ဇူလိုင်-၂၃၊ ၂၀၂၅။ ထားမြတ်/People’s Spring
တောင်တရုတ်ပင်လယ်ပြင်မှ ဖြစ်ပေါ်လာသည့်အပူပိုင်းမုန်တိုင်းဝီဖာ ၏ အရှိန်ကြောင့် မိုးကြီးခြင်း မြေပြိုခြင်း၊ရေကြီးခြင်းများ ကြုံတွေ့ရနိုင်၍ သဘာ၀ဘေးကိုပြည်သူများချက်ချင်းသတိမူပြီးကြိုတင် ပြင်ဆင်ရန် ကရင်အမျိုးသားအစည်းအရုံး(KNU)က ယနေ့ (ဇူလိုင် ၂၃ရက်)တွင် ကြေညာချက် ထုတ်ပြန်သည်။
မုန်တိုင်းအရှိန်ကြောင့် ကရင်ပြည်နယ်အပါအဝင် မြန်မာနိုင်ငံရှိ ပြည်နယ်နှင့် တိုင်းဒေသကြီး ၈ခုရှိ ဒေသများတွင် နေရာကွက် မိုးကြီးနိုင်ကြောင်း အမျိုးသားညီညွတ်ရေးအစိုးရ၊ လူသားစာနာနှင့် ဘေးအန္တရာယ် စီမံခန့်ခွဲရေးဝန်ကြီးဌာနက အသိပေးထားသည်။
မုန်တိုင်းအရှိန်ကြောင့်အလွန်ပြင်းထန်သော မိုးရွာခြင်း၊လေပြင်းတိုက်ခတ်ခြင်းနှင့် ရေလွှမ်းမိုးခြင်းများကို ဖြစ်စေနိုင်ကြောင်း၊ မြေနိမ့်ပိုင်းဒေသများ ၊ မြစ်များအနီးရှိ နေရာများနှင့် တောင်ကုန်းများတွင် ရုတ်တရက်ရေကြီးခြင်းနှင့် မြေပြိုခြင်းများ ကြုံတွေ့ရနိုင်ကြောင်း KNUက သတိပေးပြီး လေပြင်းတိုက်ခတ်မှုကြောင့် နေအိမ်များ၊ ဓာတ်အားလိုင်းများ၊ သစ်ပင်များနှင့် လယ်ယာများ ပျက်စီးနိုင်ကြောင်း ကြေညာချက်၌ ဖော်ပြသည်။
Public Service Announcement
“သက်ရောက်မှုများသည် ကျွန်ုပ်တို့၏ ဘေးကင်းရေး၊ အစားအသောက်ထောက်ပံ့မှုနှင့် သယ်ယူပို့ဆောင်ရေးတို့ကို အကြီးအကျယ်ထိခိုက်စေနိုင် သည်”ဟု ထုတ်ပြန်ထားသည်။
ထို့အပြင်ရေသန့်၊ အစားအစာခြောက်၊ဆေးဝါးများ၊ ဓာတ်မီးများ၊ဘက်ထ ရီများနှင့် အရေးကြီး စာရွက်စာတမ်းများကို ရေစိုခံအိတ်များတွင် သိမ်း ဆည်းထားသည့် အရေးပေါ်ကိရိယာအစုံကို ပြင်ဆင်ထားရန် KNUက တိုက်တွန်းသည်။
” သင့်မိသားစုနှင့်အတူ ရွှေ့ပြောင်းရေးလမ်းကြောင်းကို စီစဉ်ထားကာ အမြန်ပြောင်းရွှေ့ရန် လိုအပ်ပါက အနီးဆုံး ဘေးကင်းလုံခြုံသော နေရာသို့ ပြောင်းရွှေ့ပါ။ သင်မွေးမြူထားသော တိရစ္ဆာန်များနှင့် အဖိုးတန်ပစ္စည်းများကို ပိုမိုလုံခြုံသောနေရာများသို့ ရွှေ့ပြောင်းခြင်းဖြင့် ကာကွယ်ပါ”ဟု KNU ၏ ထုတ်ပြန်ချက်၌ ပါရှိသည်။
ဒေသတွင်း ရေဒီယိုများ သို့မဟုတ် ယုံကြည်ရသော သတင်းရင်းမြစ်များကို နားဆင်ခြင်းဖြင့် အချက်အလက်များ ကိုရယူရန်၊ ထို့အပြင်အိမ်နီး ချင်းများ အထူးသဖြင့် သက်ကြီးရွယ်အိုများ၊ မသန်စွမ်းသူများနှင့် ကလေးသူငယ်များရှိသော မိသားစုများကို ဂရုစိုက်၍ တစ်ဦးနှင့်တစ်ဦး ဘေးကင်းလုံခြုံအောင်နေရန် တိုက်တွန်းထားသည်။
ယခု သတိပေးချက်ကို အလေးအနက်ထားရန် KNUက တိုက်တွန်းထားပြီး ဘေးအန္တရာယ် လျော့ပါးစေရေး၊ နှင့် ပြည်သူကိုကာကွယ်ရေး အတူ တကွ ပြင်ဆင်ထားကြရန်လိုအပ်ကြောင်း ဖော်ပြသည်။
ကရင်ပြည်နယ်၊ မြဝတီမြို့တွင်လည်း သောင်ရင်းမြစ်ရေကြီးမှုကြောင့် မြို့ရပ်ကွက်များအတွင်း ရေများဝင်ရောက်နေပြီး ဒေသခံအချို့ အရေးပေါ်ရွေ့ပြောင်းမှုများ ပြုလုပ်လျှက်ရှိသည်။
