အရေးယူ ပိတ်ဆို့မှုတွေကြောင့် အကျပ်ရိုက်နေတဲ့ ရုရှား အစိုးရကို အကူအညီပေးရင် နောက်ဆက်တွဲ အကျိုးဆက်တွေ ကြုံရစေမယ်လို့ တရုတ်ကို အမေရိကန်က သတိပေးလိုက်ပါတယ်။
ယူကရိန်း နိုင်ငံကို ကျူးကျော် စစ်ပြုခဲ့တဲ့နောက် ရုရှား သမ္မတ ဗလာဒီမာ ပူတင်နဲ့ အစိုးရ အဖွဲ့ အရာရှိတွေ၊ ရုရှားက လုပ်ငန်းရှင် သူဌေးကြီးတွေနဲ့ ဘဏ်လုပ်ငန်းတွေ၊ ရေနံလုပ်ငန်းတွေကို အမေရိကန်၊ ဗြိတိန်နဲ့ ဥရောပ သမဂ္ဂတို့က ပြင်းပြင်းထန်ထန် အရေးယူ ပိတ်ဆို့နေပါတယ်။
ဒီပိတ်ဆို့မှုတွေကြောင့် အကျပ်ရိုက်နေတဲ့ ရုရှား အစိုးရဟာ တရုတ်ကို ချဉ်းကပ် အကူအညီ တောင်းနေတယ်လို့ အမေရိကန်က ပြောပါတယ်။ တကယ်လို့ တရုတ်ကသာ ရုရှားကို အကူအညီတွေ ပေးလာမယ်ဆိုရင် တရုတ်လည်း ရုရှားလိုပဲ ဆိုးကျိုး ရိုက်ခတ်မှုတွေ ကြုံရစေမယ်လို့ အမေရိကန် အစိုးရရဲ့ အမျိုးသား လုံခြုံရေး အကြံပေး အရာရှိ ဂျိတ်ခ် ဆူလီဗန်က CNNနဲ့ အင်တာဗျူးမှာ မှတ်ချက် ပေးသွားခဲ့ပါတယ်။
ရုရှားက အကူအညီ တောင်းနေတယ်ဆိုတဲ့ အမေရိကန် စွပ်စွဲချက်တွေကို တရုတ် နိုင်ငံခြားရေး ဝန်ကြီးဌာနက အတည်မပြုခဲ့ပါဘူး။ ဒါ့အပြင် တရုတ်နဲ့ ပတ်သက်လို့ နိုင်ငံတကာမှာ အထင်အမြင် လွဲမှားသွားအောင် အမေရိကန်က ရည်ရွယ်ချက်ရှိရှိ ဝါဒဖြန့်နေတယ်လို့ တန်ပြန် စွပ်စွဲခဲ့ပါတယ်။
Public Service Announcement
အမေရိကန် သတင်းဌာနကတွေ ရုရှားဟာ ပြီးခဲ့တဲ့ ရက်ပိုင်းအတွင်း တရုတ်ဆီက အကူအညီတွေ၊ အထူးသဖြင့် စစ်လက်နက်ပစ္စည်း ထောက်ပံ့မှုတွေ တောင်းခံခဲ့တယ်လို့ ဖော်ပြနေကြပါတယ်။ ဆူလီဗန်ကတော့ အမေရိကန်ဟာ ဘက်ပေါင်းစုံ ဖိအားပေး ပိတ်ဆို့ထားတဲ့ ရုရှားကို ဘယ်လိုနည်းနဲ့မှ လွတ်လမ်းရှာခွင့် ပေးမှာ မဟုတ်ဘူးလို့ သတိပေးခဲ့ပါတယ်။
ယူကရိန်း ကျူးကျော်စစ်ပွဲ မစခင် ကတည်းက ရုရှား သမ္မတ ပူတင်ဟာ တစ်ခုခု ကြိတ်ကြံနေမှန်း တရုတ် အစိုးရကလည်း သိရှိထားပြီး ဖြစ်နိုင်ကြောင်း၊ အခု အခြေအနေမှာ ဝင်ပါမိရင် ကြုံလာမယ့် နောက်ဆက်တွဲ အကျိုးဆက်တွေကိုလည်း တရုတ်က နားလည်မယ်လို့ ယူဆကြောင်း ဆူလီဗန်က ပြောပါတယ်။
တရုတ် နိုင်ငံခြားရေး ဝန်ကြီးဌာန ပြောရေးဆိုခွင့်ရ အရာရှိ ရှောင်လီကျန်းကတော့ အမေရိကန်ဟာ ယူကရိန်း ပဋိပက္ခကို အကြောင်းပြုပြီး တရုတ်ကို အပုပ်ချ ဝေဖန် တိုက်ခိုက်တဲ့ ဝါဒဖြန့်မှုတွေ လုပ်ဆောင်နေတာသာ ဖြစ်တယ်လို့ တုံ့ပြန်သွားခဲ့ပါတယ်။
