ကရင်အမျိုးသားအစည်းအရုံး(KNU) တပ်မဟာ(၅)နယ်မြေရှိ စစ်ကောင်စီတပ်နှင့် ၎င်း၏ လက်အောက်ခံ ကရင်နယ်ခြားစောင့်တပ်ဖွဲ့(BGF) တပ်ကို တိုက်ခိုက်မှုများ ဆက်လက်လုပ်ဆောင်ခဲ့ရာ စစ်ကောင်စီတပ်မှ သေဆုံးထိခိုက်မှုရှိခဲ့ကြောင်း တပ်မဟာ(၅)က ယနေ့ထုတ်ပြန်သည်။
ဖာပွန်ခရိုင်အတွင်း ဇန်နဝါရီ ၂၂ရက်က စစ်ရေးအခြေအနေကို ဖော်ပြရာ ယင်းနေ့တစ်ရက်တည်း စစ်ကောင်စီနှင့်ပတ်သက်သည့် ပစ်မှတ်ခြောက်ခုထက်မနည်းကို တိုက်ခိုက်ခဲ့သည်ဟု ဆိုသည်။
စစ်ကောင်စီလက်အောက်ခံ BGF၏ ဃော်ဝါးထဒေသရှိ လမ်းဂိတ်စောင့်တပ်များကို တပ်မဟာ(၅)တပ်ဖွဲ့ဝင်များကတိုက်ခိုက်ခဲ့ရာ ဖာပွန်ခရိုင်အနောက်ဘက်ကမ်းဒေသနှင့်သစ်တပင်ကုန်းတပ်စခန်း တိုက်ခိုက်မှုဖြစ်စဉ်တွင် စစ်ကောင်စီတပ်မှ လေးဦးသေဆုံးပြီး ခြောက်ဦးဒဏ်ရာရရှိခဲ့သည်ဟု ထုတ်ပြန်သည်။
ထို့အပြင်လလွယ်မူပလောဒေသ၌ တစ်ကြိမ်၊ ထီးတကလို ကုန်းဒေသ၌ တစ်ကြိမ်၊ ဝါးပလားခို ဒေသ၌ တစ်ကြိမ်ဝင်ရောက်တိုက်ခိုက်ရာ စစ်ကောင်စီတပ်ဘက်က လေးဦးသေပြီး တစ်ဦးဒဏ်ရာရရှိခဲ့သည်ဟု ဖော်ပြသည်။
Public Service Announcement
စစ်ကောင်စီတပ်နှင့် BGF တပ်များကလည်း ဒေသခံများ နေထိုင်ရာနေရာများသို့ လက်နက်ကြီးများ ပစ်ခတ်ခြင်း၊ ဒေသခံများကို ခြိမ်းခြောက်ခြင်းများလုပ်ဆောင်ခဲ့ကြောင်း တပ်မဟာ(၅)က ထုတ်ပြန်သည်။
