'/%3E%3C/svg%3E){kind=small}
တနင်္သာရီတိုင်းအတွင်းရှိ စစ်ရေးတင်မာနေသောမြို့နယ်သုံးမြို့နယ်တွင် မလိုအပ်ဘဲ ခရီးမသွားရန် ဒေသခံပြည်သူ့ကာကွယ်ရေးတပ်ဖွဲ့များက ပြည်သူ လူထုထံ ယနေ့ မနက်ပိုင်းတွင်မေတ္တာရပ်ခံသည်။
ထားဝယ်ခရိုင်မှ သရက်ချောင်းမြို့နယ်နှင့် မြိတ်ခရိုင်မှ ပုလောနှင့် တနင်္သာရီမြို့နယ်တို့ဖြစ်ပြီး ဒေသခံကာကွယ်ရေးတပ်များ၏ သတိပေးချက်များကို လိုက်နာပေးကြရန် မေတ္တာရပ်ခံထားသည်။
အကြမ်းဖက်စစ်ကောင်စီနှင့်ရင်ဆိုင်တိုက်ပွဲများ၊ပြောက်ကျားစစ်ပွဲများရှိနေခြင်းကြောင့် စစ်ရေးသတိရှိကြရန်လည်း ပြည်သူများကို သတိပေးထားသည်။
“မနေ့ညက ပုလောဘက်မှ တိုက်ပွဲဖြစ်ကြလို့ ပြည်သူတွေ ခရီးမသွားကြဖို့ အချင်းချင်းသတိပေးထားကြတာ။ သရက်ချောင်းမှာဆိုရင် မြို့ပြင်မထွက်ဖို့တောင် သတိပေးတာတွေရှိတယ်”ဟုသရက်ချောင်းမြို့ခံတစ်ဦးကပြောသည်။
Public Service Announcement
အကြမ်းဖက်စစ်ကောင်စီတပ်များသည်တနင်္သာရီတိုင်း၊ မြိတ်ခရိုင်ရှိ KNU တပ်မဟာ ၄ နယ်မြေများဖြစ်သည့် ကဗျာရွာနှင့် ဝတ်ဖျားရွာအတွင်းသို့ မနေ့ညပိုင်းကစ၍ စစ်ကြောင်းထိုးဝင်ရောက်လာကြောင်း ဒေသခံများကပြောသည်။
စစ်ကြောင်းထိုးဝင်ရောက်လာသည့် အကြမ်းဖက်စစ်ကောင်စီတပ်များကို ဒေသခံကာကွယ်ရေးတပ်များကဆီး ကြိုမိုင်းဆွဲတိုက်ခိုက်မူကြောင့် အကြမ်းဖက်စစ်သား ၄ ဦးသေဆုံးသွားသည်ဟု ဒေသခံတွင်း မီဒီယာများတွင်ဖော်ပြထားသည်။ ထိုသို့မိုင်းဆွဲတိုက်ခိုက်မူကြောင့် ည ၇ နာရီ ခွဲမှ ၁၀ နာရီအထိတိုက်ပွဲဖြစ်ပွားခဲ့သည်။
စစ်ကောင်စီတပ်ကို ပြည်သူ့ကာကွယ်ရေးတပ်မတော်နှင့်ပုလောဒေသခံပြည်သူ့ကာကွယ်ရေးတပ်ဖွဲ့ (PPDF)တို့ပူးပေါင်းတိုက်ခိုက်ခြင်းဖြစ်သည်ဟု ဒေသခံကာကွယ်ရေးတပ်များထံမှ သိရသည်။ ထိုတိုက်ပွဲအတွင်း ပြည်သူ့ကာကွယ်ရေးတပ်ဖွဲ့များ ထိခိုက်မရှိဟုလည်းဆိုသည်။
ဒေသခံများပြောကြားချက်အရ အကြမ်းဖက်စစ်ကောင်စီ တပ်များသည် ပဝတ်ဖျားကျေးရွာအတွင်း ပြည်သူပိုင် အိမ် ၅လုံးထက်မနည်းကို မီးရှို့ဖျက်ဆီးခဲ့သည်ဟုသိ့ရသည်။
KNUနယ်မြေအတွင်း စစ်ကြောင်းထိုးလာသည့် အကြမ်းဖက်စစ်ကောင်စီတပ်မှ ပုလောမြို့နယ်ရှိ ၂၈၅တပ်ရင်းဖြစ်ပြီး အင်အား ၂၀၀ကျော်ပါဝင်သည်ဟု ဒေသခံများထံမှသိရသည်။
ထားဝယ်ခရိုင် သရက်ချောင်းမြို့နယ်တွင်လည်းအကြမ်းဖက်စစ်ကောင်စီတပ်များနှင့် ဒေသခံပြည်သူ့ကာကွယ်ရေးတပ်ဖွဲ့တို့ကြား ဇန်နဝါရီ ၇ ရက်က တိုက်ပွဲများဖြစ်ပွားခဲ့ပြီး အကြမ်းဖက်စစ်ကောင်စီက ဆယ်ကျော်သက်လူငယ် ၃ဦးအပါအဝင် ပြည်သူ ၄ဦးကို အကြောင်းမဲ့ပစ်သတ်ခဲ့သည်။
