ကရင်နီလက်နက်ကိုင်ပူးပေါင်းတပ်ဖွဲ့နှင့် တိုက်ပွဲဆက်ဖြစ်၍ စစ်ကောင်စီတပ်သားသုံးဦးထပ်သေ

ကရင်နီလက်နက်ကိုင်ပူးပေါင်းတပ်ဖွဲ့နှင့် အာဏာသိမ်းစစ်ကောင်စီတို့ ယနေ့ တိုက်ပွဲဆက်လက်ဖြစ်ပွားခဲ့၍ စစ်ကောင်စီတပ်ဖွဲ့ဝင်သုံးဦးသေဆုံးပြီး ထိခိုက်ဒဏ်ရာရသူ များရှိခဲ့ကြောင်း ကရင်နီအမျိုးသားကာကွယ်ရေးတပ် ဖွဲ့(KNDF)က သတင်းထုတ်ပြန်သည်။

အမျိုးသားတိုးတက်ရေးပါတီ(KNPP/KA)နှင့် KNDF တို့သည် ထိုးစစ်ဆင်လာသည့် အကြမ်းဖက်စစ်ကောင်စီတပ်ကို ကယားပြည်နယ် ဒီးမော့ဆိုမြို့နယ် အနောက်ဖက်ခြမ်းရှိ ခူးပရာတောင်နှင့် ဘီသူ(အထက်) ကျေးရွာ အကြားတွင် ခုခံတိုက်ခိုက်ခဲ့ခြင်းဖြစ်သည်ဟု ဆိုသည်။

စစ်ကောင်စီ၏ တပ်မ (၆၆)မှ အင်အား ၁၂၀ ခန့်သည် ဖရူဆိုမြို့နယ်အနောက်ဘက်ခြမ်းရှိ တော်လှန်ရေး ပြောက်ကြားတပ်များနှင့် ပြည်သူ့ကာကွယ်ရေးတပ်များကို တိုက်ခိုက်ရန် စစ်ကြောင်းချီလာစဉ် ယနေ့ (ဩဂုတ် ၄ရက်) မွန်းလွဲပိုင်း၌ တိုက်ခိုက်ခံရခြင်းဖြစ်ကြောင်း ဖော်ပြထားသည်။

စစ်ကောင်စီဘက်က သေဆုံးထိခိုက်မှုရှိသော်လည်း KNPP/KNDF တပ်ဖွဲ့ဘက်မှ ထိခိုက်ဒဏ်ရာရ ကျဆုံးမှုမရှိဟု ထုတ်ပြန်ခဲ့သည်။

Public Service Announcement

ဒီးမော့ဆိုမြို့နယ် ယပ်ခူကျေးရွာ တွင်လည်း စစ်ကောင်စီတပ် အင်အား ၁၂၀ခန့် တပ်စွဲထားပြီး တိုက်ပွဲဖြစ်ပွားရာနေရာသို့ စစ်ကူပေးမည့် အခြေအနေတွင်ရှိကြောင်း၊ စစ်ကောင်စီတပ်များကို အမြစ်ပြတ်ချေမှုန်းသွားမည်ဖြစ် ကြောင်း KNDFက သတင်းထုတ်ပြန်သည်။

ကရင်နီလက်နက်ကိုင်ပူးပေါင်းတပ်ဖွဲ့နှင့် စစ်ကောင်စီတပ်တို့သည် ဇူလိုင်အတွင်းက လွိုင်ကော်နှင့် ဘောလခဲမြို့နယ်များ၌ တိုက်ပွဲများ ဖြစ်ပွားခဲ့ပြီး ယခုလ ဩဂုတ် ၃ရက်တွင်လည်း ဘောလခဲနှင့် ဖရူဆိုမြို့နယ်အကြား တိုက်ပွဲ ​လေးကြိမ်ဖြစ်ပွားခဲ့သည်။ တိုက်ပွဲများအတွင်းစစ်ကောင်စီတပ်ဖွဲ့ဝင်များ သေဆုံးထိခိုက်မှုများပြားခဲ့ကြောင်း KNDFက ထုတ်ပြန်ခဲ့သည်။