ကိုဗစ်ရောဂါ ဖြစ်ပွားနေသူ တစ်ဦးနဲ့ ထိတွေ့မှု ရှိခဲ့တဲ့နောက် ကုလသမဂ္ဂ အကြီးအကဲ အန်တိုနီယို ဂူတာရက်စ်ဟာ သီးသန့်ခွဲခြား နေထိုင်ပြီး Quarantine ဝင်နေကြောင်း သိရပါတယ်။
အသက် ၇၂ နှစ်အရွယ် ဂူတာရက်စ်ဟာ ဆေးစစ်ရလဒ် Positive ထွက်ခဲ့တဲ့ ကုလသမဂ္ဂ အမှုထမ်း တစ်ဦးနဲ့ ထိတွေ့မိခဲ့တာ ဖြစ်ပါတယ်။ သူဟာ နောက်ထပ် ရက်အတော်ကြာအောင် Quarantine ဝင်နေရမှာ ဖြစ်ပါတယ်။
မူလက ဂူတာရက်စ်ဟာ ကုလသမဂ္ဂ ပြန်ကြားရေး အဖွဲ့ရဲ့ နှစ်ပတ်လည် မိတ်ဆုံစားပွဲကို ဂုဏ်ထူးဆောင် ဧည့်သည်တော် အနေနဲ့ တက်ရောက်ဖို့ စီစဉ်ထားပါတယ်။ အခုတော့ မက်ဟမ်တန်မှာ ပြုလုပ်မယ့် အဲဒီပွဲကို မသွားဖြစ်တော့ကြောင်း ဂူတာရက်စ်ရဲ့ ရုံးအဖွဲ့က အတည်ပြုပါတယ်။
ဒါ့အပြင် နိုက်ဂျား သမ္မတ မိုဟာမက် ဘာဇွမ် ဦးဆောင်ပြီး ပြုလုပ်မယ့် ကုလသမဂ္ဂ လုံခြုံရေး ညီလာခံ ဆွေးနွေးပွဲနဲ့ပါ လွဲချော်မယ့် သဘော ရှိနေပါတယ်။ ဘာဇွမ်ဟာ လောလောဆယ် နယူးယောက်ကို ရောက်ရှိနေပြီး အဲဒီကနေတဆင့် ဝါရှင်တန်မှာ အမေရိကန် သမ္မတ ဂျိုးဘိုင်ဒန်နဲ့ တွေ့ဆုံဖို့ စီစဉ်ထားပါတယ်။
Public Service Announcement
လတ်တလောမှာ ဂူတာရက်စ်ရဲ့ ကျန်းမာရေး အခြေအနေ ဘယ်လိုရှိသလဲ ဆိုတာကိုတော့ ရှင်းရှင်းလင်းလင်း မသိရသေးပါဘူး။ ကုလသမဂ္ဂ အတွင်းရေးမှူးချုပ်ရဲ့ ပြောရေးဆိုခွင့်ရ အရာရှိ ဖြစ်တဲ့ စတီဖန် ဒူဂျာရစ်ကလည်း ဒီအကြောင်းကို မှတ်ချက်ပေးဖို့ ငြင်းဆန်သွားပါတယ်။
မကြာသေးခင်ကတော့ ဒူဂျာရစ်က ဂူတာရက်စ်ဟာ ကာကွယ်ဆေး တတိယမြောက်တစ်လုံးကို Boosterအဖြစ် ထိုးနှံထားပြီးကြောင်း ထုတ်ပြန်ထားပါတယ်။ ကမ္ဘာပေါ်မှာ ကာကွယ်ဆေး တစ်လုံးတောင် မထိုးရသေးတဲ့သူ သန်းပေါင်းများစွာ ရှိနေသေးတာကြောင့် ကုလသမဂ္ဂ အတွင်းရေးမှူးချုပ် အနေနဲ့ တတိယတစ်လုံး ဆေးထိုးခံဖို့ အချိန် အကြာကြီး ချီတုံချတုံ စဉ်းစားနေခဲ့တယ်လို့လည်း ဒူဂျာရစ်က ပြောကြားသွားပါတယ်။
