်ခဲ့ကြသည်ဟု ထုတ်ပြန်တွင် ဖော်ပြသည်။
၁၉၉၇တွင် မြန်မာ့တပ်မတော် တပ်မ (၅၅)နှင့် တပ်မ (၆၆)ဦးဆောင်သော တပ်ရင်း (၂၀)ခန့်မှ မေဂျာအော်ပရေးရှင်းအနေဖြင့် ထီးခီးဒေသအား စတင်ထိုးစစ်ဆင်တိုက်ခိုက်ခဲ့သောကြောင့် ၁၉၉၇တွင် ထီးခီးဒေသအား လက်လွှတ်ခဲ့ရသည်ဟု ဆိုသည်။
လက်ရှိအချိန်တွင် ကေအဲန်ယူ−ကရင်အမျိုးသားအစည်းအရုံးအနေဖြင့် လက်လွှတ်ခဲ့ရသော ထီးခီးဒေသအား ပြန်လည်သိမ်းပိုက်နိုင်ခဲ့ပြီး ဒေသတွင်း ပြည်သူလူထုများ၏ အသက်အိုးအိမ်များကာကွယ်ရေး ဆက်လက်လုပ်ဆောင်သွားမည်ဟု KNUက အသိပေးသည်။
