တပ်မဟာနယ်​မြေ(၁)နယ်​မြေတွင် တိုက်ပွဲပြင်းထန်​နေ၊ စစ်​ကောင်စီတပ် ထိခိုက်မှုရှိ​နေဟု ကျိုက်ထိုခရိုင်တပ်ရင်း – ၃ ထုတ်ပြန်

KNU သထုံခရိုင်တပ်မဟာ(၁)၊ သထုံမြို့နယ် KNLA တပ်ရင်း(၂)နယ်မြေအတွင်း တိုက်ပွဲများ ပြင်းထန်လျက်ရှိပြီး စစ်ကောင်စီဘက်မှ ထိခိုက်သေဆုံးသူ ၁၇ဦးခန့်ရှိကြောင်း ကျိုက်ထိုခရိုင် ပြည်သူ့ကာကွယ်ရေးတပ်မ တော်တပ်ရင်း – ၃က ထုတ်ပြန်သည်။

“အခုထိလည်း တိုက်ပွဲက မငြိမ်သေးဘူး။ ရန်သူ့ဘက်က တိုးလာလို့ ကြားဖြတ်တိုက်နေတာ”ဟု ကျိုက်ထိုမြို့နယ်ပြည်သူ့ကာကွယ်ရေးတပ်ဖွဲ့ဝင်တစ်ဦးက လူထုနွေဦးသို့ ပြောသည်။

တိုက်ပွဲမှာ ယနေ့(ဇွန် ၁၄ ရက်) နံနက် ၆နာရီခွဲခန့်က စတင်ခဲ့ပြီး ဝီယော်-ထုံးဘိုလေး-ပိန္နဲတော လမ်းပိုင်းတွင် KNLA ဦးဆောင်၍ ပူးပေါင်းတပ်ဖွဲ့များဖြင့် စစ်ကောင်စီတပ်ကို တိုက်ခိုက်နေခြင်းဖြစ်သည်။

စစ်ကောင်စီလက်အောက်ခံတပ်များမှ လက်နက်ကြီးများဖြင့် ပစ်ကူပေးနေ၍လည်း တိုက်ပွဲအနီးရှိ ကျေးရွာများအတွင်း ကျရောက်ပေါက်ကွဲနေပြီး ပြည်သူများထိခိုက်မှုကို မသိရသေးဟု ဆိုသည်။

Public Service Announcement

ယခုလဆန်းပိုင်းကစ၍ KNU တပ်မဟာ(၁)နယ်မြေအတွင်း အင်အားတိုးချဲ့လာသည့် စစ်ကောင်စီတပ်ကို နှစ်ကြိမ်တိုင်ကြားဖြတ်တိုက်ခိုက်ခဲ့သဖြင့် စစ်ကောင်စီတပ်သား ၁၀ဦးသေဆုံးပြီး ၁၅ဦး ဒဏ်ရာရခဲ့ကြောင်း ကရင်အမျိုးသားအစည်းအရုံး(KNU) ဗဟိုက ထုတ်ပြန်ထားသည်။