ဩဂုတ်−၁၇၊ ၂၀၂၅။ ထားမြတ်/People’s Spring
ချင်းပြည်နယ်၊ ကန်ပက်လက်မြို့ကို အာဏာသိမ်းစစ်ကောင်စီက ယနေ့ (ဩဂုတ် ၁၇ရက်)နံနက်တွင် လေကြောင်း တိုက်ခိုက်ခဲ့ရာ နေအိမ်ပျက်စီးမှုရှိခဲ့ပြီး လူသေဆုံးထိခိုက်မရှိဟု ဒေသသတင်းရင်းမြစ်က ပြောသည်။
ချင်းညီနောင်မဟာမိတ်များက ၂၀၂၄ ဒီဇင်ဘာတွင် သိမ်းပိုက်ထားသည့် ကန်ပက်လက်မြို့ကို စစ်ကောင်စီက အခါအားလျော်စွာ လေကြောင်းဗုံးကြဲတိုက်ခိုက်မှုများ ပြုလုပ်နေခြင်းဖြစ်ပြီး ယနေ့မနက် ၇နာရီခန့်တွင် တိုက်လေယာဉ်ဖြင့် နေရာ ၂နေရာကိုလေကြောင်းတိုက်ခိုက်ခဲ့ခြင်းဖြစ်သည်ဟုဆိုသည်။
“လူကတော့ အထိအခိုက် အသေအဆုံးမရှိဘူး ကြားတယ်” ဟု ကန်ပက်လက်မြို့ခံတဦးက ပြောသည်။
Public Service Announcement
လေကြောင်းတိုက်ခိုက်ခံရ၍ပျက်စီးသွားသည့်နေအိမ်အချို့၏ မှတ်တမ်းကိုလည်း ဒေသခံတို့က လူမှုကွန်ရက်၌ ဖော်ပြထားသည်။
စစ်ကောင်စီက ကန်ပက်လက်ကို အစီအစဉ်တကျ လေကြောင်း တိုက်ခိုက်နေခြင်းဖြစ်ဟု ၎င်းက သုံးသပ်သည်။ စစ်ကောင်စီသည် မကွေးတိုင်းမှ ချင်းပြည်သို့ ဦးတည်သည့် စစ်ကြောင်းများ အင်အားအလုံးအရင်းဖြင့် ချီတက်လာနေသည်ဟု ဆိုသည်။
“အခု ဆိပ်ဖြူဘက်က စစ်ကြောင်းရော ပေါက်ဘက်ကရော ထိုးနေတာရှိတယ်။ ဆောမြို့ပေါ်မှာလည်း စစ်သားတွေ အပြင်ထွက်ကြတယ် ကြားမိတယ်။ အရပ်ဝတ်နဲ့လည်း အများကြီး ဝင်လာတာ ရှိတယ် လည်းကြားတော့ ဒေသတွင်းမှာတော့ အရမ်းစိုးရိမ်နေကြတာ” ဟု ကန်ပက်လက် ဒေသခံက ပြောသည်။
ချင်းညီနောင်မဟာမိတ်များသည် ကန်ပက်လက်၊ ကျင်ဒွေး၊ မင်းတပ်၊ မတူပီစသည့် ချင်းတောင်ပိုင်းရှိ မြို့များအားလုံးကို သိမ်းပိုက်ထိန်းချုပ်ထားခြင်းဖြစ်ရာ စစ်ရှုံးထားသည့် စစ်ကောင်စီက မင်းတပ်၊ကန်ပက်လက် မြို့များရှိပြည်သူနေအိမ်နှင့် အစိုးရ အဆောက်အဦးများကို လေကြောင်း ဗုံးကြဲတိုက်ခိုက်မှုများ ယခင်ကလည်း ပြုလုပ်ခဲ့ဖူးသည်။
စစ်ကောင်စီသည်ယနေ့ဩဂုတ်၁၇ရက်တွင် ကရင်နီပြည်နယ်၊ ဖားဆောင်းမြို့နယ်၊မော်ချီးဒေသ လေကြောင်းတိုက်ခိုက်တိုက်ခိုက်ရာ သေဆုံးသူ အရပ်သား ၂၂ ဦးအထိရှိလာကြောင်း ကရင်နီပြည်ကြားကာလအုပ်ချုပ်ရေးကောင်စီ(IEC)တွဲဖက်အတွင်း ရေးမှူးဦးဗညားက ပြောသည်။
ထို့အပြင်ယနေ့ နံနက်ပိုင်းတွင်လည်းမိုးကုတ်မြို့အားလေကြောင်းမှ ဗုံးကြဲတိုက်ခိုက်ခဲ့ရာ ကလေးငယ်တစ်ဦး အပါအဝင် ၃ဦး သေဆုံးခဲ့ကြောင်း တအာင်းတပ်မတော်(TNLA)က သတင်းထုတ်ပြန်ထားသည်။
