အာဏာသိမ်းစစ်ကောင်စီလက်အောက်ခံ ကရင်နယ်ခြားစောင့်တပ်ဖွဲ့(BGF) တပ်စခန်းတစ်ခုကို ယမန်နေ့က တိုက်ခိုက်သိမ်းပိုက်လိုက်ကြောင်း ကရင်အမျိုးသားအစည်းအရုံး(KNU) သတင်းရင်းမြစ်က အတည်ပြုသည်။
ကရင်ပြည်နယ် ဖာပွန်မြို့န် မဲပလိရွာ တွင် အခြေစိုက်သည့် BGF အမှတ် ၁၀၁၄ တပ်ရင်း၏ တပ်စခန်း တစ်ခုကို KNU တပ်မဟာ(၅) တပ်ဖွဲ့က ဇန်နဝါရီ ၁၆ရက် တွင် တိုက်ခိုက်သိမ်းပိုက်ပြီး မီးရှို့ ဖျက်ဆီးခဲ့ကြောင်း၊ BGF တပ်ဖွဲ့ဝင် တစ်ဦးကို အရှင်ဖမ်းမိကြောင်း ကရင်အမျိုးသားလွတ်မြောက် ရေးတပ်မတော်(KNLA) တပ်မှူး တစ်ဦးနှင့် နီးစပ်သူကို ကိုးကားပြီး Salween Press က ဖော်ပြခဲ့သည်။
အဆိုပါ သတင်းဖော်ပြမှုအပေါ် KNU ဗဟိုမှ သတင်းရင်းမြစ်က “ အဲဒါ အတည်ပြုလို့ရပါတယ်” ဟု ပြောသည်။
(BGF စခန်းကို တိုက်ခိုက်သိမ်းပိုက်ပြီးနောင်မီးရှို့ခဲ့သည်) (BGF စခန်းကို တိုက်ခိုက်သိမ်းပိုက်ပြီးနောင်မီးရှို့ခဲ့သည်)
ကရင် BGF တပ်များ ဇန်နဝါရီ ၁၅ရက်မှစ၍ စစ်ကောင်စီနှင့် ပူးပေါင်းဆောင်ရွက်မှု မပြုလုပ်ရန်နှင့် အကယ်၍ ပြည်သူလူထု အကျိုးကို မကြည့်ဘဲ စစ်ကောင်စီနှင့်ပူးပေါင်းပါက ကရင်အချင်းချင်း ဖြစ်သော်လည်း တိုက်ခိုက်ရတော့မည်ဟု တပ်မဟာ(၅)က ကြေညာခဲ့ပြီးနောက် ဇန်နဝါရီ ၁၆ရက်တွင် BGF တပ်စခန်းတစ်ခုကို စတင်တိုက်ခိုက်ခြင်းဖြစ်သည်။
Public Service Announcement
“အစတုန်းကတော့ ကိုယ့်လူမျိုးပေါ့နော် တစ်ဖက်အနေနဲ့ ဘယ်လိုပဲ ဖြစ်ဖြစ် ရှောင်တော့ရှောင်တယ်။ ဒါပေမဲ့ အခုတော့ ရန်သူလိုပဲ သဘောထားတဲ့သဘောပဲပေါ့။ အဓိကတော့ စစ်ကောင်စီနဲ့ ပူးပေါင်းဆောင်ရွက်လို့ပေါ့” ဟု KNU သတင်းရင်းမြစ်က ပြောသည်။
အဆိုပါ စခန်းသိမ်းတိုက်ပွဲ၌ ထိခိုက်ကျဆုံးမှု အခြေအနေ အသေးစိတ်ကိုမသိရသေးကြောင်း၊ လက်နက်ခဲယမ်းရရှိမှု ရှိနိုင်နိုင်ကြောင်း ၎င်းက ဆိုသည်။
KNU တပ်မဟာ(၅)နယ်မြေတွင် စစ်ကောင်စီတပ်နှင့် ၎င်း၏ လက်အောက်ခံ BGF တပ်များကို KNU လက်အောက်ခံ KNLAနှင့် ကရင်အမျိုးသားကာကွယ်ရေးတပ်(KNDO)တို့က ခုခံတိုက်ခိုက်လျက်ရှိရာ ယခုလဝက်အတွင်း တိုက်ပွဲ ၁၂၀ ခန့်ဖြစ်ပြီး စစ်ကောင်စီတပ်က ၅၀ ကျော်သေဆုံးကာ ၄၀ ကျော်ဒဏ်ရာရရှိခဲ့သည်ဟု တပ်မဟာ(၅)က ထုတ်ပြန်ထားသည်။
